SEKARIA 6 - BUKUIT NE TILIIL Sireet ne Dutero Kanon

Ng'ang'utyetap sisiit: Kariisyek ang'wan

¹ Ki ang'eet met kogeny, ak ogeero! Ki ageer kariisyek ang'wan che po lugeet kobwanei kobunu kwenutap tuloonook aeng'; ak ki po sugunwet tuloonoochooto.

² Ki piriireen paraisisyek che po chepkichutit ne po tai, ak kituuen paraisisyegap chepkichutit ne po aeng';

³ ak ki leelach paraisisyegap chepkichutit ne po somok; ak kibusyenen ak ko murwonen paraisisyegap chepkichutit ne po ang'wan.

⁴ Ki awolji ateebee anyun malaikaiyat ne ki ng'alaalwo aleenji nee chu o, kiptaiyandennyu?

⁵ Ak ki wol malaikaiyat koleenjo chuuto ko usoonaik ang'wan che po kipsengwet che pendi eng' ole katonone eng' taitap Kiptaiyat ne po ng'wony komugul.

⁶ Wendi chepkichutit ne po paraisisyek che tuuen kotokyingei emet ne po murot kaataam; ak ki pa che leelachen koosup chooto, ak ki pa che pusyenen kotokyigei emet ne po murot tai.

⁷ Ak ki pa paraisisyek che murwonen, ak komach koba kobendatee ng'wony tugul: ak ki mwa kole oba eng' olito, obendate ng'wony tugul. Kibendat anyun eng' ng'wony tugul.

⁸ Ki kuuro anyun ak koleenjo, Keero, kagogaigai kabuusennyu icheek che kaba kotokyigei murot kaataam eng' emet ne po murot kaataam.

Kilaakyin Joshua chepkulet

⁹ Ak ki nyoonjo ng'olyootap Kamuktaindet ne Toroor koleenjo,

¹⁰ Imut piik alak eng' che ki kiluul, che po Heldai, ak che po Tobija, ak che po Jedaiah; ak inyoo eng' peetuunooto, ak iwe agoi kootap Josiah weeriitap Zephaniah, ole kobunu icheek ye kingo punu Babilon.

¹¹ Ee, ibe icheek fedha ak thahabu, ak iyae chepkuloik, yeityo igerchinee metitap tisiindet ne oo, Joshua weeriitap Jehosadak;

¹² ak imwachi ineendet ileenji mwaei Kamuktaindet ne Toroor ne po lugoosyek ko uu ni kole keero, chiito ne kiguure kainennyi Temet; eetu eng' oldanyi, ak koteech Hekaluutap Kamuktaindet ne Toroor:

¹³ ee, ineendet ne teechei Hekaluutap Kamuktaindet ne Toroor; ak konam toroornatet, ak kotebee ng'echerennyi ne po laitornatet, ak kobounis; ak koek tisiindet eng' ng'echerennyi ne po laitornatet, ak kotebee kirwoogetap kaalyeet kwenunnywa icheek tuwai.

¹⁴ Ak kobunjin chepkuloichooto Helem, Tobija, Jedaiah, ak Hen weeriitap Zephaniah, koek kabwaatet eng' Hekaluutap Kamuktaindet ne Toroor.

¹⁵ Ak kobwa icheek che mi ole loo ak koteech Hekaluutap Kamuktaindet ne Toroor, ak onai ole ki iyookwo Kamuktaindet ne Toroor ne po lugoosyek anyo ole omi. Ak isuldoi niito, ngot ogas iit eng' kagiiletapkei kutitap Kamuktaindet ne Toroor Kamuktaindeng'wong'.