TAUNET 21 - BUKUIT NE TILIIL Sireet ne Dutero Kanon

Sigeetap Isak

¹ Ki rutoochi `Kamuktaindet ne Toroor Sarah ko uu ye kiga komwa ak ki yachi Kamuktaindet ne Toroor ko uu ye kiga koyomis.

² Ki manach Sarah ak ki sikyi Abraham weeriit eng' osindanyi eng' kasarta ne kiga koarorchi Kamuktaindet.

³ Ki kuure `Abraham weeriinnyi ne ki sikyin Sarah, Isak.

⁴ Eng' peetuut ne po sisiit, kogiyatita `Abraham weeriinnyi Isak ko uu ye kiga ng'at `Kamuktaindet ineendet.

⁵ Ki po Abraham kenyiisyek pogol, ye ki ngesikyin ineendet weeriinnyi Isak.

⁶ Ki le Sarah, “Kagoono Kamuktaindet aroori; ak age tugul ne kasei ng'olyoondoni kororyei kobooto.”

⁷ Ak kites komwa kole, “Ng'oo ne kita mwachin Abraham koleenjin reryei lagok Sarah? Amu kaasikyi weeriit eng' osindanyi.”

⁸ Ki eet anyun lakweet ak eng' peetuut ne ki kiluge ineendet, koyai Abraham igoorto ne oo.

Keonei Hagar

⁹ Ki keer Sarah weeriitap Hagar Chemisiryot ne kiga kosikyi Abraham, kochotisyei.

¹⁰ Ki mwachi anyun `ineendet Abraham koleenji, “Oon chebyosoni otwogin ak weeriinnyi, amu ma namei tuguuk weeriitap chebyosoni otwogin kobooto weeriinnyu Isak.”

¹¹ Ki yait miising' kot ng'olyoondoni eng' Abraham agobo weeriinnyi.

¹² Ago ki mwachi `Kamuktaindet Abraham koleenji, “Amegeer ko ya ng'olyoondoni eng' inyee amu weeri, ak amu chebyosoning'ung' otwogin. Kas ng'aleegap Sarah eng' tuguuchooto tugul kamwaun, amu punu Isak ooreetap iyoteng'ung'.

¹³ Ak tuun ayae weeriitap chebyosoni otwogin agine koek pororyet amu ineendet ko iyoteng'ung'.”

¹⁴ Ki ng'eet anyun Abraham eng' peetuut ne ki isubi kota ko karon miising' ak ki ip amitwogik ak soteet ne po peek kogoochi Hagar ak lakweet. Ki indochi tigikyennyi tuguuchooto yeityo kounda icheek koba. Ki wo anyun koombenot eng' surkwen ne po Beer-sheba.

¹⁵ Ye kingo keskei peek eng' soteet, kobagaakta lakweet eng' sondiit oriit.

¹⁶ Ki wo kotep ng'wony eng' ye loo kitigin, ye itei kipchabet ngemwokto si ma keer meetap lakweet. Ki tep anyun kotoorchigei ineendet ak kowaach koriir.

¹⁷ Ki kas Kamuktaindet koriirei weerooto ak kiguur malaikaiyatap Kamuktaindet ne mi kipsengwet Hagar, koleenji, “Amin nee, Hagar? Meiywei amu kagogas Kamuktaindet kutitap lakweet eng' ole mi.

¹⁸ Ng'eet ui ing'eet lakweet ak inamate eng' eung'ung', amu tuun ayae ineendet koek pororyet ne oo.”

¹⁹ Ki yaat Kamuktaindet konyegap kwonyooto ak ki keer keriingetap peek. Ki wo anyun konyiit peek soteet yeityo konaga lakweet.

²⁰ Ki mi Kamuktaindet kobooto lakweet ak kiner koeet. Ki meng'oot surkwen ak koek mwogindet.

²¹ Ki meng'oot ineendet surkwen ne po Paran ak ki cheeng'ji kamet Chemisiryot kotun.

Kayasyetap Abraham ak Abimelek

²² Ki ng'alaalji eng' peetuusyechooto Abimelek ak Pikol, ineendet ne ki kiptaiyatap kiplutotinikyik, Abraham koleenji, “Miitei Kamuktaindet kobooten eng' tuguuk tugul che iyae.

²³ Iyosyeiwo anyun nguno eng' Kamuktaindet si metila let anan eng' weeriinnyu anan eng' mochogoronikyuk, ago ko uu rireenet ne ki ayaun, iyaiywo aginye ko uu nooto, agot eng' emet ole kigeegune too.”

²⁴ Ak ki leenji Abraham, “Ayostosi.”

²⁵ Kingo kergong' `Abraham Abimelek amu keriingetap peek ne kiga rebe otwogigap Abimelek eng' koroomnateet,

²⁶ kole Abimelek, “Mangen ineendet ne ki yai kioto. Ki ma imwaiwo ak ki tomo agas ko uu ni kobatee ra.”

²⁷ Ki nam anyun Abraham keechiirek ak tuuga kogoochi Abimelek ak ki iyomiskei icheek tuwai.

²⁸ Ki itabaan anyun Abraham subeenwek tisap che po keechiir koba taban icheegei.

²⁹ Ak kiteebe `Abimelek Abraham koleenji, “Po nee subeenwechu tisabu po keechiir ketabaan icheegei?”

³⁰ Kowol ineendet kole, “Subeenwechu tisap po keechiir, ko myee ikweri eng' eunnyu si koek paornateet eng' anee, koboor kole anee ne ki abale keringoniito po peek.”

³¹ Kiguure yooto anyun Beer-sheba, amu ki iyasyechigei tuwai eng' olooto.

³² Ki iyomiskei anyun eng' Beer-sheba, ak king'eet Abimelek ak Pikol ne ki kiptaiyatap kiplugotinikyik, koweigei koba emetap Philistiik.

³³ Ki miin Abraham keetit eng' Beer-sheba ak ki kuur eng' olooto kainetap Kamuktaindet ne Toroor, Kamuktaindet ne po Koigeny.

³⁴ Ak ki ek toondet Abraham eng' emetap Philistik peetuusyek che chaang'.