TAUNET 14 - BUKUIT NE TILIIL Sireet ne Dutero Kanon

Kosaru `Abram Lot

¹ Eng' peetuusyegap Amrapel, laitoryatap Shinar, Ariok, laitoryatap Elasar, Kedolaomer, laitoryatap Elam ak Tidal, laitoryatap Goim,

² ko ki pooryo icheek ak Bera, laitoryatap Sodom, Birisa, laitoryatap Gomorah, Sinap, laitoryatap Adma, Semeba, laitoryatap Seboim, ak laitoryatap Bela (nooto ko Zoar).

³ Kituyechi chuuto tugul atebweetap Sidim (nooto ko Araraita ne po Munyuk).

⁴ Ki oot icheek Kedolaomer kenyiisyek taman ak aeng', ak eng' kenyiitap taman ak somok kongelelso.

⁵ Ki nyo Kedolaomer kobooto laitorinik che ki mi ak ineendet, eng' kenyiitap taman ak ang'wan, kobookyi Repaik eng' Asterot-Karnaim, Susik eng' Am, Emik eng' Sabe-Kiriataim,

⁶ ak Horik eng' emennywa Seir; emetap tuloonook, agoi El-paran, ne neegitee surkwen.

⁷ Yeityo koweek kobwa En-mispet nooto ko Kadesh ak konam kooret tugul ne po Amelegik, ak Amorik ak icheek che ki menyei Hasason-tamar.

⁸ Ki manda laitoryatap Sodom, ak laitoryatap Gomorah, ak ne po Adma, kobooto ne po Seboim, ak laitoryatap Bela nooto ko Zoar kotet lugeet koboryo eng' atebweetap Sidim,

⁹ ak Kedolaomer, laitoryatap Elam, Tidal, laitoryatap Goim, Amrapel, laitoryatap Sinar, Ariok, laitoryatap Elasar; laitorinik ang'wan eng' laitorinik muut.

¹⁰ Ki nyiitaat keringonigap meneet atebweetap Sidim, ak ye kingo mweitos laitorinigap Sodom ak Gomorah, ko ki rorokyi olooto, ko che kichililso kogimwechi tuloonook parak.

¹¹ Ak ki ip tuguuk tugul che po Sodom ak che po Gomorah, kobooto amitwogikwak tugul, ak koba pandanywa.

¹² Ki nam ak komut Lot, weeriitap ne tupcho ak Abram agine, ne ki menyei Sodom, kobooto tuguukyik, ak koba.

¹³ Ki nyo chii ne kigachilil ak komwachi Abram Hebranindet, ne ki menyei ole neegitee keetiigap Mamre Amorindet, ne tupcho ak Eskol ak Aner che icheeget ko ki pooto che kiting'egei kasyinet ak Abram.

¹⁴ Ye kingo kas Abram kole kagenam ak kemut chiitap ooreennyi, koawen kobooto otwogikyik che po lugeet che ki kisikyin koonnyi, che eng' tugul ko ki pogol somok ak taman ak sisiit, ak korwai koosup agoi Dan.

¹⁵ Eng' kemoi, ko kipchei piikyik `Abram asi kobookyi ak koterteer puunik. Ki isup icheek agoi koit Hoba murot kaataam ne po Damasko.

¹⁶ Ki sar ak koweech tuguuk tugul kobooto chebyosok ak piik. Ki sar Lot ne po ornywa agine ak tuguukyik.

Koberuuri `Melkisedek Abram

¹⁷ Ki mong' anyun laitoryatap Sodom kotorook ineendet, ye ki weeksei ko kagoterteer Kedolaomer ak laitorinik che ki miitei kobooto ineendet, eng' atebweetap Sabe (nooto ko atebweetap laitoryat).

¹⁸ Ki ibu Melkisedek laitoryatap Salem magatiinik ak divaik; ineendet ko ki tisiindetap Kamuktaindet Ne Toroor Miising'.

¹⁹ Ak ki iberuur Abram kole, “Iberuuroge Abram eng' Kamuktaindet Ne Toroor Miising' ne ki yai parak kipsengwet ak ng'wony!

²⁰ Ingoberuurok Kamuktaindet Ne Toroor Miising', ne kaimut ak konde puuniguk euneguk!” Ak ki igoochi `Abram Melkisedek kebeberta ne po taman ne po kiy tugul.

²¹ Ki leenji `laitoryatap Sodom Abram, “Koono piik, ak iip inyee tuguuk kobunjiin.”

²² Ki wolji `Abram laitoryatap Sodom koleenji, “Kaaitoochi eunnyu Kamuktaindet ne Toroor, Ineendet Ne Toroor Miising', ne ki yai parak kipsengwet ak ng'wony,

²³ ale ma name kiy age tugul ne neng'ung', ngo porowet anan ko ineet, si ma tuun imwa ile, ‘Ki ayai Abram koek mogoryo.’

²⁴ Ma yani kiy kobatee chooto che ki kaam parnotikyuk, ak motweetap parnotik che kiga kibe tugul, Aner, Eskol ak Mamre. Ingoip icheek kebebertanywa.”