TAUNET 39 - BUKUIT NE TILIIL Sireet ne Dutero Kanon

Komi Joseph kootap Potipar

¹ Ki kimut Joseph anyun kochoortagei kwo Misiri, ak ki al ineendet Potipar kiboityotap Pharaoh, kiptaiyatap riibiik, Misirindet, eng' eunegap Ismaelik, che ki imuti ineendet kwo olooto.

² Ki mi Kamuktaindet ne Toroor kobooto Joseph, ak ki ek chiito ne iberuurot, komi kootap kiptaiyandennyi Misirindet.

³ Ki keer kiptaiyandennyi kole, mi Kamuktaindet ne Toroor kobooto ineendet ak ki iberuur Kamuktaindet ne Toroor tuguuk tugul che kiyaei.

⁴ Ki chamak anyun Joseph eng' ineendet, ak kiboisyechin ineendet. Ki inde `Potipar ineendet koek riibindetap poisyennyi, ak ki inde tuguukyik tugul eunekyik.

⁵ Ki iberuur `Kamuktaindet ne Toroor kootap Misirindet amu Joseph kobooch ye kingo Poi koonnyi ak tuguuk tugul che po misirindonooto, ak ki tebee perurtap Kamuktaindet ne Toroor tuguuk tugul che ki tinyei eng' koonnyi ak eng' mbareenikyik.

⁶ Ki pagaakyi tuguuk tugul che ki tinyei eunegap Joseph, ak ki ma kota kongen tuguukyik, kobatee amitwogik che ki amei. Ki chiito ne karaaran kot Joseph eng' poortanyi.

⁷ Ak ye kingo pata tuguuchuuto, kogeer `kwondap kiptaiyandennyi Joseph, ak koleenji, “Ngeruiye tuwai.”

⁸ Ago ki eesyo ak koleenji kwondap kiptaiyandennyi, “Keero, ma naei kiptaiyandennyu agot tuguukyik che ariibe eng' koonnyi, ak ki konde eunekyuk tugul che tinyei.

⁹ Ma mi age agoi ne oo ne siira; ama mi kiy ne etena kobatenen inyee, amu ii kwondonyi. Amuktoi ano anyun ayai tengegi tee ni, ak achalwogenji Kamuktaindet?”

¹⁰ Agot nganda ki cham kong'alaaljin `kwonyooto Joseph peetuut age tugul, ago ki ma cham kogasyi koruiyo tuwai, anan kotebi icheegei.

¹¹ Ago ki wo anyun Joseph eng' peetuut age koyai poisyennyi eng' ko, ak ki ma komi mureno age ne po koyooto kobooto ineendet eng' ko.

¹² Ki nam anyun ngoryennyi, ak koleenji, “Ngeruiye tuwai!” Ago ki metoochi Joseph ngoryennyi eutap kwonyooto, ak komwei komanda saang'.

¹³ Ye kingo keer kwonyooto kole, kagometoochi ngoryeet eunnyi ak komwei,

¹⁴ koguur anyun murenik che po koonnyi, ak kong'alaalji koleenji, “Ogeero, ki komutwech ineendet Hebranindet kochotech! Kanyo ole ami kole keruiye tuwai, ak kaawaach.

¹⁵ Ye ka ngo kas ineendet awaach eng' kutit ne oo, kometoiywa ngoryennyi ak komwei, komanda saang'.”

¹⁶ Kigonor ngoryonooto kwonyooto agoi koit kaa kiptaiyatap Joseph,

¹⁷ ak ye kingo it komwachi ng'aleechooto, koleenji, “Konyoonjo kochota otwogindet Hebranindet ne ki imutwech,

¹⁸ ago ye kinga waach eng' kutit ne oo, kometoiywa ngoryennyi ak komwei kwo saang'.”

¹⁹ Ye kingo kas kiptaiyandennyi ng'aleegap kwondonyi, che ki mwachi koleenji, “Ki yaiywo ko uu ni otwogindeng'ung',” kong'waneegitu nereegekyik.

²⁰ Ak ki nam Joseph `kiptaiyandennyi ak kotoorchi korgoreet, ole ki kiratyin kimonjororinigap laitoryat, ak ki tebee korgoronooto.

²¹ Ago ki mi Kamuktaindet ne Toroor kobooto Joseph, ak ki riiregei ineendet ak ki igoochi konyoor chameet eng' pounindetap korgoreet.

²² Ki igoochi pounindetap korgoreet Joseph koboi kimonjororinik tugul che ki mi korgoreet, ak tuguuk tugul che ki kiyaei eng' olooto, ko ineendet ne kiyaei.

²³ Ki ma kota koriibei pounindetap korgoreet kiy age tugul ne kinamu Joseph, amu ki mi Kamuktaindet ne Toroor kobooto ineendet, ak ki iberuur Kamuktaindet ne Toroor kiy age tugul ne ki yaei Joseph.