TAUNET 20 - BUKUIT NE TILIIL Sireet ne Dutero Kanon

Abraham ak Abimelek

¹ Ak kiu Abraham eng' olooto kwo komostap Negeb, kwo komeny kwenutap Kadesh ak Shur, ak komeng'iis ko kiprutoiyo eng' Gerar.

² Ki itaam `Abraham Sarah kwondonyi kole, “Ineendet ko tupchennyu.” Ki iyookto anyun Abimelek laitoryatap Gerar kimutyi Sarah.

³ Ago ki nyoonji `Kamuktaindet Abimelek eng' karwotitoet kemoi koleenji, “Keero, kaimei isabe, kwondo ne kaimutyigei ko kwondap chii.”

⁴ Ago ki tomo koriikyi Abimelek ineendet. Koleenji Kiptaiyat, “Tos ibare agot pororyet ne po iman?

⁵ Tos ma leenjo ineendet, ‘Sarah ko tupchennyu?’ Ak ma mwa agine kwonyooto kole, ‘Ineendet ko tupchennyu?’ Ki ayai ko uu ni eng' muguleldo ne po iman ak eng' eunek che tiliileen.”

⁶ Ak ki mwachi anyun `Kamuktaindet ineendet eng' karwotitoet, koleenji, “Wei, angen ale ki iyai ko uu ni eng' muguleldo ne po iman. Agot anee ko ki aeetenen si meyaiywo tengek. Nooto anyun amu nee si ma achamun itwaa ineendet.

⁷ Ara anyun imutyi nguno kwonyi chiitap ko po, amu maotyoo inee si kosaun si isap. Ago ngot ko meweekte, inai ile imee ne matiny, inyee, ak tuguuk tugul che itinye.”

⁸ Ki ng'eet anyun Abimelek karon miising' ak koguur otwogikyik tugul. Kotetyi tuguuchooto tugul kochut itiikwak; ak ki aragenso kot miising' pichooto.

⁹ Ki kuur anyun `Abimelek Abraham, koteebe koleenji, “Koiyaiywech nee? Ak nee chalwok ne koayaun, kot igesenjo ak laitornatennyu tengegi tee ni? Koiyaiywo tuguuk che ma nyolu keyai.”

¹⁰ Ak ki leenji `Abimelek Abraham, “Koigeer nee, si iyai kii?”

¹¹ Ki le Abraham, “Ki ayai niito amu ki aleen, ma mi olito iman kayweetap Kamuktaindet, ak imuuchi icheek kobara amu kwondanyu.

¹² Ago eng' iman, ineendet ko chepkamennyu, sieetap chebyosennyo; ak ki atun.

¹³ Ye kingo kagomoong'wa Kamuktaindet eng' kootap abba, ak kogoono awendot, aleenji anyun ineendet, ‘Rireneng'ung' ni ne tuun iboorwo; imwae eng' komosta age tugul ole kibendi ile, Ineendet ko ng'eetap kamennyu.’ ”

¹⁴ Ki igoochi anyun `Abimelek Abraham keechiirek ak tuuga, otwogik che murenik ak che tiibiik, ak koweekyi Abraham Sarah kwondonyi.

¹⁵ Ak ki leenji Abimelek, “Keero, mi taing'ung' emoninyu, meny ole ichame.”

¹⁶ Ki leenji Sarah, “Keero, kaagoochi ng'eetap kamenng'ung' silingisyek eliphuut agenge, koek chooto che tugun koonyek eng' piik che mi kobooten, ak kagiityin imanda eng' taitap piik tugul.”

¹⁷ Ki sa anyun `Abraham Kamuktaindet, ak ki isoop `Kamuktaindet Abimelek, ak kwondonyi, ak chebaigeinikyik, ak ki sich lagok.

¹⁸ Amu kiga korat Kamuktaindet ne Toroor mootinwek tugul che po kootap Abimelek, amu Sarah kwondap Abraham.