TAUNET 46 - BUKUIT NE TILIIL Sireet ne Dutero Kanon

Kochoortogei `Jakobo Misiri kobooto piigap koonnyi

¹ Ki nam panda anyun Israel kobooto tugul che ki tinyei, ak ye kingo it Beer-sheba kogoochi tiseiywot Kamuktaindet ne po kwandanyi Isak.

² Ki ng'alaalji `Kamuktaindet Israel eng' ng'ang'utik che po kemoi, koleenji, “Jakobo! Jakobo!” Ak ki le, “Ami yu.”

³ Koleenji Kamuktaindet, “Aa Kamuktaindet, Kamuktaindet ne po kwandang'ung'. Meiywei, ichoortegei iwe Misiri; amu ayain iegu pororyet ne oo eng' olooto.

⁴ Achoortoigei agane kobooten awendi Misiri, ak tuun amutun iman itogosu kogeny, ak kotwae Joseph eunnyi konyeguk.”

⁵ Ki ng'eet anyun Jakobo eng' Beer-sheba; ak ki imut `weeriigap Israel kwandanywa Jakobo, ak lagokwak ak kwonyiikwak eng' kariisyek che kiga koyook Pharaoh si kobiit kimute ineendet.

⁶ Ki kweri tuukwak, ak ki ip tuguukwak che kiga konyoor eng' emetap Kanaan. Ki it anyun Misiri `Jakobo kobooto lagokyik tugul;

⁷ weeriikyik, tiibiikyik kobooto mochogoronikyik che weeriik ak che tiibiik, ak ki imut lagokyik tugul koba Misiri.

⁸ Chu kainaigap piigap Israel, che ki it Misiri, Jakobo ak weeriikyik: Reuben, weeriit ne po tai ne po Jakobo,

⁹ ak weeriigap Reuben chu: Hanok, Palu, Hesron ak Karmi.

¹⁰ Weeriigap Simion chu: Jemuel, Jamin, Ohad, Jakin, Sohar ak Shaul weeriitap Chepkanaanindet.

¹¹ Weeriigap Lawi chu: Gerson, Kohat ak Merari.

¹² Weeriigap Judah chu: Er, Onan, Shelah, Peres ak Zerah. (Ago ki pek Er ak Onan eng' emetap Kanaan). Ak weeriigap Peres ko ki Hesron ak Hamul.

¹³ Weeriigap Issakar chu: Tola, Pupa, Job ak Simron.

¹⁴ Weeriigap Zebulun chu: Zereth, Elon ak Jaleel.

¹⁵ Chuuto ko weeriigap Leah che ki sikyi Leah Jakobo eng' Padan-aram, kobooto cheptonyi Dina. Ki sosom ak somok weeriikyik kobooto tiibiikyik.

¹⁶ Weeriigap Gad chu: Sipion, Hagi, Suni, Esbon, Eri, Arodi ak Areli.

¹⁷ Weeriigap Asher chu: Jimna, Isba, Isbi, Beriah ak Zerah chepkametinnywa. Weeriigap Beriah chu: Heber ak Malkiel.

¹⁸ Chuuto ko weeriigap Silpa ne ki igoochi Laban Leah cheptonyi, ki sikyi Jakobo chooto - ki piik taman ak lo.

¹⁹ Chu weeriigap Rael kwondap Jakobo: Joseph ak Benjamin.

²⁰ Ki kisikyi Joseph eng' emetap Misiri Manasseh ak Ephraim, che ki sikyi Asenat cheptap Potipera tisiindet ne po On.

²¹ Weeriigap Benjamin chu: Bela, Beker, Asbel, Gera, Naaman, Ei, Rosh, Hupim ak Ard.

²² Chuuto weeriigap Rael che ki sikyi ineendet Jakobo - ki piik taman ak ang'wan.

²³ Weeriitap Dan ko Husim.

²⁴ Weeriigap Naphtali chu: Jaseel, Guni, Jeser ak Silem.

²⁵ Chuuto ko weeriigap Bila, ne ki igoochi Laban Rael cheptonyi, ki sikyi Jakobo chuuto - ki piik tisap tugul.

²⁶ Piik tugul che ki it Misiri kobooto Jakobo, ko ki piik tamanwogik lo ak lo che ki mang'une poortap Jakobo, kobatee kwonyiigap weeriigap Jakobo.

²⁷ Weeriigap Joseph, che ki kisikyi eng' Misiri, ko ki aeng'. Piik tugul che po kootap Jakobo che ki it Misiri, ko ki tamanwogik tisap.

²⁸ Ki iyookto `Jakobo Judah kondoe ineendet kwo kap Joseph, koarorchi ooreet ne wendi Goshen, ak ki it anyun emonooto kiguure Goshen.

²⁹ Ki chop anyun Joseph chepkichutinnyi, ak kwo kotorookta kwandanyi Israel agoi Goshen. Ki iboorchigei Joseph ak kotoroigei, ak koriir eng' kaatinnyi konyil ak konyil.

³⁰ Ki `leenji Israel Joseph, “Kamee anyun, amu kaageer togeng'ung', kaagaa taisabe kora.”

³¹ Ki leenji Joseph tupchosyekyik, ak piigap kootap kwandanyi, “Katogoste anyun awe amwachi Pharaoh aleenji, ‘Kagobwanjo weeriik che ketupche, ak piigap kootap abba, che ki mi emetap Kanaan.

³² Pichooto ko kayogik, ak icheeget ko piigap tuuga; ak kaget keechiirekwak, tuukwak ak tuguukwak tugul che tinyei.’

³³ Ye kuurok anyun Pharaoh, koteebenak kole, ‘Poisyeeng'wong' ko nee?’

³⁴ Oleenji, ‘Acheek otwogiguk ko ki piigap tuuga kong'etee ko kimengech agoi kora, acheek, ak kwanisyekyok agicheek’ si kobiit omeny emet ne kiguure Goshen, amu chii age tugul ne iyagisyei ko ng'waan eng' Misiri.”