SIRAK 51 - BUKUIT NE TILIIL Sireet ne Dutero Kanon

Saaetap Joshua weeriitap Sirach

¹ Amwaun kongoi, ee Kiptaiyat ak ko Laitoryat, ak alasun, ee Kamuktaindet, Sarunindennyu. Atoroori kaineng'ung',

² amu ki egu riibindennyu ak toretindennyu ak isarwo eng' ng'emisyet ak eng' mesteet ne ki riich eng' ng'elyepta ne po chubisyet, eng' kutusweek che tau lembechek. Eng' taitap puunikyuk ko ki iegu toretindennyu

³ ak ityaacha, eng' ooindap rireeneng'ung' ak agobo kaineng'ung', eng' kelek che ng'aise che neegit kowoong'wo, eng' eunegap che cheeng'ei saboondanyu eng' nyalilwogik che chaang' che ki amuitechi;

⁴ eng' maat ne kayema eng' komosta age tugul, ak eng' kwenutap maat ne tomo amis,

⁵ eng' kwenutap ye mi che ki kobek, eng' ng'elyepta ne murwoon ak ng'aleegap lembech,

⁶ eng' chombilisyetap ng'elyepta ne ma po iman ne ityin laitoryat. Ki riikta saboondanyu meet, ak ki mi saboondanyu ye mi che ki kobek ng'wony oriit.

⁷ Ki yema icheek eng' komosta age tugul, ak ma piit chii ne ki toreto. Ki aagen anyoor toretetap kipkosabei, ak ki ma asich.

⁸ Ki abwaat anyun rireeneng'ung', ee Kiptaiyat, ak poisyeng'ung' ne ki mi kobooch keny, amu isaru chooto che imang'un ak isaru icheeget eng' eunegap puunikwak.

⁹ Ki ayoogu saautikyuk eng' ng'wony, ak asoom isarwo eng' meet.

¹⁰ Ki ariirchin ale, “Kiptaiyat inyee ko ii kwandanyu; mat imeto eng' peetuusyegap nyalilda, ye ma mi toreteet ne kigoochin menotyot.

¹¹ Alasu kaineng'ung' kotugul, ak atyenun tyenwogigap mwaetap kongoi.” Ki kasak saaennyun,

¹² amu ki isarwo eng' ng'emisyet ak isarwo eng' kasarta ne po nyalilda. Amwaun kongoi ak alasun amu niito, ak atoroori kainetap Kiptaiyat.

Tyendo agobo ng'omnateet

¹³ Ye kita koaming'in, kotoom atau panwekyuk, acheeng' anyun utaatyet eng' saaennyun.

¹⁴ Ye ki ami tai hekaluut ko ki acheeng' agobo ineendet, ak acheeng'e agobo ineendet agoi let.

¹⁵ Kobooch ko kayesyo taaptook agoi ko karuryo sabibuk ko ki aboiboenji ng'omnateet eng' muguleldanyu. Ki wendotee keldanyu ooreet ne litit; kobooch mining'atennyu ko ki asup kakwautikyik.

¹⁶ Ki aep iit kitigin ak ataach ng'omnateet ak ki anyoorchigei kaneetisyet ne oo.

¹⁷ Ki atestai eng' ineendet, ineendet ne koono utaatyet atoroori.

¹⁸ Ki atil asap ko uu utaatyet, ak ki amach miising' ayai ne myee ak ma koi alilan.

¹⁹ Ki mach saboondanyu kosich utaatyet, ak ki ariipkei eng' ateptonyu. Ki aitoochi eunekyuk kipsengwet ak ariir amu abusnatennyu agobo ineendet.

²⁰ Ki andochi saboondanyu kotokyigei ineendet, ak eng' lititindo ko ki asich ineendet. Ki anyooru kaguiyet kobun ng'omnateet kong'etee taunet, ko uu nooto koma koi kibagaaktaa.

²¹ Ki ichiicho muguleldanyu acheeng' ineendet, nooto amu nee atinye nguno mogornateet ne oo.

²² Ki koono Kiptaiyat ng'elyeptanyu koek konunotyot, ak alasunee niito ineendet.

²³ Obwanjo okweek che mo tinye naet, ak omeny eng' kootap kaneetisyet.

²⁴ Amu nee si omwaimwae ole mongen tuguuchuuto, ak amu nee si omuitechi melelda ne oo?

²⁵ Ki ayaat kutinnyu ak amwa ale, Cheeng'jingei utaatyet ameboisyee robiinik.

²⁶ Ochopchi katwekwok choginnyi, ak ochamji mugulelwekwok konyoor kaneetisyet; kinyooru ng'omnateet eng' ye neegit.

²⁷ Ogeerchingei okweek ole ka ayai poisyet ne ming'in ak asikyigei kaalyeet ne oo.

²⁸ Kas kaneetisyennyu ne ma oo, ak onyoorchinigei fedha ak thahabu eng' anee.

²⁹ Ingoboiboen saboonwekwok eng' riirenosyegap Kamuktaindet, ak mat olilan ye olasu ineendet.

³⁰ Oyai poisyeng'wong' eng' kasarta ne myee, ak konook Kamuktaindet melekto eng' kasartanyi.