TAUNET 19 - BUKUIT NE TILIIL Sireet ne Dutero Kanon

Sogornatetap piigap Sodom

¹ Ki it anyun malaikaisyechooto aeng'u Sodom eng' koskoleny, ak kitebyei ng'wony Lot eng' ormariichetap nganasanooto. Ye kingo keer Lot icheek, kong'eet kotorookta ak ipkogutung'ji.

² Koleenji, “Kasaak ale omosu, obwa anyun kiptainikyuk kootap otwogindeng'wong', ak otebi kemouni komugul, oun keelyek si osip ong'eetyee omuste.” Kowol icheek kole, “Achicha, kitebee saang' kemout komugul.”

³ Ki igaigai Lot miising' anyun kot komasta icheek koba koonnyi. Ki yachi ineendet icheek igoorto ak kochopchi magatiinik che ma kinde mermereek, si koam.

⁴ Ago ye ki tomo koruiyo, kobwa meng'iigap nganasanooto po Sodom koyiem koot; piik tugul neranik ak che oosen kobun komoswek tugul.

⁵ Ki kuur `icheek Lot ak koleenji, “Ngorcho piik che ketaach eng' koong'ung' kemouni? Imutwech kobwa saang', si kobiit kenai icheek.”

⁶ Ki manda Lot kwo ole mi icheek eng' kurgat, ak koger kurgeet.

⁷ Ak koleenji, “Asaok, che kitupche, amoegu sogoran!

⁸ Ogeero, atinye tiibiikyuk aeng' che pergein. Okany amutwak, si oyachi ko uu ye koroo. Moyachi kiy pichu amu kagobwa koonnyu.”

⁹ Ak ki wol kole, “Istegei!” Kotestai kole, “Ki nyo chiichi ko too, ago inee ni kagomach koek ne irwookwech i! Kimache anyun keyaun ne ya kosiir icheeget.” Ki ibookyi `icheek Lot ak komang'ji kurgeet koleen kobut.

¹⁰ Ago ki iyogoi eunekwak pichu ki mi ko ak kochuut Lot kwo ko, ak koger kurgeet.

¹¹ Yeityo kobire korateet pichooto ki miitei kurgeetap koot, che mengeechen ak che eecheen, agoi kong'etyo kocheeng'ei kurgeet.

Ng'emetap Sodom ak Komora

¹² Ki teebee anyun `pichooto Lot koleenji, “Tos itinye chii age eng' yu? Saania, weeriiguk, tiibiiguk, anan chiing'ung' age tugul eng' nganasani? Ngot komi imaande eng' olito.

¹³ Kimache keng'em nganasani, amu kogoeet waagaat agobo icheeget eng' taitap Kamuktaindet ne Toroor, ak kagoyakwech Kamuktaindet ne Toroor keng'em.”

¹⁴ Ki manda Lot kwo ak ipkoleenji sanigap tiibiikyik “Ong'eetyee ak omande obe, amu machei kong'em Kamuktaindet ne Toroor nganasani.” Ki keer sanichooto ng'aleekyik ko uu tangoi.

¹⁵ Ki ichirchir `malaikaisyek Lot ko kerir emet koleenji, “Ng'eet, imut kwondong'ung' ak tipchuguk aeng' si mobegu eng' kergong'yet ne ityin nganasani.”

¹⁶ Ki igagei ineendet komanda; amu ki igagei, ko ki nam pichooto eunnyi, eutap kwondonyi ak eunegap tiibiikachik aeng' komaanda eng' nganaseet ak kobagaakta eng' saang' amu ki riiree Kamuktaindet ne Toroor.

¹⁷ Ye kingo kagomaanda, koleenji, “Sarugei, mwei amegus kong' anan itonone ui tugul eng' kewani; mwechi tuloonook parak, ang' puch komeng'etu.”

¹⁸ Koleenji Lot, “Achicha, kiptaiyandennyu!

¹⁹ Kairiiree uitugul otwogindeng'ung', ak kotesak aiyebindong'ung' eng' saruunet ne koisarwo si ma abet saboondanyu. Nga no anyun-i, koma muuchi amwechi tuloonook parak si konyoorwo yaityo, ak kogoono ame.

²⁰ Keero, ang'ni nganaseet ne neegit ak ko ming'in, myee amwechi oliindo si asar saboondanyu.”

²¹ Koleenji ineendet, “Kaagasun ng'olyoondoniito agine ale ma ang'eme nganasanooto kaimwa.

²² Chaakte, mwechi olooto, amu ma muuchi ayai kiy agoi iit olooto.” Ki kiguure Zoar nganasanooto amu nooto.

²³ Kiga kochoor asiista ye kingo itei Lot Zoar.

²⁴ Kiroong'ji anyun Kamuktaindet ne Toroor Sodom ak Gomorah roptap koik che laldos ak maat ne punu kipsengwet.

²⁵ Ki peel kong'em nganasochooto, atebweet komugul, piik tugul che ki menyei nganasochooto, ak tuguuk tugul che piitos eng' ng'wony.

²⁶ Ago kiguskong' kwondap Lot eng' let, ak kiwalak koek tulweet ne ming'in ne po muunyuk.

²⁷ Ki ng'eet Abraham karon komusta kwo agoi koit ole kigatonone eng' taitap Kamuktaindet ne Toroor;

²⁸ ak ye kingo tabendo kogeer oliin po Sodom ak Gomorah, ak emet tugul ne po atebweet, kooro iyeto ne po emet kotogostoi ko uu iyetap maat ne oo miising'.

²⁹ Ak kingo ng'emei Kamuktaindet nganasook che po atebweet, kobwaat Abraham ak komaanda Lot, komandae ng'emisyetap nganasochooto kiga komeng'oot.

³⁰ Ki manda anyun Lot kotogosta tulweet parak ak tiibiikyik aeng' amu ki iywei komeny Zoar ak ipkomeny kebeneet oriit ak tiibiikyik.

³¹ Ki leenji anyun chepto ne oo chepto ne ming'in, “Kagoosit kwandanyo, ak ma mi mureno emoni ne imuuchi kotunech ko uu piteetap ng'wony komugul.

³² Ngenage kwandanyo kumik si kobiit kobogit ak keruiye ak ineendet, si keriip iyoteet.”

³³ Ara ki inaga kwandanywa anyun kumik kemounooto ak ki wo ne oo kwo ipkoruiyo ak kwandanyi. Ma nai kwan ye kingo ruitos tuwai, anan ye ki kong'eetei.

³⁴ Eng' peetuut ne ki isubi nooto, koleenji ne oo ne ming'in, “Keero, ko ki ruiye lagat ak abba. Nginage kogeny kumik kemouni po ra si iwe aginye oruiye tuwai, si keriip iyoteet.”

³⁵ Ki inaga kumik kwandanywa kogeny kemounooto, ak king'eet anyun ne ming'in, kwo ipkoruiyo ak kwan. Ma nai kora koruitos tuwai, anan kong'eetei.

³⁶ Ki manach anyun tiipchooto tuwai po Lot komanage kwandanywa.

³⁷ Ki sich `ne oo weeriit, ak kiguure kainennyi Moab. Ineendet ko kwandap Moabik agoi ra.

³⁸ Ki sich `chepto ne ming'in agine weeriit, ak kiguure kainennyi Ben-Ami. Ineendet ko kwandap Amonik agoi ra.