TAUNET 27 - BUKUIT NE TILIIL Sireet ne Dutero Kanon

Koberuuri `Isak Jakobo

¹ Ye kingo kagoosit Isak, ak kiga kogoryo konyekyik kot koma kogeerei kiy, kogiguur Esau weeriinnyi ne oo, ak koleenji, “Weeriinnyu.” Ak ki wol kole, “Ami yu.”

² Koleenji, “Keero, kaaositu, amangen peetuut ne amee.

³ Kaigai, inam anyun nguno kariguk, motyeng'ung' ak kwangeng'ung', ak iwe kewaniin, iibwa pendap logeet,

⁴ ak inyoo ichobwo koanyinyitu ko uu ye achame, yeityo iibwa aam, si koberuurin muguleldanyu kotom amei.”

⁵ Ki kasei anyun Rebeka ye ki ng'alaaljin `Isak weeriinnyi Esau. Ye kingwo Esau logeet kewaniin kocheeng'ji kwandanyi pendap logeet,

⁶ kong'alaalsechi `Rebeka weeriinnyi Jakobo, koleenji, “Keero, kaagas kong'alaaldos kwandang'ung' ak ng'eetap kamenng'ung' Esau, koleenjin,

⁷ ‘Ibwa pendap logeet, ak inyoo ichobwo koanyinyitu, si aam, ak aberuurin eng' taitap Kamuktaindet ne Toroor kotom amei.’

⁸ Nooto anyun weeriinnyu, kasa iit, ko uu ye ang'atiin.

⁹ Ui nguno ole mi akweet, igetwo aarek aeng' che myachen che po ng'oroor, si ichopchi kwandang'ung' koanyinyitu, ko uu ye chamei.

¹⁰ Si iipchi ineendet, koam, si koberuurin kotom kome.”

¹¹ Ago ki leenji `Jakobo kamennyi Rebeka, “Keero, sabul Esau tupchennyu, ago tiliil poortanyu.

¹² Abeere imuuchi kosapsaba abba, ak aegu kaberberindet eng' ineendet ak aipchigei ng'oogisto ama perurto.”

¹³ Koleenji kamet, “Ingobunjo ng'oogistong'ung', weeriinnyu. Kasa iit kityo, ak iwe igetwo.”

¹⁴ Ki wo anyun ak kogetyi kamet, ne ki chop koanyinyitu, ko uu ye chamei kwandanyi.

¹⁵ Yeityo konam Rebeka ngoroik che korooron che po Esau weeriinnyi ne oo, che ki tinyei eng' ko, ak kolaakyi Jakobo weeriinnyi ne ming'in.

¹⁶ Ak ki ilokyi eunekyik ak kaatinnyi ole-tiliil, magatok che po aaregap ng'oroor.

¹⁷ Ki indochi Jakobo weeriinnyi eunnyi panyechooto anyiny che kiga kochop ak magatyat.

¹⁸ Ki wo anyun ole ki mi kwandanyi, ak koleenji, “Abba!” Kowolji kole, “Ami yu, ago ii ng'oo, weeri?”

¹⁹ Ki leenji `Jakobo kwandanyi, “Aa Esau weeriing'ung' ne po tai. Kaayai ko uu ye kagemwaiwo. Kaigai ng'eet, tebi ng'wony, am amitwogikyuk che po logeet, si kobiit iberuuro.”

²⁰ koteebee `Isak weeriinnyi koleenji, “Nee ni kesip inyooru-o weeriinnyu?” Kowol kole, “Nooto ne kaonwo Kamuktaindet ne Toroor, Kamuktaindeng'ung'.”

²¹ Ki leenji `Isak Jakobo, “Kaigai, nyoo riigu, si asapsabin, weeriinnyu, anai ngo ii weeriinnyu Esau anan ngo ma ii ineendet.”

²² Kiriikyi anyun `Jakobo kwandanyi Isak, ak kosapsap ineendet, yeityo kole, “Tuugeet ko po Jakobo ago eunek ko po Esau.”

²³ Ki ma inyit ineendet, amu ki sabuuleen eunekyik, ko uu eunegap ng'eetap kamet Esau. Koberuur anyun ineendet.

²⁴ koteebee koleenji, “Ii weeriinnyu Esau iman?” Kowol kole, “Aa ineendet.”

²⁵ Koleenji, “Ibwo koriik anyun, si aam pendo ne kaibwo weeriinnyu, si aberuurin.” Ki ipchi anyun koriik, ak ki am, yeityo koipchi divaik, ak kiee.

²⁶ Ak ki leenji `kwandanyi Isak, “Nyoo yu neegit anyun, weeriinnyu, si itoroocha.”

²⁷ Ki wo anyun koriikta, ak kotorooch. Ak king'uchi siiptap ngoroikyik, ak ki iberuur ineendet kole, “Keero, kergei siiptap weeriinnyu ak ng'uunetap emet ne ki iberuur Kamuktaindet ne Toroor.

²⁸ Ingogoonin Kamuktaindet rewootap kipsengwet, ak akwaiyetap ng'wony, ak chaang'indap peek ak divaik.

²⁹ Ingootin pororyosyek, ak ingong'uruukyin pororyosyek. Egu kiptaiyat eng' tupchosyeguk, ak ingong'uruukyin weeriigap kamenng'ung'. Chuboot ineendet ne chubin, ak iberuurot ineendet ne iberuurin!”

³⁰ Kingo kagogees Isak kaberuret ne ki iberuuri Jakobo, eng' yooto ko kata kwo Jakobo eng' ye mi kwandanyi, koit ng'eetap kamet Esau kobunu logeet.

³¹ Ki chop agine amitwogik che anyinyen, ak koipchi kwandanyi. Ak ki leenji kwandanyi, “Ingong'eet anyun abba, si koam pendo ne kaipchin weeriinnyi, si ko peruro.”

³² koteebee anyun kwandanyi Isak koleenji, “Ii ng'oo inyee?” Kowol kole, “Aa weeriing'ung' ne oo, Esau.”

³³ Ki potan Isak miising' kot, ak kole, “Ka ng'oo anyun ne kawo logeet ak koibwa, ak kaam kotomo iitu, ak kaaberuur ineendet? Ee, ak koberuurot ineendet.”

³⁴ Ye kingo kas Esau ng'aleegap kwan, kowaach eng' waagaat ne oo ak eng' ng'wanindo, ak koleenji kwandanyi, “Iberuuro agane, ee, abba!”

³⁵ Koleenji, “Kanyo ng'eetap kamenng'ung' eng' ng'aalseet, nyoo korep perurtang'ung'.”

³⁶ Kole Esau, “Tos ki ma kitoochi kainennyi Jakobo komyee? Kagotila let konyil aeng'. Ki rebena imandap etunatetap sigennyu, ak keero, kagorebena nguno perurtanyu.” Kole, “Tos ma itukwa perurto?”

³⁷ Kowolji `Isak Esau koleenji, “Kaayai ineendet koek kiptaiyandeng'ung', kaagoochi tupchosyekyik tugul koek otwogikyik ak kaagimiit ineendet eng' peek ak divaik. Ara, tos ta ayaun nee anyun oo weeriinnyu?”

³⁸ Koleenji `Esau kwandanyi, “Tos itinye perurto agenge kityo, abba? Iberuuro agenge, ee, abba.” Ki waach anyun Esau ak koriir miising'.

³⁹ Ki wolji `Isak kwandanyi ineendet koleenji, “Keero, looitu meng'ooteng'ung' eng' akwaiyetap ng'wony, ak eng' rewootap kipsengwet ne punu parak.

⁴⁰ Isabe rotweng'ung' po chok, ak iote ng'eetap kamenng'ung'. Ye ityagage, ilelekte pounatennyi koistoegei kaating'ung'.”

⁴¹ Kiwech Esau anyun Jakobo amu perurto ne ki iberuur kwandanyi, ak ki le Esau eng' muguleldanyi, “Kagoriik peetuusyek che keriirchin abba; ye ibata abar tupchennyu Jakobo.”

⁴² Ye ki ngemwachi Rebeka ng'aleegap Esau weeriinnyi ne oo, koyookto keguur Jakobo weeriinnyi ne ming'in, ak koleenji ineendet, “Keero, igoigoegei Esau ng'eetap kamenng'ung', kobwaatin kole, tuun kobarin.

⁴³ Eng' nooto anyun weeriinnyu, kas ng'olyoondennyu; ng'eet, mwechi kap Laban weeriit ne kitupche ne menyei Haran,

⁴⁴ ak iwe otebi ak ineendet eng' olooto, peetuusyek che ng'ering' agoi kogeskei nereegek che ng'woneen che po ng'eetap komet.

⁴⁵ Ye igeskei nereegegap ng'eetap komet eng' inyee ak koutye kiit ne ki iyachi ineendet, ayoogu chii nyo koguurin eng' olooto. Amu nee si obegunena okweek tuwai eng' peetuut agenge?”

⁴⁶ Koleenji anyun `Rebeka Isak, “Ageere kaimetapkei peetuusyechu amu tiibiigap Het. Ngot kotun Jakobo chepto eng' tiibiigap Het che uu tipchu po emoni, kotilei nee saboondanyu?”