SEKARIA 5 - BUKUIT NE TILIIL Sireet ne Dutero Kanon

Ng'ang'utyetap lo: Bukuit ne mamanat ne tirireni

¹ Ki ang'eet met anyun kogeny ak ageerte, ak ogeero, kitabuut ne mamanat ne tirireni.

² Ak kitep koleenjo, Igeere nee? Ak ki awolji aleenji, Ageere kitabuut ne mamanat ne tirireni; koindonyi ko mitainik tiptem che po euut, ak tebeesindanyi ko mitainik taman che po euut.

³ Kimwaiwo anyun koleenjo, Niito ko chubisyet ne wendi koyomu emet komugul: amu age tugul ne choorsei keistoi eng' komosi ko uu ye mwaei; ak age tugul ne iyastos keistoi eng' komosin ko uu ye mwaei kitabuunooto.

⁴ Ayooktoi kitabuunooto, mwaei Kamuktaindet ne Toroor ne po lugoosyek kochut kootap choriindet, ak kochut kootap chiito ne iyastos lembechek eng' kainennyu: ak kotebee kwenutap koonnyi, ak kogees koyooto kobooto keetiikyik ak koikyik.

Ng'ang'utyetap tisap:

⁵ Ki wo anyun malaikaiyat ne ki ng'alaalwo, ak koleenjo, Ing'et metit ak igeer kioto wendi.

⁶ Ak ki atep ale, Nee nooto? Ak ki leenjo niito ko kerebet ne wendi. Ki le kogeny, Ni ko kergeindonywa eng' emet tugul:

⁷ ak ogeero, ki kinamji parak talendait ne po ngosyelait: ak kimi kwondo ne tebyei ng'wony eng' kerebet oriit.

⁸ Ak ki le, Niito ko Yaityet; ak ki wiirchi ineendet kerebet oriit: yeityo konde ngosyelait ne nyigiis kutitap kioto.

⁹ Ki ang'eet met anyun ak ogeero, ki ageer kwonyiik aeng' kobwanei tai ak ki mi usoonet kebebaikwak. Ki tinyei kebebaik che uu kebebaigap chebo kibabaa, ak ki namji parak kerebonooto eng' kwenutap ng'wony ak kipsengwet.

¹⁰ Ki aleenji anyun malaikaiyat ne ki ng'alaalwo, “Ibei kerebet kwo ano?”

¹¹ Ak ki leenjo, Kwo koteekyine koot eng' emetap Sinar: ak ye kagochobok, kinde yooto si kotebee koek oldanyi.