TAUNET 15 - BUKUIT NE TILIIL Sireet ne Dutero Kanon

Kamuktaindet ak Abram

¹ Ye kingo pata tuguuchu anyun koityi Abram `ng'olyootap Kamuktaindet ne Toroor eng' ng'ang'utyet koleenji, “Abram, ameiywei! Aa long'eng'ung' ak oo melektang'ung' miising'.”

² Ak ki wolji Abram kole, “Ee Kiptaiyat Kamuktaindet ne Toroor, ta igoono nee, ago kawe kalilot ama tinye lakwa, ago ineendet ne tuun indii tuguukyuk ko Elieser ne po Damasko?

³ Ak ki testai komwa Abram kole, ‘Keer anyuno! Ma igoono iyoteet, ak igere ile agoi kondi otwogindet ne mi koonnyu tuguukyuk.’ ”

⁴ Ak ki ne matyanit, koityi ineendet `ng'olyootap Kamuktaindet ne Toroor koleenji, “Ma tuun namei tuguuguk chiichi, ago tuun isiche ineendet ne po poortong'ung' ne indii tuguuguk.”

⁵ Ki imaanda ineendet kwo saang' ak koleenji, “Kaigai keero, inyal parak kipsengwet, ak iit kecheik ngot imuuchi.” Ak ki testai koleenji, “Tuun ko tenitu chooto lagoguk.”

⁶ Ki iyan `Abram Kamuktaindet ne Toroor, ak koiityi `Kamuktaindet ne Toroor ineendet imanda amu nooto.

⁷ Yeityo koleenji ineendet, “Aa Kamuktaindet ne Toroor anee ne ki amutun imang'une Ur emetap Kaldeik ak inyoo agoonin emoni kobunjiin.”

⁸ Ak ki wolji Abram koleenji, “Ee, Kiptaiyat Kamuktaindet ne Toroor, anae nee ale tuun ko punjino?”

⁹ Kowolji koleenji, “Ibwo rooryat ne po kenyiisyek somok, ng'orooryet ne po kenyiisyek somok, mengit ne po kenyiisyek somok, cheptuget ak aarwetap toriityon.”

¹⁰ Ki ip anyun Abram chooto tugul, ak kobet yeityo konde motwet age tugul kotoorchigei motwennyi ip kong'et toriitik che mabet.

¹¹ Ak ye kingo choorgei toriitik cho amei panyeek, komachei koam panyechooto, kogiyon Abram.

¹² Ye kingo roroktoi asiista, koip Abram rwondo ne nyigiis miising', ak kotuch ineendet imenindo ne po arageneet.

¹³ Ak ki leenji `Kamuktaindet ne Toroor Abram, “Iman tuun inae ile, egu lagoguk kiprutoin eng' emet ne ma nenywa, ak tuun ko otei pichooto, ak konyalilso icheek eng' kenyiisyek pogol ang'wan.

¹⁴ Ak tuun arwookyini agine pororyonooto tuun pendi kootei, ak ye ibata nooto, komong'u icheek eng' emonooto kotinyei tuguuk che chaang'.

¹⁵ Ago iwendi inyee eng' kaalyeet ole mi kwanisyeguk, ak ketubin eng' kalilot ne myee.

¹⁶ Tuun ko weeksei yu ibinda ne po ang'wan, amu tomo konender kot koam piik tugul yaityetap Amorik.”

¹⁷ Ye kingo kagororokto asiista ak ko imenit, kotook tereetap ma ne iyeni ak maat ne liplibeni ko punei kwenutap panyechooto.

¹⁸ Eng' peetuunooto, ko ki iyomiskei Kamuktaindet ne Toroor ak Abram, kole, “Kaagoochi iyoteng'ung' emoni, kong'etee aineetap Misiri agoi aineet ne oo, aineetap Yufrets,

¹⁹ emetap Kenik, Kenisik, Kadmonik,

²⁰ Hitik, Perisik, Repaik,

²¹ Amorik, Kanaanik, Girgasik, ak Jebusik.”