TAUNET 48 - BUKUIT NE TILIIL Sireet ne Dutero Kanon

Koberuuri `Jakobo weeriigap Joseph

¹ Kingo pata tuguuchuuto, koleenji chiito age Joseph, “Keero, myani kwandang'ung'.” Ki wo anyun komut weeriikyik tuwai, Manasseh ak Ephraim.

² Ki leenji chiito age Jakobo, “Ineni weeriing'ung' Joseph, nyoonei ole imi,” ak ki igiilgei Israel kong'eet kotebee itoogut.

³ Ak ki leenji `Jakobo Joseph, “Kimong'jo Kamuktaindet Ne po Kamuktaet eng' Luz eng' emetap Kanaan, ak ki iberuura,

⁴ ak ki leenjo, ‘Keero, agoonin iyoteet, ak abarain, ak ayain iegu pororyosyek che chaang'. Ak tuun agoochini emoni iyoteet ne piitu let eng' inyee, koek nenywa koigeny.’

⁵ Chechuuk anyun nguno weeriichuguk aeng'u, chu ki kisigun eng' emetap Misiri, ye kitom aitu ole imi; egu chechuuk Ephraim ak Manasseh, ko uu ye chechuuk Reuben ak Simion.

⁶ Ago egu cheguuk che tuun isiche let eng' chu; kiguurtoe kainaigap weeriik che tupcho eng' porotennywa.

⁷ Ye kita anyoone abunu Padan, korebena meet Rael eng' emetap Kanaan, eng' ooreet ye ma loo kitigin eng' Eprat, ak ki atupchi anyun yooto po ooreetap Eprat (nooto ko Bethlehem).”

⁸ Ye kingo keer `Israel weeriigap Joseph, koteebe koleenji, “Ng'oo chu?”

⁹ Ki leenji Joseph kwandanyi, “Weeriikyuk chu che ki koono Kamuktaindet eng' olito.” Ak ki le, “Kaigai imutwaa kobwa yu, si aberuur.”

¹⁰ Nguno ko ki neegit kogoryo konyegap Israel amu osindo; ki ma kota komuuchi kogeer kiy komyee. Ak ki imut `Joseph lagochooto koriikyi ineendet ak ki ng'utut, ak koue eunekyik.

¹¹ Ki leenji `Israel Joseph, “Kama kota abwaati ale ta ageere togeng'ung', ago nguno ko kagoboorwo Kamuktaindet lagoguk ak icheek.”

¹² Yeityo koisto `Joseph lagochooto eng' kutung'oigap Jakobo ak kong'uruuk ineendet agoi ng'wony.

¹³ Ki nam `Joseph icheek tuwai, kiname Ephraim eunnyi ne po tai kotokyi murot kaataam ne po Israel, ak koname Manasseh eunnyi ne po kaataam kotokyi eutap Israel ne po tai, ak komut koriikyi kwandanyi.

¹⁴ Ago ki iito Israel eunnyi ne po tai kogonoor metitap Ephraim, weeriit ne ming'in ak kogonoor eunnyi ne po kaataam metitap Manasseh, ki igonoor eunekyik ko uu nooto, nganda ki weeriit ne po tai Manasseh.

¹⁵ Ki iberuur Joseph, ak kole, “Kamuktaindet ne kibendotee tainnyi kwanisyekyuk Abraham ak Isak, Kamuktaindet ne ki paata atkinye tugul agoi kora,

¹⁶ malaikaiyat ne ki ityaacha eng' yaitwogik tugul, ingoberuur lagochu; ak keguurtoe icheek kainennyu, ak kainaigap kwanisyekyuk ak icheek, Abraham ak Isak; ak ingotesagis kochang'a eng' kwenutap ng'wony.”

¹⁷ Ye kingo keer Joseph kole kagogonoor kwandanyi eunnyi ne po tai metitap Ephraim, koyait eng' tainnyi, ak ki nam anyun eutap kwandanyi kole koisto eng' metitap Ephraim si konde metitap Manasseh.

¹⁸ Ki leenji `Joseph kwandanyi, “Ma uu nooto, abba! Amu ni ko weeriit ne po tai; igonoor eung'ung' ne po tai metinnyi.”

¹⁹ Ago ki eesyo kwandanyi, ak kole, “Angen ale uu nooto, weeriinnyu, angen. Egu agine ineendet pororyet, ak tuun eetu. Ago eetu ng'eetap kamet ne ming'in kosiir ineendet ak chaang'aitu lagokyik koegu pororyosyek che chaang'.”

²⁰ Ki iberuur anyun icheek peetuunooto, koleen, “Iberuuri Israel piik amu inyee, koleen, ‘Ingoyain Kamuktaindet ogergeitu ak Ephraim ak Manasseh.’ ” Ki nam anyun Ephraim kondoe Manasseh.

²¹ Yeityo koleenji `Israel Joseph, “Keero, neegit ame, ago mi Kamuktaindet kobooten ak koweekten kogeny iwe emetap kwanisyeguk.

²² Kaagoonin nguno Shekem kebeberta agenge ne siirei che po tupchosyeguk, nooto ne ki aluule Amorik eng' rotwennyu po chok ak kwangennyu.”