TAUNET 43 - BUKUIT NE TILIIL Sireet ne Dutero Kanon

Koweektoigei tupchosyegap Joseph Misiri

¹ King'wanit rubeet miising' eng' emet.

² Ak ye kingo kagotar peek che ki ibune Misiri, koleenji kwandanywa, “Oweektegei kogeny, oalwech amitwogik tutigin.”

³ Ago ki leenji Judah, “Ki igimgimech chiichooto koleenjech, ‘Momuuchi ogeera togoch ngot ko mobwane ak weeriit ne otupche.’

⁴ Ngot iyooktech kobooto tupchennyo kechoortegei anyun kealun amitwogik.

⁵ Ago ngot ko mechamji kwo, koma kichoortoigei, amu kileenjech chiichooto, ‘Ma koi ogeer togeennyu ngot ko mobwa ak weeriit ne otupche.’ ”

⁶ Ki le Israel, “Amu nee si oyaiywo yaityoni tee ni kot ong'aang'ji chiichooto oleenji ki tinyei weeriit age ne kitupche?”

⁷ Ki le icheek, “Ki kinenech miising' chiichooto atebosyekyok ak ole ki kisikyinech koleen, ‘Ta kosabei kwandang'wong'? Ak otinye weeriit age ne otupche?’ Ki kiwolji ko uu ye kiteep. Tos ki kimuuch kenai keele, mwaiwech koleenjinech, ‘Omutu weeriit ne otupche kochoorgei?’ ”

⁸ Ki leenji `Judah kwandanyi Israel, “Iyogu weeriito keebe tuwai, si keng'eetye keebe, si kobiit kesapchee, ama kibegu, acheek ak inyee, ak lagokyok ak icheek.

⁹ Ingobunjo atononji ineendet; ak image ineendet eunnyu. Ngot koma mutuun ineendet inyoo ande taing'ung', kobunjino chalwogoto peetuusyek tugul.

¹⁰ Amu nda ki ma kigagei, ta kigaa keweigei iman ne po aeng' nguno.”

¹¹ Yeityo koleenji `kwandanywa Israel icheek, “Ngo uu nooto anyun, oyai ko uu ni: oip tuguuk che myachen miising' che po emet eng' lolotinwekwok, oipchi chiichooto kagoochinoik ko uu mwanik tutigin che kinyaise, kobooto kumyat kitigin, tuguuk che ng'uu ne anyiny, tuguuk che uu igomoik, kobooto tuguuk che uu njuguk ak logoek che kiguure almond.

¹² Oip eng' eunekwok robiinik otes che yamegei ak kamunutyonooto konyil aeng', ak che kiga kiweech eng' kutusweegap lolotinwekwok. Oweekte chooto ak icheek; abeere ki ma nai piik che ki indoi.

¹³ Omut weeriit ne otupche agine, ong'eetyee oba kogeny ye mi chiichooto.

¹⁴ Ingorireenak Kamuktaindet Ne po Kamuktaet, eng' taitap chiichooto, si kobiit kotyakwok weeriit ne otupche nin linda, ak Benjamin. Ak ngo peteno lagokyuk ko kagobetyo.”

¹⁵ Ki ip anyun pichooto kagoochinoichooto, ak ki ip robiinik che yamegei ak kamanuutyonooto konyil aeng', ak king'eetyo kobooto Benjamin koba Misiri, ki it anyun olooto ak kitononso eng' taitap Joseph.

¹⁶ Ye kingo keer `Joseph Benjamin komi kobooto icheek, koleenji ne tononjin koonnyi, “Imutu pichoo kobwa ko, ak oeeng'ji ak ochop kiy tugul, amu ki amisyei tugul ak pichooto peet kween.”

¹⁷ Ki yai chiichooto ko uu ye ki kamwachi Joseph; ak ki imut anyun `chiichooto pichooto kobwa kootap Joseph.

¹⁸ Ak ki iyweis pichooto, amu ki kimut koba kootap Joseph. Ki ile, “Kagimutwech kebwa ko amu chepkondok che ki kiweekte eng' lolotinwekyok yu kiga kibwa tai, si kobiit konyoor ng'olyoot ne igikyinenech, ak kogerchech ko, yeityo koyaech keegu otwogik, kobooto sigirokyok.”

¹⁹ Kiriikta ye mi chiito ne tononjin kootap Joseph, ak kong'alaalji ineendet eng' ole neegitee kurgeet,

²⁰ koleenji, “Ee kiptaiyandennyu, ki kichooruge iman eng' panda ne po tai, keal amitwogik,

²¹ ak ye ki ngeit anyun kootap toek, kityaach lolotinwekyok, ki mi chepkondogap chii tugul kutitap lolennyi. Ara kagiibu anyun chooto kogeny, ak

²² kagiibu kora robiinik alak che ki ale amitwogik. Ma kingen chiito ne ki inde silingisyekyok lolotinwekyok.”

²³ Ki leenji, “Ingotep kaalyeet eng' okweek; amoiyweisye. Ki koonok Kamuktaindeng'wong', Kamuktaindet ne po kwandang'wong', konorwet ne myee ne ung'aat eng' lolotinwekwok, ki ataach silingisyekwok.” Ak ki imutyi Simion komong'.

²⁴ Ki imut anyun `chiichooto pichooto koba kootap Joseph, ak konaga peek, ak kiuun pichooto keelyekwak, ak ki pae sigirokwak amitwogik che ki konorotiin.

²⁵ Kichopchi `icheek Joseph kagoochinoik eng' sait ne itune, peet kween, amu ki kas keele tagoi koamisyei eng' olooto.

²⁶ Ye kingo it Joseph kaa, koipchi `pichooto ineendet kagoochinoik che ki ibu, kobwa ko, ak ki ing'uruuk eng' tainnyi agoi ng'wony.

²⁷ Ak kiteebe icheeget chametapkei, koleenji, “Chamegei kwandang'wong', poiyondonooto ne ki komwaiwo? Tos ta kosabei?”

²⁸ Ki leenji, “Chamegei otwogindeng'ung' kwandanyo. Ta kosabei.” Ak ki ing'uruukyi.

²⁹ Ak kitabendo Joseph, ak ki keer tupchennyi Benjamin, ng'eetap kamet, ak ki le, “Tupcheng'wong' ne ming'in ni, ni ki komwaiwo?” Ak ki leenji, “Ingorirenen Kamuktaindet, weeri!”

³⁰ Ak kichirchiren Joseph, amu kieet emosto eng' muguleldanyi amu ng'eetap kamet, ak ki cheeng' ole wendi koriiree. Ki manda anyun koonnyi ne po oriit, kwo koriir.

³¹ Yeityo koun togeennyi ak komong', ak kimuita si ma riir, ak ki le, “Oibu amitwogik.”

³² Ki kinde chechiik oldanyi ineegei, ak ki kinde oldanywa chechwaak icheegei, ak che po Misiriik oldanywa icheegei, che ki cham koamisyei kobooto ineendet: amu ki ma kochamei Misiriik koamis tugul ak Yahudik, amu king'wan eng' Misiriik koamjin.

³³ Ki tebee tainnyi weeriit ne po tai ko uu sigennyi, ak ne ming'in ko uu ming'inatennyi, ak ki kwong'yo pichooto.

³⁴ Ki igoochi pichooto kererutigap amitwogik che ki mi tainnyi, ago kieet kererutyetap Benjamin kosiir che po alak konyil muut. Ak kieeiso ak koboiboitu kobooto ineendet.