SIRAK 50 - BUKUIT NE TILIIL Sireet ne Dutero Kanon

Simion Weeriitap Onias

¹ Kandoindetap tupchosyekyik ak kalasunetap piikyik ko tisiindet ne oo, Simion weeriitap Onias. Eng' sabeennyi ko ki teech kogeny koot, ak ko ng'oot hekaluut.

² Ki lumda lumeiywegap inatusyek aeng' che torooreen, inatusyek che torooreen che kigereen hekaluut.

³ Eng' peetuusyekyik ko ki pal keriingetap peek ole kigonoree peek ko uu nyanjet eng' yemet.

⁴ Ki ibwaat ole saruundoi piikyik eng' ng'emisyet, ak ki teech kogimit nganaseet si ma kibookyi.

⁵ Ki teegisoot ne tya inee ko kamutyi piik, ye ki mong' saang' kobunu koot ne po angeet.

⁶ Ki uu taboiyat ne po karon eng' poolik, uu arawet ne kagoeet eng' kasarta ne po igoorto.

⁷ Ki uu asiista ne iluu eng' hekaluutap Ne Toroor Miising', uu chepkuinaboor ne taagu eng' poolik che korooron;

⁸ uu taaptook che korooron eng' peetuusyegap logoek che tai, uu taaptook eng' ye mi peek che kuutu, uu sogoot ne kaing'at eng' Lebanon eng' peetuutap purgeiyet,

⁹ uu maat ak nyamdutik eng' tereet, uu kiit ne ki kitany ne po thahabu ne ki kilelesanjine koik che po kamanuutyet.

¹⁰ Uu keetitap mseituni ye yiei logoek, ak uu piribirinik che kooen kotokyingei poolik.

¹¹ Ye ki ilaach ngoryennyi ne kooi ne karaaran, ak kolaachkei eng' korooronindo ne oo, ye kitogosta kwo kaptisisyet ne tiliil ko ki yai koot ne po ole-tiliil ko karaaranit kot.

¹² Ye kitaach kebeberwek eng' eunegap tisiik, ko uu ye kitononi eng' ye neegitee kaptisisyet ko kaiyem `tupchosyekyik ineendet ki uu ineendet tarakwet eng' Lebanon ne kaiyem musugenigap tiironigap sosik.

¹³ Weeriik tugul che po Aron eng' korooronindanywa ko ki tinyei kagoochinetap Kiptaiyat eng' eunekwak eng' taitap tuiyet komugul ne po piigap Israel.

¹⁴ Kingo kees poisyet eng' kaptisisyet, ak kotet kagoochinet ne po Ne Toroor Miising', inee Ne po Kamuktaet

¹⁵ koyogoito eunnyi konamee kigombet ak koroong'ji kagoochinet ne ki ee ne po peegap sabibuk; ki raang'da koba kelutap kaptisiisyo, koek kiit ne ng'uu ne anyiny eng' Ne Toroor Miising', laitoryatap tugul.

¹⁶ Ki polyo anyun weeriigap Aron; ki kuut igondisyekwak che po karnook che ki kitany; ki kasak miising' cheetap igondisyek koek kabwaatet eng' taitap Ne Toroor Miising'.

¹⁷ Ki ibutyo piik tugul anyun kibagenge, kobutyi ng'wony eng' togoochikwak kosa Kiptaiyandennywa, Ne po Kamuktaet, Kamuktaindet Ne Toroor Miising'.

¹⁸ Ki ilas anyun `tyeniik ineendet eng' tuugoosyekwak eng' tyenwogik che anyiny ak tuugoosyek che sutotin.

¹⁹ Ki igoito `piigap Kiptaiyat Ne Toroor Miising' saautikwak eng' taitap ne tinyei rireenet, agoi let ne po kasubetap otisyetap Kiptaiyat, ak kogees anyun `icheek tetutyennyi.

²⁰ Ki choorgei anyun Simion ak ko iito eunekyik ko itochi paragutap tuiyet komugul ne po piigap Israel, komwaita kaberuretap Kiptaiyat eng' kutinnyi, ak kotoroor kainennyi.

²¹ Ki ing'uruuk ne po aeng' eng' saaet, kotaach kaberuret kobun Ne Toroor Miising'.

Kaberuuret

²² Olasu nguno Kamuktaindetap tugul, ne yae poisyonik che eecheen eng' olda tugul; ne riibei sabeennyo kong'etee sigeet, ak koyaiywech ko uu rireenennyi.

²³ Ngo koonech poiboindap muguleldo, ak kobiit kaalyeet eng' peetuusyekyok eng' Israel, ko uu eng' peetuusyek che po keny.

²⁴ Ngo koonech acheeget rireenennyi, ak kotyachech eng' peetuusyekyok.

²⁵ Mi pororyosyek aeng'u che aweche, ak ne po somok koma nyoljin keguure agot poror.

²⁶ Chooto meng'iisyei eng' tulweetap Seir, ak Philistiik, ak piik che perber che meng'iisyei eng' Shekem.

²⁷ Kaneetisyet eng' kaguiyet ak naet kaasir eng' kitabuuni. Joshua weeriitap Eleazar weeriitap Sirach ne po Jerusalem ne muguleldanyi ko roong'u utaatyet.

²⁸ Poiboi icheek che ibwaatati tuguuchuuto, ak icheek che riibei eng' mugulelwekwak koegu che utaatiin.

²⁹ Ngot konde icheek poisyonik kaneetisyosyek koma mi kiy ne temenee icheek, amu kayweetap Kiptaiyat ko ooreenywa.