TAUNET 34 - BUKUIT NE TILIIL Sireet ne Dutero Kanon

Nyereetap Dina ak yaaktaetap mugetuut

¹ Ki wo anyun Dina cheptap Leah, ne ki sikyi Jakobo kwo kogeer tiibiigap emonooto.

² Kingo keer Shekem, weeriitap Hamor ne po Hibiik, kirwoogindetap emonooto, konam koosup ineendet, konyeeree ak koteweer.

³ Ki cham muguleldanyi Dina cheptap Jakobo ak kong'alaalji ineendet kogaigai.

⁴ Ki ng'alaalji `Shekem kwandanyi Hamor, koleenji, “Weiywo koito chebooto si kobiit atun.”

⁵ Ye Kingo kas anyun Jakobo kole kagonyeere kong'em chiichooto cheptonyi Dina, ko amu ki iyagisyei weeriikyik eng' kewanin, kogisiis agoi koit icheek.

⁶ Ki wo anyun Hamor kwandap Shekem kole kong'alaaljin ak Jakobo agobo nooto.

⁷ Kingo week kaa anyun weeriigap Jakobo kobunu kewanin, kogas agobo ng'aleechooto. Ki kas ng'wanindo murenjoto ak kinereekso kot, amu ki yai Shekem abusnat eng' Israel konyeeree cheptap Jakobo; kiit ne teweernat ne ma kichamei keyai.

⁸ Ago king'alaalji Hamor icheeget, koleenji, “Machei Shekem weeriinnyu cheptong'wong' miising'. Asoomok ale, ogoochi ineendet kotun.

⁹ Myee keegu piik che kigoonegei. Ogoonech tiibiikwok ak otun chechook ak okweek.

¹⁰ Ongemeng'jine, ak mi emoni taing'wong'. Omeng'iisyei ak oyae mung'aaret, ak onyoorchi mogornateet.”

¹¹ Ki leenji `Shekem kwandap Dina ak tupchosyegap Dina, “Myee anyoor chameet eng' taing'wong', ak kiy age tugul ne omwaiwo amuuchi agoonok.

¹² Agoonok kanyiok che tee che omache, ak kagoochinoik, ago ogoono chepto atun.”

¹³ Amu kiga ng'em tupchennywa Dina, kogiwolji eng' ng'aalseet `weeriigap Jakobo Shekem kobooto kwandanyi Hamor,

¹⁴ koleenji, “Ma kimuuchi keyai kiit ne uu niito kigoochi chii ne ma kimuratan tupchennyo, amu egu teweernat nooto eng' acheek.

¹⁵ Kimuuchi kechamyechi ak okweek eng' ng'olyoondoni kityo, ngo cham oigei acheek, keyatita muren age tugul eng' okweek.

¹⁶ Eng' nooto anyun kegoonok tiibiikyok, ak kitun tiibiikwok ak icheek, ak kemeny kobootok ak keegu agenge.

¹⁷ Ago ngot ko mogaseech ak ocham keyatitak, kimuti anyun cheptonyo, ak keebe.”

¹⁸ Ki cham anyun Hamor ak Shekem weeriitap Hamor ng'aleekwak.

¹⁹ Ak ma igagei murenonooto koyai ko uu nooto, amu ki kacham miising' cheptap Jakobo, ak ki kigonyiti ineendet kosiir piik tugul che po kootap kwandanyi.

²⁰ Ki pa anyun Hamor ak weeriinnyi Shekem ormariichetap nganasennywa, ak kong'alaal ak piigap nganasennywa, koleenjigei,

²¹ “Kichamdosi ak pichuuto; eng' nooto anyun, myee komeny emoni, ak koyai mung'aaret eng' olito, amu paraa emoni, yamei icheek. Ongitun tiibiikwak ak kigoochi chechook ak icheek kotun.

²² Ago imuuchi pichooto kocham komeny kobootech, ak keegu agenge, ngot kechamyechi kiit agenge, nooto ko keyatita muren age tugul eng' acheek, ko uu ye yaatitoi icheek.

²³ Tos ma punjinech akwotisyekwak che po neego ak tuguukwak ak tuukwak tugul? Ongecham ng'olyoondoniito kityo, si komeny kobootech.”

²⁴ Ak ki cham ng'aleegap Hamor ak Shekem weeriikyik tugul che kimandae ormariichetap nganasennyi, ak ki kiyatita muren age tugul.

²⁵ Eng' peetuutap somok ye ki myandos, konam age tugul rotwennyi po chok, eng' weerchooto aeng' po Jakobo, Simion ak Lawi, tupchosyegap Dina, koba nganaseet eng' nyiganateet ak kobar murenik tugul.

²⁶ Ki par Hamor ak Shekem weeriinnyi eng' rotwetap chok, ak komut Dina eng' kootap Shekem, koba emennywa.

²⁷ Ki pwa weeriigap Jakobo ole mi piik che kagebar, ak kiluul nganaseet, amu kiga kong'em chepkametinnywa.

²⁸ Kiluul keechiirekwak, tuukwak, sigirokwak, kiy age tugul ne ki mi nganaseet ak tuguuk che ki mi mbareenik.

²⁹ Ki iluul kora tuguukwak tugul, lagokwak, kwonyiikwak ak koip tugul agot che ki mi kooriik.

³⁰ Yeityo koleenji `Jakobo Simion ak Lawi, “Kaoimaa, ak kaogoono aek ne kiwechei eng' piik che menyei emoni, eng' Kanaanik ak Perisik. Acheek kota ko ki ng'ering', ago imuuchi icheek koyumjagei, kobara kowoong'wo kobooto koonnyu.”

³¹ Ago ki le icheek, “Tos kanyoolu koyai tupchennyo koek chepkugonio?”