SEKARIA 12 - BUKUIT NE TILIIL Sireet ne Dutero Kanon

Katerteerisyet ne piitu eng' Jerusalem

¹ Nyigiisindap ng'olyootap Kamuktaindet ne Toroor agobo Israel.

² Mwaei Kamuktaindet ne Toroor, ne iitoi kipsengwet, ak kolumei lumeiywotap ng'wony, ak koyaei muguleldap chii eng' oriitap chiichooto, ko uu ni kole: Ogeero, ayae Jerusalem koek kigombet ne po terteryotet eng' piik tugul che mi komoswekyik tugul, egu ko uu nooto eng' Judah agine eng' peetuusyek che kiyiemei Jerusalem.

³ Ak ayae Jerusalem eng' peetuunooto koek koita ne nyigiis ne iimi piik tugul; nyooru perutik che chaang' icheek che kanabi koyato: ak koyumjigei ineendet pororyosyek tugul che po ng'wony.

⁴ Mwaei Kamuktaindet ne Toroor eng' peetuunooto kole, agoochini paraisiit age tugul kokwong', ak abire iywek chiinyi ne laanyei: ak ayaat konyekyuk ageer kootap Judah, ak abire korateet paraisiit age tugul ne po pororyosyek.

⁵ Ak komwa pounigap Judah eng' mugulelwekwak kole, piik che menyei Jerusalem ko kimnateennyu eng' Kamuktaindet ne Toroor ne po lugoosyek, Kamuktaindennywa.

⁶ Ayae eng' peetuunooto pounigap Judah koigei rokyietap maat ne mi kweenik, ak koigei kegenget ne mi kwenutap ratuutigap peek; ak kogees piik tugul che mi komoswek tugul che mi eutap tai ak che mi murot kaataam: ak komeny Jerusalem kogeny komostanyi, nooto ko Jerusalem.

⁷ Sip kosaru Kamuktaindet ne Toroor emaisyegap Judah, si ma eet toroornatetap kootap Daudi ak toroornatetap piik che menyei Jerusalem, kosiir Judah.

⁸ Riibei Kamuktaindet ne Toroor eng' peetuunooto piik che menyei Jerusalem; ak koigei ne nyalulat eng' icheek Daudi eng' peetuunooto; ak koigei kootap Daudi Kamuktaindet, ko uu malaikaiyatap Kamuktaindet ne Toroor ne mi tainnywa.

⁹ Ak acheeng' abar eng' peetuunooto pororyosyek tugul che ibookyin Jerusalem.

¹⁰ Ak ande muguleldap myeeindo ak ne po saaet kootap Daudi, ak piik che menyei Jerusalem, ak konyala icheek che kitoora: ak kootee agobo ineendet ko uu ye iteei chii agobo weeriinnyi ne ki kiii inegeik ak konyo ng'wanindo agobo ineendet, ko uu ineendet ne mi eng' ng'wanindo agobo taaitanyi.

¹¹ Piitu eng' peetuunooto kateeiyet ne oo eng' Jerusalem, ne uu kateeiyetap Hadadrimon eng' atebweetap Megidon.

¹² Ak kootee emet, iteei ooreet age tugul ineegei; iteeitos che po kootap Daudi icheegei, ak kooteeiyo osotikwak icheegei; iteeitos che po kootap Nathan icheegei, ak kooteeiyo osotikwak icheegei;

¹³ iteeitos che po kootap Lawi icheegei, ak kooteeiyo osotikwak icheegei; iteeitos che po kootap Shimei icheegei, ak kooteeiyo osotikwak icheegei;

¹⁴ iteeitos ortinwek tugul che kang'et, iteei ooreet age tugul ineegei, ak kooteeiyo osotikwak icheegei.