TAUNET 49 - BUKUIT NE TILIIL Sireet ne Dutero Kanon

Koberuuri `Jakobo weeriikyik

¹ Yeityo koguur `Jakobo weeriikyik ak koleenji, “Oyumgei tugul, si kobiit aboorwok tuguuk che tuun pwonjinok eng' peetuusyek che po let.

² Oyumgei anyun si ogas, okweek weeriigap Jakobo; Ogas Israel kwandang'wong'.

³ Inyeendet Reuben ko ii weeriinnyu ne po tai, ii kamugennyu, agoi taunetap kimnateennyu; Etunateet ne po toroorindo, ak etunateet ne po kimnateet.

⁴ Iwasegei ko uu peek, menyooru anyun etunateet; Amu ki iwe itoogutap kwandang'ung'.

⁵ Tupcho Simion ak Lawi; Kariigap koroomnateet rotonikwak po chok.

⁶ Ee, muguleldanyu, amat iwe kapkirwoogennywa; Ee, teegistanyu, amonamge ak tuiyennywa. Amu ki par chii eng' nereegekwak, Ak ki ep kwaryatap eiik eng' kwetyinennywa.

⁷ Chuboot nyitatennywa, amu ki pichiien, ak nereegekwak, amu ki koroomen. Apchee icheek eng' Jakobo, ak aiyeste icheek eng' Israel.

⁸ Inyeendet Judah ne tuun ilasun tupchosyeguk. Indoi eung'ung' kaatitap puuniguk; ing'uruukyinin weeriigap kwandang'ung' eng' taing'ung'.

⁹ Judah ko neraneetap ng'etundo; kaiwe weeriinnyu eng' ole kaibarchi tyondo. Ki ing'uruuk, koribis ko uu ng'etundo, ak ko uu ng'etundo ne nyebuito; ng'oo ne ing'eeti?

¹⁰ Ma istoegei Judah kirokto ne po pounateet, ak ma petei ne igoitoi ng'atuutik eng' iyotennyi, agoi koit Shiloh; ak kase iit piik tugul ineendet.

¹¹ Ratyin sigiryennyi keetitap sabibuk, ak ratyin moitap sigiryennyi keetitap sabibuk ne myee kosiir; ki komwete ngoroikyik divaik che po sabibuk, ak komwete che tugegei piik che piriireen che po sabibuk.

¹² Ak kobiriritu konyekyik eng' divaik, ak leelagitu kelekyik eng' cheego.

¹³ Tuun menyei Zebulun ngeguutap nyanjet, ak koek kamuung'eetap melisyek. Egu kiwotennyi Sidon.

¹⁴ Sigiryet ne kiim Issakar, ne ribise kwenutap njorusyek che po keechiirek.

¹⁵ Ki keer ole kimuung'e kole myee, ak ki keer emet kole karaaran, ki ing'uruuk si kolaiso, ak koek otwogindet ne poisyei.

¹⁶ Irwookyin Dan piikyik, amu ooreet agenge ineendet eng' Israel.

¹⁷ Egu Dan ereneet eng' ole kibunei, ereneet eng' ooreet, ne susei kwarinigap paraisisyek, si kobut kowee patai chiito ne laanyei.

¹⁸ Ki agen yetuneng'ung', ee Kamuktaindet ne Toroor.

¹⁹ Igiichi lugeet Gad, ago igiichi ineendet icheek agoi konam kwaryat.

²⁰ Ruryotin amitwogik che tuun punu Asher, ak tuun koonu tuguuk che iboiboi laitorinik.

²¹ Kenyeleet ne subeendo Naphtali ne kagiunda, ne ng'alaali ng'aleek che myachen.

²² Josep ko keetit ne yiei kot, ne yiei kot ne mi ye neegitee kondap peek; iwaktoi mooriik kosiirei inaatut.

²³ Kagogoochi ineendet ng'wanindo che mwoktoi kotyek, kamwok ineendet ak kausaus ineendet miising'.

²⁴ Ago tebye kwangennyi eng' kimnateet, ak ki kimegitu eunekyik, eng' eunegap Ineendet ne Kiim ne po Jakobo, eng' kainetap Mestowot, Koita ne po Israel,

²⁵ agot eng' Kamuktaindet ne po kwandang'ung', ne tuun toretin, eng' Kamuktaindet Ne po Kamuktaet ne tuun iberuurin, eng' perurwogik che po parak kipsengwet, ak perurwogik che mitune rireet, perurwogik che po kinaik, ak che po iyoteet.

²⁶ Ki kimegitu perurwogigap kwandang'ung' kosiir perurwogigap aguiywogikyuk, agoi ole itei tuloonook che po koigeny. Tebee metitap Joseph perurwogichooto, ak eng' metit parak ne po ineendet ne ki kitabaane tupchosyekyik.

²⁷ Benjamin ko suiyot ne tonisyei; amei karon che po logeet, ak kopchei koskoleny che kaluul.”

²⁸ Chuuto tugul ko ortinwek taman ak aeng' che po Israel, ak chuuto ko ng'aleek che ki mwachi kwandanywa koberuuri icheek, ki iberuur chii tugul ko uu ole teptoi perurtanyi.

Meetap Jakobo

²⁹ Kingo pata anyun, kong'at icheek koleenji, “Neegit kiyuma awo ole mi piikyuk. Otuba kobooto kwanisyekyuk eng' kebeneet ne miitei mbareetap Epron Hitindet,

³⁰ eng' kebenonooto miitei mbareetap Makpela, ne tokyingei Mamre, eng' emetap Kanaan, ne ki al Abraham kobooto mbaranooto eng' Epron Hitindet, si koek ye mi kereeriisyek.

³¹ Ki kitupchi yooto Abraham ak kwondonyi Sarah, ki kitupchi yooto kora Isak ak Rebeka kwondonyi ak icheek, ak ki atupchi Leah yooto agine.

³² Ki kiale weeriigap Het mbaranooto ak kebenonooto mi yooto.”

³³ Ye kingo kagogees Jakobo ng'atuutik che king'ate weeriikyik, kogetita keelyekyik koba itook, ki ilil anyun ak ki kiyum kobooto piikyik.