TAUNET 36 - BUKUIT NE TILIIL Sireet ne Dutero Kanon

Piigap ooreetap Esau

¹ Chu ko ortinwegap Esau (nooto ko Edom).

² Ki itun Esau tiibiigap Kanaan: Adah cheptap Elon Hitindet, Oholibamah cheptap Anah ne ki cheptap Sibeon Hibindet,

³ ak Basemath cheptap Ishmael, chepkametap Nebaiot.

⁴ Ki sikyi Adah Esau Eliphas, ak ki sich `Basemath Reuel.

⁵ Ki sich `Oholibamah Jeush, Jalam, ak Kora. Chooto ko weeriigap Esau, che kisichei eng' emetap Kanaan.

⁶ Ki imut `Esau kwonyiikyik, weeriikyik, tiibiikyik ak piik tugul che po koonnyi, tuukyik, akwotisyekyik tugul ak tuguukyik tugul, che kiga koyumjigei eng' emetap Kanaan ak kiu kwo emet age kolooit eng' ng'eetap kamet Jakobo.

⁷ Amu ki chaang' tuguukwak miising' kot koma imuuch komeng'jin tuwai. Ki ma koyamei icheek tuwai emet ne kibunoti amu akwotisyekwak.

⁸ Ki meny anyun Esau tulweetap Seir; Esau ko Edom.

⁹ Chu ko ortinwegap Esau, kwandap Edomik eng' tulweetap Seir.

¹⁰ Chu ko kainaigap weeriigap Esau: Eliphas weeriitap Adah kwondap Esau, Reuel weeriitap Basemath, kwondap Esau.

¹¹ Weeriigap Eliphas ko ki Teman, Omar, Sepo, Gatam ak Kenas.

¹² Timna ko ki chebaigeiyatap Eliphas weeriitap Esau, ak ki sikyi Eliphas Amelek. Chuuto ko weeriigap Adah ne po Esau.

¹³ Chu ko weeriigap Reuel: Nahath, Zerah, Shammah ak Missah. Chooto ko ki weeriigap Basemath ne po Esau.

¹⁴ Chu ko ki weeriigap Oholibamah kwondap Esau, cheptap Anah, ne ki cheptap Sibeon: Jeush, Jalam, ak Kora.

¹⁵ Chuuto ko kirwoogigap weeriigap Esau. Weeriigap Eliphas, ne oo ne po Esau: kirwoogindet Teman, kirwoogindet Omar, kirwoogindet Sepo, kirwoogindet Kenas,

¹⁶ kirwoogindet Kora, kirwoogindet Gatam, ak kirwoogindet Amelek. Chuuto ko kirwoogik che kisichei Eliphas eng' emetap Edom, chuuto ko weeriigap Adah.

¹⁷ Chu ko weeriigap Reuel weeriitap Esau: kirwoogindet Nahath, kirwoogindet Zerah, kirwoogindet Shammah, ak kirwoogindet Missah. Chuuto ko kirwoogik che kisichei Reuel eng' emetap Edom, chuuto ko weeriigap Basemath kwondap Esau.

¹⁸ Chu ko weeriigap Oholibamah kwondap Esau: kirwoogindet Jeush, kirwoogindet Jalam, ak kirwoogindet Kora. Chuuto ko kirwoogik che kisichei Oholibamah, kwondap Esau cheptap Anah.

¹⁹ Chuuto ko weeriigap Esau, ineendet ko Edom, ak chuuto ko kirwoogikwak.

²⁰ Chu ko weeriigap Seir Horindet, che ki menyei emonooto: Lotan, Shobal, Sibeon, Anah,

²¹ Dishon, Eser ak Dishan; chuuto ko kirwoogik che ki mang'une Horik, piigap Seir eng' emetap Edom.

²² Lagogap Lotan ko ki Hori ak Hemam; ak chepkametap Lotan ko ki Timna.

²³ Chu ko lagogap Shobal: Alban, Manahat, Ebal, Sepo ak Onam.

²⁴ Chu ko lagogap Sibeon: Aja ak Anah; Anah niito ko ne kinyoor kong'igap peek che peelei piich eng' surkwen, ye ki iyagi sigiroigap Sibeon kwandanyi.

²⁵ Chu ko lagogap Anah: Dishon ak Oholibamah cheptap Anah.

²⁶ Chu ko lagogap Dishon: Hemdan, Eshban, Itran ak Keran.

²⁷ Chu ko lagogap Eser: Bilan, Saavan ak Akan.

²⁸ Chu ko lagogap Dishan: Us ak Aran.

²⁹ Chuuto ko kirwoogik che ki mang'une Horik; kirwoogindet Lotan, kirwoogindet Shobal, kirwoogindet Sibeon, kirwoogindet Anah,

³⁰ kirwoogindet Dishon, kirwoogindet Eser, kirwoogindet Dishan; chuuto ko kirwoogik che ki mang'une Horik, ko uu kirwoogikwak eng' emetap Seir.

³¹ Chu laitorinik che ki laitorane emetap Edom, ye ki tomo kobiit laitoryat ne pou piigap Israel.

³² Ki laitorane Edom Bela weeriitap Beor, kainetap nganasennyi ko ki Dinaba.

³³ Ki igeskei Bela, ak ki nam laitornatennyi Jobap weeriitap Zerah ne po Bosra.

³⁴ Kingo keskei Jobap, konam laitornatennyi Husam ne po emetap Temanik.

³⁵ Ak kingo keskei Husam, konam laitornatennyi Hadad weeriitap Bedad, ne ki par Midianik eng' turguitap Moab, ak kainetap nganasennyi ko ki Abit.

³⁶ Ko ye kingo keskei Hadad, konam laitornatennyi Samlah ne po Masreka.

³⁷ Ak kingo keskei Samlah, konam Saulo laitornatennyi ne po Rehoboth nganaseet ne neegitee aineet.

³⁸ Kingo keskei Saulo, konam Baal-hanan weeriitap Akbor laitornatennyi.

³⁹ Ki igeskei Baal-hanan weeriitap Akbor, ak ki nam Hadar laitornatennyi, ak kainetap nganasennyi ko ki Pau; ak kainetap kwondonyi ko ki Mehetabel cheptap Matred, cheptap Me-sahab.

⁴⁰ Chu kainaigap kirwoogik che ki mang'une Esau, ko uu ortinwekwak, ko uu korotinwekwak ak ko uu kainaikwak: kirwoogindet Timna, kirwoogindet Alba, kirwoogindet Jetet,

⁴¹ kirwoogindet Oholibamah, kirwoogindet Elah, kirwoogindet Pinon,

⁴² kirwoogindet Kenas, kirwoogindet Teman, kirwoogindet Mibsar,

⁴³ kirwoogindet Magdiel, kirwoogindet Iram. Chuuto ko kirwoogigap Edom (niito ko Esau kwandap Edomik), ko uu meng'ootennywa eng' emet ne ki nenywa.