TAUNET 26 - BUKUIT NE TILIIL Sireet ne Dutero Kanon

Isak eng' Gerar

¹ Ki piit anyun rubeet eng' emonooto ne teer eng' rubeet ne ki po tai, ne ki mi eng' peetuusyegap Abraham. Ak ki wo Isak kap Abimelek, laitoryatap Philistiik, agoi Gerar.

² Yeityo komong'ji `Kamuktaindet ne Toroor ineendet ak koleenji, “Amerekte iwe Misiri; tebee emet neta aboorun.

³ Egu toondet eng' emoni, ami kobooten, ak aberuurin; amu agoonin inyee, kobooto lagoguk, emotinwechuuto tugul, ak agimiit kayasyoet ne ki ayasyechi kwandang'ung' Abraham.

⁴ Abaroi iyoteng'ung' ko uu kecheik che po kipsengwet, ak agoochini iyoteng'ung' emotinwechu tugul. Ak kiberuuri pororyosyek tugul che po ng'wony eng' iyoteng'ung';

⁵ amu ki kas iit kutinnyu Abraham, ak ki nam katigonutikyuk ak koriip karureiywekyuk, etanutikyuk ak ng'atuutikyuk.”

⁶ Ki meny anyun Isak Gerar.

⁷ Ye kingo teebee piigap olooto agobo kwondonyi, kowol kole, “Ineendet ko chepkamennyu,” amu ki iywei komwa kole, “Osotyondennyu,” amu kileen, “Si ma para piigap emoni agobo Rebeka,” amu ki karaaran kwonyooto.

⁸ Ye kingo kagotebee olooto peetuusyek che chaang', koititoe Abimelek, laitoryatap Philistiik, tirisyet, kogeer kole, koboiboegei Isak ak Rebeka kwondonyi.

⁹ Ki kuur anyun `Abimelek Isak, nyo koleenji, “Osotyondeng'ung' ni iman. Kilya si imwa ile, ‘Ineendet ko chepkamennyu?’ ” Ak ki leenji `Isak ineendet, “Ki amwae ko uu nooto ale, si ma mei agobo ineendet.”

¹⁰ Koleenji Abimelek, “Nee ni koiyaiywech? Koteibwech kaimut, amu ko nyumnyum koruiyo chii ak kwondong'ung'.”

¹¹ Ki ng'at anyun `Abimelek piik tugul koleenji, “Kibarei chii age tugul ne twaei chiichi anan ko kwondonyi.”

¹² Ki koolso Isak eng' emonooto ak kinyoor eng' kenyinooto konyil pogol. Ki iberuur `Kamuktaindet ne Toroor ineendet,

¹³ ak ki ek mogoryo chiito, ak ki testai koeet mogornatennyi, agoi koeet kot.

¹⁴ Ki tinyei akwotisyek che po keechiirek ak che po tuuga, ak piik che chaang' che po koonnyi, kot koam ng'etkong' Philistiik amu ineendet.

¹⁵ Ki ker anyun ak kotime ng'ung'unyek Philistiik peek che po keriingonik tugul, che kiga kobal otwogik eng' peetuusyegap kwandanyi Abraham.

¹⁶ Yeityo koleenji anyun `Abimelek Isak, “Istoeneigei; amu ki ieetu ak igimitu, isiirech.”

¹⁷ Ki wo Isak eng' olooto, kwo koteech emaisyekyik eng' atebweetap Gerar, ak komeny olooto.

¹⁸ Ki pal Isak kogeny keriingonigap peek che kiga kebal eng' peetuusyegap kwandanyi Abraham; amu kiga kotiim Philistiik ye kingo kagome Abraham. Ak kiguure kainaik che kiga kotoochi kwandanyi.

¹⁹ Ago ye kingo pal otwogigap Isak atebweet, konyoor keriingetap peek che kuutu,

²⁰ kiboryo mestowegap Gerar ak che po Isak, koleen, “Chechook peechu.” Kiguure keriingonooto po peek Esek, amu ki cham komoitos.

²¹ Ye kingo pal keriingetap peek age, kotiyechi nooto agine, ak kiguure nooto Sitna.

²² Ak kiu eng' olooto, yeityo kwo kobal keriinget age, ak ki ma tiyechi nooto. Ki kuure anyun nooto Rehoboth, ki le, “Kagobaroiywech Kamuktaindet ne Toroor emet nguno, si keichi emoniito.”

²³ Ki wo eng' olooto kotogosta agoi Beer-sheba.

²⁴ Ak ki mong'ji Kamuktaindet ne Toroor kemounooto ak koleenji, “Aa Kamuktaindet ne po kwandang'ung' Abraham. Meiywei amu ami kobooten, aberuurin ak abaroi iyoteng'ung' amu otwogindennyu Abraham.”

²⁵ Ki teech anyun kaptisisyet eng' olooto ak koguur kainetap Kamuktaindet ne Toroor. Ki teech emainnyi eng' olooto, ak ki pal otwogikyik keriingetap peek.

²⁶ Ki pa kap Isak `Abimelek kobunei Gerar kobooto chorwennyi Ausat, ak Pikol kiptaiyatap lugeennyi.

²⁷ ki teebee Isak koleenji, “Kobwanjo amu nee, ak owecha, ak ki oonwa eng' oling'wong'?”

²⁸ Ki leenji icheek, “Ki kigeer komyee keele, mi Kamuktaindet ne Toroor kobooten. Ak ki kile, ingobiit kayasyoet eng' kwenunnyoo, acheek ak inyee, ak kiyomiskei

²⁹ keele si meyaiywech kiy ne ya, ko uu ye ki ma kitwain, ak ko uu ye ki kiyaun ne myee kityo, ak ki kiuten eng' kaalyeet. Nguno anyun ko ii ne iberuurot eng' Kamuktaindet ne Toroor.”

³⁰ Ki yachi anyun igoorto, ak ki amis ak koeeiso.

³¹ Ki ng'eetyo karon miising' koyasyechigei. Yeityo kounda `Isak icheek ak ki pa eng' kaalyeet.

³² Eng' peetuunooto anyun, kobwa otwogigap Isak, kobwa komwachi agobo keriingetap peek ne kiga kobal, koleenji, “Kagenyooru peek”

³³ Ak kiguure keriingonooto Siba; nooto anyun, kiguure kainetap nganasanooto Beer-sheba agoi ra.

³⁴ Kingo po Esau kenyiisyek artam kotun Judit cheptap Beri chiitap pororyetap Hittite, ak Basemath cheptap Elon ne agine kora kosalu pororyetap Hittite.

³⁵ Ki iimgei anyun Isak ak Rebeka miising' agobo tiipchooto.