TAUNET 8 - BUKUIT NE TILIIL Sireet ne Dutero Kanon

Kogesugei Maraneet

¹ Ki ibwaat anyun `Kamuktaindet Noah, tyong'ik che po timiin ak kiyagiik tugul che ki mi tugul eng' moinget. Ak ki iyookyi Kamuktaindet usoonet ne ki usyi ng'wony, ak ki toi koteenyo peek.

² Kigerogis kong'iik che kutune peek che po rireet ak che punu peek eng' kipsengwet ak kegirinda ropta eng' soet parak.

³ Ki testai koteenyo peek eng' ng'wony kot ko kingo kesugei peetuusyek pogolu ak konom, ko kagong'ering'itu miising'.

⁴ Ki tonon moinget eng' arawetap tisap, peetuut ne po taman ak tisap eng' tuloonoogap Ararat.

⁵ Ki ng'ering'itu peek miising' kot ko eng' arawetap taman peetuut ne po tai, kotook tuloonook.

⁶ Ye kingo pata peetuusyek artamu, koyaat Noah tirisyetap moinget

⁷ ak koyookto chepkugit. Ki tirirenot kot koteenyo peek eng' ng'wony.

⁸ Ki iyookto cheptuget agine, si kobiit kogeer ngo kagong'ering'itu peek eng' emet komugul.

⁹ Ki ma nyoor cheptuget ole namei ak komung'ee amu kita komi peek emet komugul, koit koweekyigei Noah eng' moinget. Ki iyogoito Noah anyun eunnyi si konam konyo moinget oriit.

¹⁰ Kita kotebi peetuusyek alak tisap, yeityo komaanda kogeny cheptugonooto eng' moinget.

¹¹ Ki week cheptugonooto eng' koskoleny koibune kutinnyi sogoot ne tuon; ak ki nai Noah anyun kole teng'oti peek.

¹² Ki tebi Noah peetuusyek alak tisap, yeityo komaanda cheptugonooto kora; ak mata koweek kogeny.

¹³ Kingo po Noah kenyiisyek pogol lo ak agenge eng' arawetap tai, eng' peetuut ne po tai, ko kiteenyo peek anyun eng' emet. Ki isto Noah anyun tuguuk che kiga kisyebe moinget, ak kogeer ak konai kole kagosai emet.

¹⁴ Ki yaam emet eng' arawet ne po aeng', eng' peetuut ne po tiptem ak tisap.

¹⁵ Ki ng'at `Kamuktaindet Noah koleenji,

¹⁶ “Mandee eng' moinget, inyee ak chebyoseng'ung', ak weeriiguk ak kwonyiikwak.

¹⁷ Yaatu komong' tyong'ik tugul che saptos che mi kobooten; toriitik, kiyagiik, ak tugul che ichuutegei ng'wony, si kobiit koba koiiyo, kochang'a ak kotesagis eng' ng'wony.”

¹⁸ Ki manda anyun Noah ak weeriikyik, ak kwondonyi ak chebyosogap weeriikyik.

¹⁹ Ki manda eng' moinget tyony age tugul, tugul che ichuutegei ng'wony, toriit alak tugul ak tugul che pendote ng'wony ko uu piiteennywa.

Kogoitoi Noah konunoik

²⁰ Kiteekyi `Noah Kamuktaindet ne Toroor kaptisisyet, ak konam koip eng' tyony age tugul ne tiliil ak eng' toriit age tugul ne tiliil ak kogoito koek konunoik che kibeelei eng' kaptisiisyo.

²¹ Kingo ng'uuchi `Kamuktaindet ne Toroor anyinyindo kobun kaptisiisyo, kotil ineendet eng' muguleldanyi kole, “Ma achube ng'wony kogeny agobo chii amu yaacheen kabwaatutigap muguleldap chii kobooch koming'in. Ma abare tuguuk tugul che saptos kogeny agoi ko uu ye ki ayai.

²² Kotee kota komi ng'wony, koma pegu koolset ak kesisyet, kaitityet ak kiptoret, kemeut ak iwot, peet ak kemoi.”