SIRAK 49 - BUKUIT NE TILIIL Sireet ne Dutero Kanon

Josiah ak alak

¹ Kainetap Josiah ko uu puruchenigap nyamdutik che kachop chii ne utaat, kabwaatennyi ko anyiny ko uu kumyat eng' kutit age tugul, ak ko uu tyenwogik eng' igoorto ne po divaik.

² Ki yai nooto po iman ye ki ipchi piik waleet, ak koisto tuguuk che kiweche che po yaityet.

³ Ki punji iman eng' Kiptaiyat, eng' kasarwek che ki mi ngelelnatet ko ki yai kobiit kayweetap Kamuktaindet.

⁴ Kobatee Daudi ak Hezekiah ak Josiah kityo, ko laitorinik chuun tugul ko ki kiptengeginik che eecheen, amu ki meto ng'atuutyetap Ne Toroor Miising'; ki ek laitorinigap Judah che po let.

⁵ Ki igoochi kamugennywa piik alak, ak kogoochi toroornatennywa pororyet ne too,

⁶ ne ki peel nganaseet ne lewenot ne po ole-tiliil, ak koyai ortinwekyik koguber, ko uu ye kigasip komwa Jeremiah.

⁷ Kiga konyaliil `icheek ineendet, ne agot komi moetap kamet ko kiga kitabaan ko maotyot, kotut ak kong'em ak kogeny koteech ak komiin.

⁸ Ki Ezekiel ne ki keer ng'ang'utyetap toroornatet, ne ki iboorchi `Kamuktaindet ineendet komi paragutap chepkichutitap cherubim.

⁹ Ki ibwaat Kamuktaindet kogeny Job, ne ki riip ortinwek tugul che po imanda.

¹⁰ Ngo riibok kaweegap maotik taman ak aeng', kobiit sabeet ne leel eng' ole rue icheek, amu ki igaigai piigap Jakobo ak kotyach kogoochi icheeget kamang'unet.

Zerubabel ak Joshua

¹¹ Kilasundoi ano Zerubabel ki kergei ak peteitap ng'ookset eng' eutap tai,

¹² ak uu nooto Joshua weeriitap Jozadak. Eng' peetuusyekwak ko ki teech koot ak koteech hekaluut ne tiliil koteekyi Kiptaiyat, ne ki kichopchi toroornatet ne po koigeny.

¹³ Kabwaatetap Nehemiah kogeny ko tebyei agoi, ki itononsi inatusyek, ak koteech ormariichok ak rateiywek, ak koteech kogeny kooriik che kiga kobutok.

Poisyek che po keny

¹⁴ Ng'ering' che ki kiyai eng' ng'wony ko uu Enok, amu ki kimutineendet kotogosta parak eng' ng'wony.

¹⁵ Anan ma mi ne kigesich ko uu Joseph, agot kaweekyik ko riibotin.

¹⁶ Shem ak Seth ak Enosh ko ki konyitootin, ago ne siirei tugul che saptos che ki kiyai ne ki konyitoot ko ki Adam.