TAUNET 17 - BUKUIT NE TILIIL Sireet ne Dutero Kanon

Arorutyet agobo yaatitaisyet

¹ Ye kingo po Abram kenyiisyek tamanwogik sogool ak sogool, kogimong'ji Kamuktaindet ne Toroor ak koleenji, “Aa Kamuktaindet Ne po Kamuktaet. Wendote tainnyu ak iegu ne ititaat,

² si ayai kayomiset eng' kwenunnyoo, inyee ak anee, ak atesin miising' kot.”

³ Ak ki ibutyi ng'wony kogutuny Abram, ak ki ng'alaalji Kamuktaindet koleenji,

⁴ “Keero, mi anyun kayomisenyu kobooten, ak tuun iegu kwandap pororyosyek che chaang'.

⁵ Ma keguurenen kogeny Abram, ago kiguurenen Abraham, amu kayain iegu kwandap pororosyek che chaang'.

⁶ Aberuurin eng' iyoteet miising', ak eng' inyee ayae pororyosyek, ak komong'unenen laitorinik.

⁷ Ak agimiiti kayomisennyu anee ak inyee, ak iyoteng'ung' ne piitu let ak ibinwekwak tugul, si koek kayomiset ne wendi agoi koigeny, ak aegu Kamuktaindet eng' inyee ak iyoteng'ung'.

⁸ Agoonin inyee ak lagoguk che piitu let emoni tugul po Kanaan, ni oo kiprutoin koek neng'wong' koigeny, ak aegu Kamuktaindennywa.”

⁹ Ak ki leenji `Kamuktaindet Abraham, “Riip anyun kayomisennyu inyee ak iyoteng'ung', ak eng' ibinwekwak tugul.

¹⁰ Ni ko kayomisennyu ne kanyool oriip eng' kwenunnyoo, inyee ak anee, ak lagoguk che isiche: kiyatitoi ng'eta age tugul eng' okweek.

¹¹ Kimuratani iriryotap poorwekwok ak egu nooto kaboorunet ne po kayomiset eng' kwenunnyoo, anee ak okweek.

¹² Kiyatitoi ng'eta age tugul eng' okweek ne kagotar peetuusyek sisiit, ng'eta age tugul eng' ibinwekwok tugul ngo ne ki sikyin kooriikwok, anan ko ne ma salwok ne ki kialei eng' toek alak tugul.

¹³ Eng' iman ko nyolu keyatita ne kisikyin koong'ung' kobooto ne ki iale robiisyeguk, asi koek kayomisennyu eng' poorwekwok ne tebyei koigeny.

¹⁴ Weeriit age tugul ne ma kimuratan poortonyi, king'etoi eng' piikyik, amu kibut kayomisennyu.”

¹⁵ Ki mwachi `Kamuktaindet Abraham koleenji, “Maata iguure kwondong'ung' Sarai; kagoek kainennyi Sarah.

¹⁶ Aberuuri ineendet ak ne siirei, ko kaagoochi ineendet kosigun weeriit. Aberuuri ineendet koek kametap pororyosyek, ak mang'une ineendet laitorinigap piik.”

¹⁷ Ki ibut kogutuny anyun Abraham, ak korori eng' muguleldanyi ak koteebegei kole, “Tos kisikyi lakwa chii ne tinyei kenyiisyek pogol? Ak tos ta kosich lakwa Sarah agine ne tinyei kenyiisyek tamanwogik sogool?”

¹⁸ Koleenji `Abraham Kamuktaindet, “Kata myee kosap Ishmael eng' taing'ung'.”

¹⁹ Ak ki wolji Kamuktaindet koleenji, “Achicha, siguun iman Sarah kaing'ung' weeriit, ak tuun iguure kainennyi Isak. Ayae kayomisennyu kobooto ineendet ak iyotennyi, si koek kayomiset ne wendi agoi koigeny.

²⁰ Kosupkei ak Ishmael, ko kaagasun ng'aleeguk; keero, aberuuri ineendet ak agoochi iyoteet. Abaroi ineendet miising' ak tuun sichei pounik taman ak aeng' ak ayai koek pororyet ne oo.

²¹ Alumdoi kayomisennyu eng' Isak, ineendet ne tuun sigun Sarah eng' peetuusyechuuto kenyiit ne nyoonei.”

²² Ye kingo kes ng'alaalet ne ki ng'alaali ak ineendet, kotogosta Kamuktaindet kometo Abraham.

²³ Ki nam anyun Abraham weeriinnyi Ishmael, ak tugul che ki kisikyin koinyi, kobooto tugul che ki kialee robiisyek, muren age tugul ne po koonnyi ak koyatita eng' peetuunooto, ko uu ye ki kamwachi Kamuktaindet.

²⁴ Ki po Abraham kenyiisyek tamanwogik sogool ak sogool, yooto ye ki ngeyatitoi.

²⁵ Ak ki po Ishmael weeriinnyi kenyiisyek taman ak somok keyatitoi.

²⁶ Ki kiyatita peetuunok Abraham ak weeriinnyi Ishmael,

²⁷ kobooto murenik tugul che po koonnyi, che ki kisikyin koonnyi, ak toek che ki kialee robiisyek.