TAUNET 23 - BUKUIT NE TILIIL Sireet ne Dutero Kanon

Meetap Sarah

¹ Kenyiisyek che ki tar Sarah kosabei ko pogol ak tiptem ak tisap,

² ak ki mechi Kiriath-arba (nooto Hebron), eng' emetap Kanaan. Ki nyo Abraham kote ak koriir agobo Sarah.

³ Yeityo kong'eet Abraham eng' ole ki mi muusto, ak kong'alaal ak piigap Het, koleenji,

⁴ “Aa kiprutoiyo ak ko aa punootyo eng' oling'wong'; ogoono yeto eng' oling'wong' kobunjo eng' ole kitupchin piik atupchi muusto, si ma ageere.”

⁵ Ki wolji `piigap Het Abraham anyun, koleenji,

⁶ “Kaseech, kiptaiyandennyu, ii pounindet ne po Kamuktaindet eng' kwenunnyoo. Tupchi muusto kererit ne kelewen eng' kereeriisyekyok. Ma mi chii eng' acheek ne imuuchi koetenen kererinnyi si metupchi muusto.”

⁷ Ki ng'eet ak kong'uruukyi Abraham anyun piigap emetap Het.

⁸ Ak ki ng'alaalji `ineendet icheek kole, “Ngo chame atup muusto si ma ageere, ogasa anyun ak osoomwa Epron weeriitap Sohar,

⁹ kogoono kebenennyi, ne mi Makpela, eng' kiwotetap mbareennyi. Ingogoono eng' taing'wong' ole kitupchin piik kobunjo eng' kamanuutyet ne yamegei ne po fedha.”

¹⁰ Ki tebee anyun Epron kwenutap weeriigap Het; ak ki wolji `Epron Kitindet Abraham kogasei weeriigap Het, kobooto tugul che ki mong'ji ormariichetap nganasennyi, koleenji,

¹¹ “Achicha, kiptaiyandennyu, ago kasa, kagoonin mbaranooto kobooto kebeneet ne mi olooto. Kagoonin eng' taitap weeriigap piikyuk; tupchi muusto.”

¹² Yeityo kong'uruuk Abraham anyun eng' taitap piigap emet.

¹³ Ak ki ng'alaal ak Epron, kogasei piigap emet, kole, “Ago ngot icham, ko myee igasa; agoonin kamanuutyet ne yamegei ak mbaranooto; ee, taach anyun, si atupchi muusto oliindo.”

¹⁴ Ki wolji `Epron Abraham koleenji,

¹⁵ “Kiptaiyandennyu, kasa, kimoitosi nee ak inyee eng' mbareet ne yamegei kamanuutyennyi ak shekelisyek pogol ang'wan che po fedha? Tup muusto.”

¹⁶ Ki kas anyun Abraham ng'aleegap Epron; ak kigerchi `Abraham Epron robiinik che ki kamwa ineendet eng' taitap piigap Het, chooto ko segelisyegap fedha pogol ang'wan, ko uu che kiboisyei chemung'arainik.

¹⁷ Ki kigamanji anyun komyee Abraham mbareetap Epron, ne ki mi Makpela, ne itoorchingei Mamre, mbareet kobooto kebeneet ne ki mi olooto, ak keetiik tugul che ki mi mbaranooto, che ki kiyieme kiwoteet tugul,

¹⁸ ki kigoochi Abraham kobunji eng' taitap weeriigap Het, ak eng' taitap tugul che ki mong'ji ormariichetap nganasennyi.

¹⁹ Kingo pata chooto kotup `Abraham Sarah kwondonyi eng' kebeneet ne ki mi mbareetap Makpela ne itoorchingei Mamre (ne mi Hebron), eng' emetap Kanaan.

²⁰ Kigamanji ak kogoochi anyun `piigap Het Abraham mbareet ak kebeneet ne ki mi olooto, koek ole kitupchin piik.