SEKARIA 4 - BUKUIT NE TILIIL Sireet ne Dutero Kanon

Ng'ang'utyetap muut: Keldap tait ak keetiigap emitik

¹ Ak ki nyo kogeny malaikaiyat ne ki ng'alaalwo, ak kong'eeta ko uu chiito ne king'eeti eng' rwondanyi.

² Ak ki leenjo, Igeere nee? Ak ki ale, Kaageer, ak keero, keldap tait ne po thahabu tugul, kotinyei taabeennyi eng' paragunnyi, kobooto taisyek tisap che po keloto po tait; ki tinyei tait age tugul kirondoik tisap che mi paragunnyi:

³ ak kimi mseituni aeng'u ye neegitee tainooto, kimi age komostap tai ne po taabeet, komi age komostanyi ne po kaataam.

⁴ Ak ki awolji malaikaiyat ne ki ng'alaalwo aleenji, Nee chu o kiptaiyandennyu?

⁵ Kowol anyun malaikaiyat ne ki ng'alaalwo, koleenjo, Tos mengen kiit ne po tuguuchu? Ak ki ale, Achicha, kiptaiyandennyu, mangen.

⁶ Kowol koleenjo, “Ni ko ng'olyootap Kamuktaindet ne Toroor ne mwachin Zerubabel koleenjin: Ma eng' kamuktaet, ama eng' kimnateet, ago eng' Kabuusennyu ne Tiliil, mwaei Kamuktaindet ne Toroor ne po lugoosyek.

⁷ Ii ng'oo, ee tulwooni oo? Iegu warenget eng' taitap Zerubabel: ak inemu koita ne po parak kowaaktos koleen, Myeeindo, myeeindo, ingotebee paragunnyi.”

⁸ Ki nyoonjo kogeny ng'olyootap Kamuktaindet ne Toroor kole

⁹ ki lumei Zerubabel lumeiywotap koi; ak ko eunekyik che igeesu kogeny; ak inai ile Kamuktaindet ne Toroor ne po lugoosyek ne ki iyookwo anyo ole omi.

¹⁰ Amu ng'oo ne ki kosas peetuutap tuguuk che mengeechen? Amu tuun poiboitu icheek, ak kogeer kiit ne kilititisye eng' eutap Zerubabel. Komwaiwa malaikaiyat kole, “Tuguuchu tisap ko konyegap Kamuktaindet ne Toroor; pendoti chooto eng' ng'wony komugul.”

¹¹ Ki ateebee anyun ineendet aleenji, “Nee emitichu aeng'u mi komostap tai ne po keldap tait ak komi komostanyi ne po kaataam?”

¹² Ak ki ateebee ne po aeng' aleenji ineendet, Po nee temenichu aeng'u che po mseituni, che mi ole neegitee kirondoik aeng' che po thahabu che rong'u mwanik?

¹³ Ak ki wol koteebena kole mengen kiit ne po chuuto. Ak ki ale, Achicha, kiptaiyandennyu, mangen.

¹⁴ Koleenjo anyun, Chuuto ko weeriik aeng' che po mwanik, che tonone ole neegitee Kiptaiyat ne po ng'wony komugul.