TAUNET 45 - BUKUIT NE TILIIL Sireet ne Dutero Kanon

Koboorchingei `Joseph tupchosyekyik

¹ Ki ma imuuch Joseph anyun komuita eng' taitap piik tugul che ki tonondos eng' ole neegitee ineendet. Ki ng'at ak komwa eng' tuugeet ne oo kole, “Omaande chii tugul eng' ole ami.” Ki ma ng'et chii ne ki mi ak Joseph, ye king'aang'jigei `ineendet tupchosyekyik.

² Ago ki riir kowaach kot kogas Misiriik, ak ki kas kap Pharaoh ak icheek.

³ Ak ki leenji `Joseph tupchosyekyik, “Aa Joseph! Tos ta kosabei abba?” Ago ki ma imuuch kowolji tupchosyekyik, amu ki iyweis eng' tainnyi.

⁴ Ki leenji anyun `Joseph tupchosyekyik, “Kaigai oriigu yu ami.” Ak kiriikta anyun. Ak ki leenji, “Aa tupcheng'wong' Joseph, ne ki oalde kwo Misiri.

⁵ Nooto anyun, ama ta oaragense, anan onereekyigei okweegei eng' okweegei agobo aldaet ne ki oaldocho oli, amu ki iyookwo Kamuktaindet andounenok si kobiit asar piik.

⁶ Ki kobiit rubeet eng' emet eng' kenyisyechu aeng', ak ta komi kenyiisyek muutu alage, che ma piitu kabatisyet anan kesisyet.

⁷ Ak ki iyookwo Kamuktaindet andounenok, si kobiit ariibwok che ng'etu eng' ng'wony, ak asarwok osapche eng' saruunet ne oo.

⁸ Ara anyun, ki ma ko okweek che ki omutwaa anyo oli, ago Kamuktaindet ne ki koyaa aek kwanda eng' Pharaoh, ak aegu kiptaiyatap koonnyi tugul, ak pounindetap emet komugul ne po Misiri.

⁹ Ara anyun, ochakte otogoste ole mi abba, ak oleenji, ‘Kamwa ko uu ni weeriing'ung' Joseph, kiyaa Kamuktaindet aek kiptaiyatap Misiri komugul, chooruge nyoo ole ami, amegagei.

¹⁰ Ak inyoo imeny emetap Goshen, si ineegitena, inyee ak lagoguk kobooto mochogoroniguk, kechireguk, tuuga cheguuk ak tuguuk tugul che itinye.

¹¹ Abain eng' olooto si mebanan, inyee ak koong'ung', ak tugul che itinye; amu ta komi kenyiisyek muutu che pwoonei che po rubeet.’

¹² Ogeere nguno eng' konyekwok, ak kogeerei Benjamin tupchennyu agine, kole kutinnyu ne ng'alaalwok.

¹³ Omwachi abba teegistanyu tugul eng' Misiri, ak tuguuk tugul che kaogeer, ak ochakte omutu abba konyo oli.”

¹⁴ Yeityo kosuup kaatitap ng'eetap kamet Benjamin, ak koriir, ki riir Benjamin agine komi kaatitap Joseph.

¹⁵ Ak ki ng'utut tupchosyekyik tugul, koriirei. Ak ye ibata nooto kong'alaalji tupchosyekyik ineendet.

Koguurei Pharaoh Jakobo konyo Misiri

¹⁶ Ki kigas ng'aleechooto eng' kootap Pharaoh, keele, “Kagoit tupchosyegap Joseph,” ak ki ibaibai Pharaoh nooto, kobooto otwogikyik.

¹⁷ Ki leenji `Pharaoh Joseph, “Ileenji tupchosyeguk, ‘Oyai ni; oratyi sigirokwok tuguukwok, ak obe, agoi emetap Kanaan.

¹⁸ Omutu kwandang'wong' ak piigap kooriikwok, ak obwa ole ami, si agoonok tuguuk che myach che po emetap Misiri, ak oam akwaiyetap emet.’

¹⁹ Ara anyun, kaging'atak, ‘Oyai ko uu ni: oip kariisyek che po emetap Misiri amu lagokwok, ak kwonyiikwok, ak obwa, omutu kwandang'wong'.

²⁰ Ago amobwaat tuguukwok, amu chekwok tuguuk tugul che myachen che po emetap Misiri.’ ”

²¹ Ki yai ko uu nooto weeriigap Israel. Ki igoochi `Joseph icheek kariisyek ko uu ng'atuutyetap Pharaoh, ak kogoochi amitwogik che amoti eng' ooreet.

²² Ki igoochi chii age tugul ngoroik che kiwalawale alak, ago ki igoochi Benjamin silingisyek pogol somok, ak ngoroik muut che walawali.

²³ Ki iyookyi kwandanyi tuguuk ko uu ni: sigiroik taman che kilae tuguuk che myach che po Misiri, sigiroik che iyuogik taman che kilae peek ak magatiinik ak amitwogik alak che tuun amonu eng' ooreet.

²⁴ Kimonorisyechi anyun Joseph tupchosyekyik ak ye ki inamei panda, koleenji, “Amonereekyinotegei eng' ooreet.”

²⁵ Ki pa anyun kotogosta eng' Misiri agoi koit emetap Kanaan kap Jakobo kwandanywa.

²⁶ Ak ki mwachi koleenji, “Ta kosabei Joseph! Ak ineendet ko pounindetap emet komugul ne po Misiri.” Ak ki tanui muguleldap Jakobo, amu ma iyan icheeget.

²⁷ Ago ye ki ngemwachi ng'aleek tugul che po Joseph, che kiga komwachi Joseph weerchooto, ak ye kingo keer Jakobo kariisyek che ki iyook Joseph si kimutee ineendet, kosap muguleldap Jakobo kwandanywa.

²⁸ Ak ki le Israel, “Yamei ko uu nooto! Ta kosabei weeriinnyu Joseph. Awendi anyun ageere ineendet kotom amei.”