TAUNET 41 - BUKUIT NE TILIIL Sireet ne Dutero Kanon

Koweechi Joseph karwotitaosyegap Pharaoh

¹ Ye kingo keskei kenyiisyek aeng'u, korwotyi Pharaoh kotononi eng' ye neegitee aineet.

² Ki keer kotogosune tuuga tisabu aineet, che korooron ak ko neryootiin miising', ak ki agete morong'yot.

³ Yeityo kotogosune aineet tuuga alage tisabu kosubu chugai, che ma korooron ak ki sogityotiin, ak ki tononso eng' ye mi tuuga chuun alage eng' ngeguut.

⁴ Ak ki am tuuga che yaacheen ak ko sogityotiin tuuga chuun tisap che myachen che neryootiin. Kosiir anyun Pharaoh eng' yooto.

⁵ Ki inuuch kogeny ak ki irwotyi ne po aeng', ki keer komang'une mopchot agenge ne po paiywat itiik tisabu che ruryotiin ak ko korooron.

⁶ Ye kingo pata chooto komong' itiik tisabu che po paiywat, che meiyotiin, che ki imel usoonet ne punu kong'asiis.

⁷ Ki lugui itichooto po peechooto meiyotiin chuun tisap ruryotiin ak ko neryootiin. Ki siir anyun Pharaoh ak konai kole kaagaa karwotitoet.

⁸ Kingo eech karon, koiimgei eng' muguleldanyi, ak ki iyookto keguur Siriik tugul che ng'oomen che po Misiri, che ng'oorsei, ak piik tugul che ng'oomen che ki miitei. Ki tetyi `Pharaoh icheek karwotitoennyi, ago ki ma piit chii ne ki imuuch koguiyechi Pharaoh karwotitaosyekyik.

⁹ Yeityo komwachi anyun ne oo eng' riibiigap tuguuk che kieei, `Pharaoh, koleenji, “Kabwaat rani lelutikyuk.

¹⁰ Ye kiga nereekyi Pharaoh otwogikyik, kogera, anee ak ne oo eng' che riibei kwang'set, kogerchech kootap kiptaiyatap riibiik.

¹¹ Ki kirwootyi karwotitoet acheek tuwai eng' kemout agenge, ak ki kirwootyi chii tugul ko uu weeksetap karwotitoennyi.

¹² Ak ki mi kobootech neraneet age, Hebranindet, otwogindetap kiptaiyatap riibiik. Ki kimwachi, ki iboorwech karwotitaosyekyok ak ki iweech ko uu karwotitoetap chii age tugul.

¹³ Ak ki yaak ko uu nooto ki iboorwech; ki iweekyo poisyennyu, ak ki kisonginin nin age.”

¹⁴ Eng' yooto koyookto anyun Pharaoh keguur Joseph, ak ki kimoong' ineendet eng' keriinget, kechogune. Ki inem tamnet ak kowal ngoroikyik, ak kwo ole mi Pharaoh.

¹⁵ Ki leenji `Pharaoh Joseph, “Koarwotyi karwotitoet, ma piit chii ne koimuuch koweech. Koagas agobo inyee keele, ngigas karwotitoet imuuchi iweech.”

¹⁶ Ki wolji `Joseph Pharaoh koleenji, “Ma pota anee; igoochin `Kamuktaindet Pharaoh waluunet ne po kaalyeet.”

¹⁷ Ki ng'alaalji anyun `Pharaoh Joseph, koleenji, “Keero, koatononi eng' ngeguutap aineet eng' karwotitoennyu,

¹⁸ ageer anyun kotogosune aineet tuuga tisabu, che neryootiin miising' ak ko korooron; ak koagete morong'yot.

¹⁹ Ki togos tuuga alage tisabu kosubu chugai, che nyalulyotin ak ko yaacheen ak ko sogityotiin, che kitom ageere eng' emetap Misiri komugul che yaacheen che uu chooto.

²⁰ Ki am tuuga chooto sogityotiin ak ko yaacheen tuuga chuun kabo tai tisap neryootiin,

²¹ ago ye kingo kagoam, koma kotook keele kagoam, amu kota ko yaacheen ko uu eng' tai, ak eng' yooto anyun, asiiru.

²² Koaru ne po aeng' ak koageer eng' karwotitoennyu, komang'une itiik tisabu mopchot agenge, che ruryotiin ak ko myachen.

²³ Yeityo komong' itiik tisabu kosubu chooto che resyotiin ak ko meiyotiin, che ki imel usoonet ne punu kong'asiis.

²⁴ Ak kolugui itichooto meiyotiin itiik chuun tisap myachen. Kinga mwachi piik che ng'oorsei, koma piit ne koimuuch koboorwo.”

²⁵ Yeityo koleenji `Joseph Pharaoh, “Agenge karwotitoetap Pharaoh. Kagoboorchi `Kamuktaindet Pharaoh kiit ne machei si koyai ko neegit.

²⁶ Tuuga chooto tisap che myachen ko kenyiisyek tisap, ak itichooto tisap myachen ko kenyiisyek tisap; agenge karwotitaoniito.

²⁷ Tuuga chooto tisap sogityotiin ak ko yaacheen che koisubu chuun ko kenyiisyek tisap, ak kogeny itichooto tisap che ma ruryotiin che ki imel usoonet ne punu kong'asiis, koegu kenyiisyek tisap che po rubeet.

²⁸ Nooto ko kiit ne kaamwachi Pharaoh. Kagoboorchi `Kamuktaindet Pharaoh kiit ne machei si koyai ko neegit.

²⁹ Pwoonei kenyiisyek tisabu che po rurateet ne oo eng' emet komugul ne po Misiri.

³⁰ Ago ye ibata chooto koit kenyiisyek tisabu che po rubeet; ak keutye rurateet eng' emetap Misiri, ak tuun iwong'u emet tugul rubeet.

³¹ Ma konaaksei ruratonooto eng' emet amu rubonooto isubu, amu egu rubeet ne ng'waan miising'.

³² Kogiboorchi anyun Pharaoh karwotitaoniito konyil aeng' amu ki kochobok nooto eng' Kamuktaindet, ak chogune Kamuktaindet kiito kosulda.

³³ “Ara ingocheeng' `Pharaoh chiito ne tinyei naet ne nin ak utaatyet si konde koboi emetap Misiri.

³⁴ Ingoyai Pharaoh niito, ak ingonde riibiik koriip emet, si kobas kebeberta agenge eng' muut eng' emetap Misiri eng' kenyisyechooto tisap po rurateet.

³⁵ Ingoyum amitwogik tugul che po kenyisyechooto tisap myachen, che ma koit, ak kogonor peek eng' pounatetap Pharaoh koek amitwogigap nganasook ak ingoriip.

³⁶ Ak koek amitwogichooto pasanik che ki pasyin emet eng' kenyisyechooto tisap po rubeet, che tuun piitu eng' emetap Misiri, si ma me emet eng' rubeet.”

³⁷ Ki myeiit ng'olyoondonooto eng' `Pharaoh ak eng' otwogikyik tugul.

³⁸ Ki leenji Pharaoh otwogikyik, “Kimuktoi ano kenyooru chiito ne uu chiichi ne tinyei Kabuusetap Kamuktaindet?”

³⁹ Ki leenji anyun `Pharaoh Joseph, “Amu kagoboorun Kamuktaindet chooto tugul, ma mi anyun chiito ne tinyei naet ne nin ak utaatyet ko uu inyee.

⁴⁰ Inyee ne kebou koonnyu ak ko uu ng'olyoondeng'ung' ko kebou piikyuk tugul, kobatee eng' ng'echereetap laitornatet, ko anee ne oo eng' inyee eng' nooto.”

⁴¹ Ki leenji anyun `Pharaoh Joseph, “Keero, kandein ibou emet komugul ne po Misiri.”

⁴² Ki inem Pharaoh eng' eunnyi peteiyot ne po ng'ookset, ak konde eutap Joseph, ak kolelesonji ineendet eng' ngoroik che korooron che po katanit, ak konde sirimdo ne po thahabu kaatinnyi.

⁴³ Ak ki igoochi `Pharaoh Joseph kolaany chepkichutinnyi ne po aeng' ne ki tinyei, ak kiboldos piik eng' tainnyi koleen, “Ogutuny!” Ak ki inde ineendet koboi emet komugul ne po Misiri.

⁴⁴ Ki leenji kogeny `Pharaoh Joseph, “Aa Pharaoh, ak ma imuuchi chii kochuul eunnyi anan keldanyi eng' emet komugul ne po Misiri ama ichamji.”

⁴⁵ Ki kuure `Pharaoh Joseph Sapenatpanea, ak ki igoochi kotun Asenat cheptap Potipera tisiindet ne po On. Ak kiwendot Joseph kobunoot emetap Misiri.

⁴⁶ Ki po Joseph kenyiisyek sosom ye ki tononi eng' taitap Pharaoh, laitoryatap Misiri. Ak ki wo Joseph eng' ole mi Pharaoh, ak ki punoot emet komugul ne po Misiri.

⁴⁷ Ki ruryo peek miising' eng' emet eng' kenyisyechooto tisap po piyendo.

⁴⁸ Ki iyum amitwogik tugul che po kenyisyechooto tisap che ki mi emetap Misiri, ak ki konoree amitwogichooto nganasook. Ki konor anyun amitwogigap mbareenik che kiga yiem nganaseet age tugul, kogonoree nganasochooto.

⁴⁹ Ki iyum anyun Joseph peek che chaang' miising', che tee ng'aniegap nyanjet, kot kometo koitet, amu ki ma kota koiitoksei.

⁵⁰ Ki kisikyi Joseph weeriik aeng' kotom koit kenyiitap rubeet, che ki sikyi Asenat, cheptap Potipera, tisiindetap On.

⁵¹ Ki kuure Joseph kainetap ne oo Manasseh, kole, “Amu kagoono Kamuktaindet autye kaimutikyuk tugul, ak koot tugul ne po abba.”

⁵² Ki kuure ne po aeng' Ephraim, kole, “Amu kagoono Kamuktaindet iyoteet eng' emet ne ki anyoorunee nyalilda.”

⁵³ Ki igeskei anyun kenyisyechooto tisabu po rurateet eng' emetap Misiri.

⁵⁴ Yeityo kotoi anyun kobwa kenyiisyek tisabu che po rubeet ko uu ye ki kamwa Joseph. Ki piit anyun rubeet eng' emotinwek tugul, ago ki mi amitwogik emet komugul ne po Misiri.

⁵⁵ Ye kingo am rubeet emetap Misiri komugul koriirchi `piik Pharaoh kosoom amitwogik. Ki leenji `Pharaoh piik tugul che po Misiri, “Oba kap Joseph ak oyai kiit age tugul ne kamwaiwok.”

⁵⁶ Ye kingo yom rubonooto emet komugul, koyaat anyun Joseph chogenik tugul, ak koaldochi Misiriik, ak kieet rubonooto miising' eng' emetap Misiri.

⁵⁷ Ki pwa anyun emotinwek tugul kap Joseph eng' Misiri kobwa koal peek; amu kieet rubonooto eng' ng'wony komugul.