TAUNET 24 - BUKUIT NE TILIIL Sireet ne Dutero Kanon

Isak ak Rebeka

¹ Kiga koosit Abraham; ki neegit kwo kalilot, ak kiga koberuur `Kamuktaindet Abraham eng' tuguuk tugul.

² Ak ki leenji `Abraham otwogindennyi, ne oo ne po koonnyi, ne ki pou tuguukyik tugul, “Kaigai inde eung'ung' kubestanyu,

³ amache iyasye eng' Kamuktaindet ne Toroor, Kamuktaindet ne po kipsengwet ak ng'wony, ale ametunji weeriinnyu chepto ne po Kanaanik che amenye kwenunnywa.

⁴ Ui agoi emennyu, kaptilyonutikyuk, si imutyi kwondo weeriinnyu Isak.”

⁵ Koleenji `otwogindet ineendet, “Imuuch ko meyan chebooto kosubwo agoi emoni. Ara, tos nyolu amut weeriing'ung' emonooto ki ibunu?”

⁶ Koleenji Abraham, “Riipkei, amemut weeriinnyu kwo olooto.

⁷ Kamuktaindet ne Toroor, Kamuktaindet ne po kipsengwet, ineendet ne ki imoong'wa eng' kootap abba ak eng' emet ne ki kisikyino, ineendet ne ki ng'alaalwo ak koyasyeiwo, kole, ‘Agoochini lagoguk emoni’; ko iyooktoi `ineendet malaikaiyandennyi kondoun, si imutyi weeriinnyu kwondo eng' oliindo.

⁸ Ak ngot koma cham chebooto kosubun, ityagage anyun eng' kayasyoninyu. Agot nga no, ko memut weeriinnyu oliindo.”

⁹ Konde anyun otwogindet eunnyi kubestap Abraham kiptaiyandennyi, ak koyasyechi ineendet agobo nooto.

¹⁰ Ki kwei anyun otwogindonooto tambeesik taman che po kiptaiyandennyi ak kwo, koibei tuguuk tugul che myachen che po kiptaiyandennyi. Ki ng'eet ak kwo agoi Mesopotamia, agoi nganaseetap Nahor.

¹¹ Ki chop tambeesik kogutung'so eng' saang' ne po nganaseet ole ki neegitee keriingetap peek; ki saisyegap koskoleny ye pendi kobogorisyek kosiile peek.

¹² Ak ki le, “Ee Kamuktaindet ne po Toroornatet, ne po kiptaiyandennyu Abraham, asaain ale iberuuro rani ak iyachi ne myee Abraham kiptaiyandennyu.

¹³ Keero, atononi eng' yu mi kondap peek, ole inyoo kosiile peek tiibiigap piigap nganaseet;

¹⁴ si ngot kocham chepto ne asoome aleenjini, ‘Ituu tereeng'ung' aee peek,’ ak kowolwo koleenjo, ‘Nganagin iee, ak asiilji tambeesiguk agicheek’ ko ingoek nooto chepto ne ki ilewenji otwogindeng'ung' Isak. Eng' yooto anai ale, kaiyachi ne myee kiptaiyandennyu.”

¹⁵ Kingo tomo kogeskei ng'alaalennyi, koit Rebeka cheptap Bethuel weeriitap Milkah, kwondap Nahor, ng'eetap kametap Abraham, koibu tereennyi eng' tigikyet.

¹⁶ Ki chepto ne karaaran kot, ak ki pergeiyat ne ki tomo kotuiyo ak muren. Ki choortagei agoi koit kondap peek, konyiit peek tereennyi ak kotogos kogeny.

¹⁷ Ki labat anyun otwogindonooto kotorookta, ak koleenji, “Kaigai inaga peek tutigin aee, chu mi teroning'ung'.”

¹⁸ Kowolji koleenji, “Nganagin iee, kiptaiyandennyu.” Ki itu tereennyi kochokyi eng' eunnyi, ak konaga koe.

¹⁹ Ye kingo kagonaga peek koe, koleenji, “Kaawe asiilji peek tambeesik ak icheek koe, kot kobiyong'so.”

²⁰ Ki chaakta anyun kwo koroong'ji peek moinget kogesyi, ak kolabat si kosiil alak eng' keriinget; ki siilji tambeesikyik tugul.

²¹ Ki siis chiichooto ak kochiilji konda komachei konai ngo kagosuldochi Kamuktaindet ne Toroor pandanyi anan ngo tomo.

²² Ak ye kingo kagoee peek tambeesik, konam chiichooto peteiyotap thahabu, ne nyigiisindanyi koyamei kebebertap shekel, ak kariik aeng' che po thahabu che po eunek che yamei shekelisyek taman,

²³ ak koteebe kole, “Ii cheptap ng'oo? Kaigai mwaiwo. Tos mi ole kimuuchi keru eng' kootap kwandang'ung'?”

²⁴ Koleenji ineendet, “Aa cheptap Bethuel weeriitap Milkah, ne ki sikyi Nahor.”

²⁵ Koleenji kogeny, “Ki tinyei mobeek ak amitwogik che chaang' che ki kigonor che po tambeesik, ak mi poroindo ole ruitos toek.”

²⁶ Ki ing'uruuk anyun chiichooto ak kolas Kamuktaindet ne Toroor,

²⁷ kole, “Iberuurot Kamuktaindet ne Toroor, Kamuktaindetap kiptaiyandennyu Abraham, ne ma etee kiptaiyandennyu rireenennyi po kei ak imaninnyi; Kamuktaindet ne Toroor ne ki imutwaa eng' ooreet agoi aitu kootap tupchosyegap kiptaiyandennyu.”

²⁸ Ki labat anyun chebooto, ak komwachi piik che po kootap kamet ng'aleechooto tugul.

²⁹ Ki tinyei Rebeka ng'eetap kamet, ne ki kiguure Laban. Ki labat Laban kwo ole mi chiichooto eng' ole mi kondap peek.

³⁰ Ye kingo keer peteiyot, ak kariik che mi eunegap chepkamet, ak ye kingo kas ng'aleegap Rebeka chepkamet, komwachin ng'aleek che kagamwachi chiichooto, kwo anyun ole mi chiichooto. Ak ogeero, kita kotononi chiichooto eng' ole neegitee tambeesik ye mi kondap peek.

³¹ Kwo koleenji, “Nyoo inyee ne iberuurot eng' Kamuktaindet ne Toroor. Amu nee si itonon eng' saang'? Kaachop koot ak ole ruitos tambeesik.”

³² Ki wo ko anyun chiichooto. Yeityo kotyach Laban tuguuk che kilau tambeesik, ak kogoochi tambeesik mobeek ak amitwogik che kiga kigonor. Ki inaga peek koune keelyekyik ak che po piik che ki mi kobooto ineendet.

³³ Ak ki kiipchi amitwogik kinde tainnyi, ago ki le, “Ma amisyei agoi amwaiwok ng'olyoot ne kagiyoguneno.” Koleenji, “Mwaa anyun.”

³⁴ Komwa anyun kole, “Aa otwogindetap Abraham.

³⁵ Ki koberuur miising' kot `Kamuktaindet ne Toroor kiptaiyandennyu; ak ki kotoroor koeet. Ki kogoochi ineendet `akwotisyek che po keechiirek ak che po tuuga, fedha ak thahabu, otwogik che murenik ak otwogik che tiibiik, tambeesik ak sigiroik.

³⁶ Ki sikyi kiptaiyandennyu weeriit Sarah kwondonyi ye kingo kagoosit; ak ki kogoochi kiptaiyandennyu weeriinnyi tuguuk tugul che tinyei.

³⁷ Ak kimakwo kiptaiyandennyu ayosyo kole, ‘Ametunji weeriinnyu cheptap Kanaanik, che amenye emennywa;

³⁸ ago ui kootap abba, kaptilyonutikyuk, iwe imutyi weeriinnyu chepto kotun.’

³⁹ Ak ki aleenji kiptaiyandennyi, ‘Imuuch ma cham chebooto kosubwo.’

⁴⁰ Ago ki leenjo, ‘Iyogu Kamuktaindet ne Toroor ne awendotee tainnyi malaikaiyannyi obe tuwai, ak kosuldeun pandang'ung'. Ak iwe imutyi weeriinnyu chepto eng' kaptilyonutikyuk ak eng' kaptilyonutigap abba kotun.

⁴¹ Yeityo anyun ityagage eng' kayosyennyu, ye kaiit kaptilyonutikyuk. Ak ngo ma konin chebooto, ityagage anyun eng' kayosyennyu.’

⁴² “Kaitu rani ye mi kondap peek, ak ale, ‘Ee, Kamuktaindet ne po Toroornatet, ne po kiptaiyandennyu Abraham, ngiberuur pandanyu;

⁴³ keero, atonone yu neegitee kondap peek. Igoochi kocham chepto ne nyoonei kosiilei peek,’ ak aleenji anyun, ‘Kaigai inaga peek tutigin aee, cho mi tereeng'ung',’

⁴⁴ ak kowolwo kole, ‘Nganagin iee, ak asiilji tambeesiguk ak icheek,’ ko ingoek nooto kwondo ne kagolewenji Kamuktaindet ne Toroor weeriitap kiptaiyandennyu.”

⁴⁵ “Ak ye kata ang'alaali eng' muguleldanyu, keero, komong' Rebeka koibu tereennyi eng' tigikyennyi; kochoortagei kwo kondap peek kosiil peek. Aleenji, ‘Kaigai inaga peek aee.’

⁴⁶ Ak kotu tereennyi ne kami tigikyennyi kochokyi, ak koleenjo, ‘Nganagin iee, ak asiilji tambeesiguk ak icheek.’ Aee anyun, ak yeityo konaga tambeesik ak icheek.

⁴⁷ Ateebee aleenji, ‘Ii cheptap ng'oo?’ Koleenjo, ‘Aa cheptap Bethuel, weeriitap Nahor, ne ki sikyi Milkah ineendet.’ Ande anyun peteiyot, ak kariik eng' eunekyik.

⁴⁸ Ak ang'uruuge asaa Kamuktaindet ne Toroor, ak aweekyi kongoi Kamuktaindet ne po Toroornatet ne po kiptaiyandennyu Abraham, ne ki indoiywo eng' ooreet ne myee si amutyi weeriinnyi cheptap ng'eetap kametap kiptaiyandennyu.

⁴⁹ Ak nguno anyun ngo cham oyachi kiptaiyandennyu ne myee ak ne po iman, omwaiwo; ak ngo ma uu nooto, omwaiwo si kobiit aweekyigei eutap tai, anan ko ne po kaataam.”

⁵⁰ Kowolji Laban ak Bethuel anyun, koleenji, “Punu Kamuktaindet ne Toroor ng'olyoondoni; ma kimuuchi kemwaun ng'olyoot ne ya anan ne myee.

⁵¹ Rebeka no mi taing'ung', imut ak obe. Ingoek kwondap weeriitap kiptaiyandeng'ung' ko uu ye ki mwa Kamuktaindet ne Toroor.”

⁵² Ye kingo kas otwogindetap Abraham ng'aleekwak, kong'uruuk agoi ng'wony eng' taitap Kamuktaindet ne Toroor.

⁵³ Ki ip anyun otwogindet tuguuk che po fedha ak che po thahabu, ak ngoroik kogoochi Rebeka. Ki igoochi ng'eetap kamet ak kamet tuguuk che korooron.

⁵⁴ Ki amis ak koeeiso ineendet ak piik che ki mi tugul ak koruiyo. Ye kingo ng'eetyo karon kole, “Ochamwo awo ye mi kiptaiyandennyu.”

⁵⁵ Ki le ng'eetap kamet ak kamet, “Ingota kotebi lakwani kobootech peetuusyek che ng'ering', che tee peetuusyek taman; ak ye ibata chooto, kwo.”

⁵⁶ Ago ki mwachi koleenji, “Amata ogaa, amu ki koberuur Kamuktaindet ne Toroor pandanyu; ochamwo awo kapkiptayandennyu.”

⁵⁷ Kole icheek, “Myee keguur lakwanooto, konyo keteebe ineendet.”

⁵⁸ Koguur anyun Rebeka ak nyo koteebe koleenji, “Tos ichame obe ak chiichi?” Kole, “Wei, awendi.”

⁵⁹ Ki chamji anyun Rebeka ng'eetap kamet kwo, kobooto cheplakwennyi, ak otwogindetap Abraham ak piikyik.

⁶⁰ Ak ki iberuur `icheek Rebeka, koleenji, “Ne kitupche, egu kametap eliphuusyek konyil eliphuusyek taman, ak konyaban lagoguk kurgotigap che wechei icheeget.”

⁶¹ Ki ng'eet anyun Rebeka, ak tiibiikyik che otwogik, kolaany tambeesik, koosup chiichooto. Ki imut anyun `otwogindonooto Rebeka ak koba.

⁶² Kiga konyo anyun Isak kobun ooreetap Beer-lahai-roi, amu ki menyei ineendet komostap Negeb.

⁶³ Ye kingo wendoti Isak eng' keeweet koskoleny, kotabendo, ak ki keer tambeesik che pwoonei.

⁶⁴ Ak kitabendo Rebeka agine, ak ye kingo keer Isak, kochoorgei eng' tambeesyet,

⁶⁵ ak kiteebe otwogindet koleenji, “Ng'oo chiichiin nyoonei eng' kewaniin kotorookwech?” Koleenji otwogindet, “Kiptaiyandennyu nooto.” Ki nam anyun ngoryeet ne ng'eetee metit agoi keelyek kotugegei.

⁶⁶ Komwachi otwogindet Isak anyun tuguuk tugul che kiga koyai.

⁶⁷ Kingo pata anyun komut `Isak Rebeka kwo emaitap Sarah kamennyi, ak kotun Rebeka koek kwondonyi; ak ki cham ineendet kot. Ki nyoor anyun Isak kagaigaet amu kiga kome kamet.