SEKARIA 13 - BUKUIT NE TILIIL Sireet ne Dutero Kanon

¹ Tuun kiyaatyin kootap Daudi ak piik che menyei Jerusalem, kondametutap peek eng' peetuunooto, amu tengekto ak murwoonindo.

² Ak mwaei Kamuktaindet ne Toroor ne po lugoosyek kole tuun aistoi eng' peetuunooto kainaigap kanamonik eng' emet, ama kibwaati kogeny: ak aiste kogeny maotik ak tamirmiryet ne murwoon eng' emet.

³ Ak ngot ko tuun komaoten age tugul, koleenji anyun kwanda ak kamet che kisichei chiichooto, Mesabe; amu imwae lembechek eng' kainetap Kamuktaindet ne Toroor: ak kotoor ineendet kwanda ak kamet che kisichei ineendet, ye kamaoten.

⁴ Ak tuun ililandos maotik eng' peetuunooto, ililani age tugul agobo ng'ang'utyennyi, ye kamaoten; ama kolaachi ngoryeet ne sabul si kobiit koberber piik:

⁵ ago mwaei kole ma aa maotyot, aa kabatindet; amu ki kiyaa aek otwogindet kobooch ming'inatennyu.

⁶ Ak keteebe keleenji, Po nee perutichu mi euneguk? Kowol anyun kole po perutichu kaguotenet ne ki kiguotena eng' kootap choronokyuk.

⁷ Ng'eet, ee rotwetap chok, porye mestowondennyu, porye chiito ne ki mi tuwai, mwaei Kamuktaindet ne Toroor ne po lugoosyek: pir mestowot, si koiyesta keechiirek; ak atokyi eunnyu che mengeechen.

⁸ Ki istoi, ak kobek eng' peetuunooto eng' emet komugul, kebeberwek aeng', mwaei Kamuktaindet ne Toroor; ago kibagakyin olooto kebeberta agenge eng' somok.

⁹ Ak amut kebeberato po somok kobun maat, ak atiliil icheek ko uu ye kitiliili fedha ak atyem icheek ko uu ye kityemei thahabu: kuurei icheek kainennyu, ak agas icheek: amwae ale, Icheeget ko piikyuk; ak kole, Kamuktaindet ne Toroor ko Kamuktaindennyu.