TAUNET 33 - BUKUIT NE TILIIL Sireet ne Dutero Kanon

Kotuitos Jakobo ak Esau eng' kaalyeet

¹ Kitabendo Jakobo ak kogeer konyonei Esau kobooto piik pogol ang'wan. Kipchei anyun lagok kopchechi Leah ak Rael, ak otwogichooto aeng'.

² Ki chop kondo otwogichooto ak lagokwak, yeityo korup Leah ak lagokyik, kolet eng' tugul Rael ak Joseph.

³ Ki indoe `ineendet icheek, yeityo kong'uruuk agoi ng'wony konyil tisap, agoi koriikyi ng'eetap kamet.

⁴ Ago kilabat Esau kotorookta, ak konam koue euut, kosuup kaatinnyi, kong'utut ak ki riiryo.

⁵ Ye kingo tabendo Esau, kogeer kwonyiik ak lagok, ak kiteebe koleenji, “Ng'oo chu omi tugul?” Ak ki le Jakobo, “Lagok che ki igoochi Kamuktaindet otwogindeng'ung' eng' rireenennyi po kei.”

⁶ Ki riik anyun otwogichooto ak lagokwak, ak kobwa kong'uruukso.

⁷ Kiriik Leah agine ak lagokyik kobwa kong'uruukso; ak kingo pata koriik Joseph ak Rael, ak kong'uruukso ak icheek.

⁸ ki teebee Esau koleenji, “Po nee akwotisyechu tugul kaatuiye?” Koleenji, “Si kobiit anyoor chameet eng' taitap kiptaiyandennyu.”

⁹ Ago ki le Esau, “Atinye che yamo tupchennyu; ingobunjin chooto itinye.”

¹⁰ Koleenji Jakobo, “Achicha, asaain ale, ngo kaanyooru chameet eng' taing'ung', ko myee itaach chu kagoonin eng' eunnyu; amu kaageer togeng'ung', ko uu ye kigeere togeetap Kamuktaindet, ak ageere anyun ale ibaibai eng' anee.

¹¹ Asaain ale, taach inyee che kagoonin che kagigetun; amu ki yaiywo Kamuktaindet ne myee, ak amu atinye che yamo.” Ak ki igaigai kot kocham kokweri.

¹² Ak ki le Esau, “Ongenam panda keebe, si andoenen.”

¹³ Ago ki leenji `Jakobo Esau, “Ingen inyee kiptainandennyu, ile mengeechen lagok, tinyei neego aarek ak kotinyei tuuga moek, ngot kekweri eng' peetuut komugul, komuuch kobek akwotisyek tugul.

¹⁴ Asaain kiptaiyandennyu ale, indoena anee otwogindeng'ung', si aree anee komutyo ko uu pandap akweet ak ne po lagok, agoi aitu ole mi kiptaiyandennyu eng' Seir.”

¹⁵ Koleenji Esau, “Ngabagagun piikyuk alak che mi kobootoo.” Ago ki wol Jakobo kole, “Koyai nee? Ingogaswo kiptaiyandennyu ko uu nooto.”

¹⁶ Ki week anyun Esau peetuunooto eng' pandanyi agoi Seir.

Komeng'iisyei Jakobo eng' Kanaan

¹⁷ Ago ki wo Jakobo agoi Sukoth, kwo koteekyigei koot, ak ki teech kaptugusyek; ki kiguure anyun yooto Sukoth.

¹⁸ Ki it Jakobo anyun eng' kaalyeet nganaseetap Shekem, ne miitei emetap Kanaan, ye ki punu Padan-aram; ak kwo koteech emainnyi ole tokyingei nganaseet.

¹⁹ Ak ki al kooret eng' piigap Hamor, kwandap Shekem, eng' silingisyek pogol agenge, ole kigateech emainnyi.

²⁰ Ki teech kaptisisyet eng' olooto, ak koguure kaptisisyonooto El-eloe-Israel.