TAUNET 28 - BUKUIT NE TILIIL Sireet ne Dutero Kanon

Kotigoni `Isak Jakobo

¹ Ki kuur anyun `Isak Jakobo konyo koberuur ineendet ak kotigon koleenji, “Ametun cheptap Kanaan.

² Ng'eet ak iwe Padan-aram, kootap Bethuel kwandap iyong'ung', iwe itun chepto eng' tiibiigap Laban ne tupcho ak komet.

³ Ingoberuurin Kamuktaindet Ne po Kamuktaet, ak koberuurin eng' iyoteet ak kobarain, si kobiit iegu tuiyetap piik che chaang'.

⁴ Ingogoonin perurto ne po Abraham, inyee ak lagoguk, si kobunjiin emoni iwendote ko ii kiprutoiyot, ne ki igoochi `Kamuktaindet Abraham”

⁵ Ki iyookto anyun `Isak Jakobo kwo, ak ki wo anyun agoi Padan-aram kap Laban, weeriitap Bethuel Syriaindet, ng'eetap kametap Rebeka, kametap Jakobo ak Esau.

⁶ Ki keer anyun Esau kole, ki koberuur `Isak Jakobo ak koyookto kwo Padan-aram, kwo kotunis eng' oliindo, ak kingo peruri kotigoni koleenjin, “Ametun cheptap Kanaan,”

⁷ ak ki keer kole kogas iit `Jakobo kwandanyi ak kamennyi, ak kakwo Padan-aram.

⁸ Ye kingo keer Esau kole, ma iboiboi kwandanyi Isak tiibiigap Kanaan,

⁹ kwo anyun Esau kap Ishmael, kotun Maalat cheptap Ishmael weeriitap Abraham, cheptap kametap Nebaiot koek kwondo age kosyone chuun.

Karwotitoetap Jakobo eng' Bethel

¹⁰ Ki wo Jakobo anyun eng' Beer-sheba, kotokyigei Haran.

¹¹ Ye kingo it komosta age, koru yooto kemounooto, amu kiga kororokto asiista. Ki nam koitap olooto kotiie met, ak koru konuuch.

¹² Ak ki keer eng' karwotitoet lang'eiywot ne kagitonoon eng' ng'wony, ne itei kipsengwet. Ak ogeero, malaikaisyek che po Kamuktaindet che kitogostae ak kochoorunegei.

¹³ Ki tonon Kamuktaindet ne Toroor eng' ye neegitee ineendet ak kole, “Aa Kamuktaindet ne Toroor, Kamuktaindet ne po kwandang'ung' Abraham ak Kamuktaindetap Isak. Agoonin emoni imi, kobooto lagoguk.

¹⁴ Tuun tenitu lagoguk temburyegap ng'wony, ak iyomu cherongo ak kong'asiis, murot kaataam ak murot tai. Kiberuuri ortinwek tugul che po ng'wony eng' inyee ak eng' lagoguk.

¹⁵ Keero, ami kobooten, ak ariibootin eng' oldo tugul ole iwendi, ak tuun amutun inyoo emoni kogeny. Amu ma metoin agoi tuun ayai tugul che kaamwaun.”

¹⁶ Ki kos anyun Jakobo eng' rwondo ak kole, “Mi Kamuktaindet ne Toroor olito iman, ago koma anai.”

¹⁷ Ki iyweis ak kole, “Myee ne tya olito! Ni ko kootap Kamuktaindet iman, ak ko kurgeetap kipsengwet.”

¹⁸ Ki ng'eet anyun Jakobo karon miising', ak konam koita ne koga tiye metit, ak kolumda koek toloita, yeityo koroong'ji mwaita paragunnyi.

¹⁹ Kitoochi yooto kainet koguure Bethel, ago ki kiguure nganasanooto eng' tai Luz.

²⁰ Yeityo koyasyo Jakobo kole, “Ngot kotep Kamuktaindet kobooto ak koriibota eng' orani abune, kogoono amitwogik aam ak ngoroik che alaachi,

²¹ agoi tuun aweekyigei kootap abba eng' kaalyeet, koek anyun Kamuktaindet ne Toroor, Kamuktaindennyu,

²² ak koek kooi, ne kalumde koek toloita, kootap Kamuktaindet; ak eng' tuguuk tugul che igoono, agoonin ne matiny kebebertap taman.”