TAUNET 38 - BUKUIT NE TILIIL Sireet ne Dutero Kanon

Judah ak Tamar

¹ Ki choortagei anyun Judah eng' peetuusyechooto, kwo eng' ole mi tupchosyekyik, agoi ye mi Adulamindet age ne keguure kainennyi Hira.

² Ki keer Judah eng' olooto cheptap kanaanindet age ne kiguure kainennyi Sua. Ki itun ak ki ituiyogei ak ineendet.

³ Ki manach ak ki sich weeriit; ak kiguure kainennyi Er.

⁴ Ki manach kogeny, kosich weeriit ak kiguure kainennyi Onan.

⁵ Ki sich weeriit kogeny, ak kiguure kainennyi Shelah. Ki mi `Judah Kezib ye ki ngesichei nooto.

⁶ Ki itunji Judah Er weeriinnyi ne po tai, kwondo, ne ki kiguure kainennyi Tamar.

⁷ Ago ki chii ne sogoran Er eng' taitap Kamuktaindet ne Toroor, ineendet taita ne po Judah, ak ki par `Kamuktaindet ne Toroor ineendet.

⁸ Yeityo koleenji `Judah Onan, “Myee otuiyegei ak kwondap ng'eetap komet, iichi, ilal maatap ng'eetap komet.”

⁹ Ago kingo nai Onan kole, ma kimuuchi ki ityi ineendet lagochooto keele kobunji, ko ye kingo tuiyogei ak kwondap ng'eetap kamet, kotumji kesweegap sigisyo ng'wony, si ma ilaalji maat ng'eetap kamet.

¹⁰ Ago kiyait kioto ki yai eng' taitap Kamuktaindet ne Toroor, ak ki par ineendet agine.

¹¹ Yeityo koleenji anyun `Judah Tamar kwondap weeriinnyi, “Tebee kootap kwandang'ung', ko ii kwony ne ki kosiirtoe manong'otyot, kot koeet Shelah weeriinnyu” amu ki le, si ma me agine ko uu weeriichun tupcho. Ki wo Tamar anyun kotebee kootap kwandanyi.

¹² Kingo siirto peetuusyek alage kome cheptap Sua, kwondap Judah; ak ki kigaigai Judah, ak ki wo ole miitei piik che tilei koroorigap keechiirekyik eng' Timnah, ineendet kobooto chorwennyi Hira Adulamindet.

¹³ Ki kimwachi Tamar keleenji, “Keero, wendi Timnah kwandap manong'otyot king'ung', wendi kotilei koroorigap keechiirekyik.”

¹⁴ Ki ireek anyun ngoroikyik che po mosoknateet, ak ki ilaach ngoryeet ne kooi, kotugegei, ak kotaegei ngoryonooto, ak ki tebee ormariichetap nganaseet ne kiguure Enaim, ne mi ooreet ne wendi Timnah. Ki keer kole ki koeet Shelah, ak ma kigoochi ineendet kotun.

¹⁵ Ye kingo keer Judah ineendet, koleen abeere chepkugonio, amu ki katuch togeennyi.

¹⁶ Ki wo ole mi eng' ooreet taban ak koleenji, “Kaigai icham kituiyegei,” amu ki ma nai kole ineendet ko kwondo ki po weeriinnyi. Ki leenji, “Igoono nee, si kobiit inyoonjo?”

¹⁷ Ki le, “Ayoogun aarwetap ng'oroor ne punu akweet.” Ak ki le, “Igono nee koek kayosyeng'ung' agoi iyoogu kegetwo?”

¹⁸ Ki le Judah, “Nee kayasyoet ne agoonin?” Ki wolji koleenji, “Ng'okseng'ung' ak rogoet ak kiroktong'ung' no iting'e eung'ung'.” Ki igoochi tuguuchooto ak kotuiyogei anyun ak kimanage Tamar ineendet.

¹⁹ Yeityo kong'eet kwo, ak koreek ngoryennyi ne kooi, ak kolaach ngoroikyik che po mosoknateet.

²⁰ Ye ki iyookto Judah aarwetap ng'oroor koyooktoe eutap chorwennyi Adulamindet, si kobiit koweekyi mosoganooto tuguugap kayosyennyi, ago ki ma nyoor chiichooto ineendet.

²¹ Ki teebe anyun Adulamindonooto murenigap olooto, koleenji, “Mi ano chepkugoniot ne ki mi ooreet taban eng' Enaim?” Kowolji icheek koleenji, “Ki ma komi chepkugonio oli kobooch keny.”

²² Ki weektagei anyun kwo ole mi Judah ak koleenji, “Ma anyooru ineendet, ak ki le murenigap olooto ak icheek, Ki ma komi chepkugonio olito kobooch keny.”

²³ Ki le Judah, “Ingobunji ineendet, si ma kiteweerech; keero, kaayooktaenen arwani, ago ma inyooru.”

²⁴ Kingo pata peetuusyek che neegit arawek somok, kemwachi Judah keleenji, “Ki koek chepkugonio Tamar kwondap weeriit king'ung'; kot ko nguno, kotinyei moet ne po ibeetapkei.” Ak ki le Judah, “Omutu kebeel.”

²⁵ Ye kingo kagimut koyookto kemwachi kwandap manong'otyondennyi keleenji, kole Tamar, “Ki amanage chiitap ko po tuguuchu atinye.” Ak kamwa kole, “Inyit tuguuchu kaigai si inai chiitap ko po: ng'ookset, rogoet ak kirokto.”

²⁶ Ki inyit anyun, ak kole, “Po iman kwonyi kosiiro; amu ma agoochi ineendet Shelah weeriinnyu.” Ak ki mata kotuiyogei ak ineendet kogeny.

²⁷ Ye kingo it peetuutap sigisyet, ogeero, ki mi sarameek moennyi.

²⁸ Ye kisigisyei, komoong' lakweet age euut, ak ki ratyi chebyosetap sigisyo eunooto porowet ne piriir, ak kole, “Kagondoi niito.”

²⁹ Ago ye kingo ketita eunnyi, kesich ng'eetap kamet. Ak ki le chebyosetap sigisyo, “Amu nee si imong'u eng' kimnateet inyegei?” Ki kiguure anyun kainennyi Peres amu nooto.

³⁰ Ye kingo pata kesich ng'eetap kamet ne tinyei porowet ne piriir eng' euut, ak ki kiguure kainennyi Zerah.