SEKARIA 11 - BUKUIT NE TILIIL Sireet ne Dutero Kanon

Kabutetap che kiimeen

¹ Yaat kurgotiguk, ee Lebanon, si kobeel maat taragoniguk.

² Waach, ee piribiryoni, amu kagobut tarakwet, amu kageng'em che korooron: owaach, ee keetiigap Bason, amu kagoluul osneet ne kiim.

³ Kutitap mestoweek che waaktos! Amu kageng'em toroornatennywa; kutitap ng'etuunyik che neran che porisendos! Amu kageng'em menoteetap Jordan.

Mestoweek aeng' che teer

⁴ Kamwa Kamuktaindet ne Toroor Kamuktaindennyu kole: “Iyage akweetap keechiirek che kienyei.

⁵ Icheek che alei ko enyei ak koba koma nyoor kergong'yet. Che aldoi komwaei koleen, ‘Iberuurot Kamuktaindet ne Toroor, amu ka aa egu mogoryo’; ak ma riiree mestowekwak icheek.

⁶ Amu ma ariiree kogeny piik che menyei emoni, mwaei Kamuktaindet ne Toroor. Agoitoi chii tugul kwo eutap chiitap kokwennyi ak agoite kwo eutap laitoryannyi: ak kobar emet, amasaru icheek eng' eunnywa.”

⁷ Ki ayage anyun akweetap keechiirek che kienyei, keechiirek che nyerootiin iman. Ki aip anyun kirokweek aeng'; ki aguure age Myeeindo, aguure age Ratuutik; ak ki ayage akweet.

⁸ Ak ki ang'em mestoweek somok eng' arawet agenge; amu kigong'et saboondanyu agobo icheek, ak kowecho kogeny saboonwekwak.

⁹ Ki amwa anyun ale, maayagok: ingome ne meei; ak ingebar ne kibarei; ak ingoam age tugul eng' che kang'et panyeegap age.

¹⁰ Ak ki anam kiroktonyu Myeeindo, ak aep apcheune aeng', si kobiit abut kayomisennyu ne ki kiyomiskei kobooto pororyosyek tugul.

¹¹ Ak kibutok eng' peetuunooto: ak ki nai anyun che nyerootiin che po akweetap keechiirek, che ki epcha iit, kole ki ng'olyootap Kamuktaindet ne Toroor nooto.

¹² Ak ki aleenji icheek, Ngot obwaat ole myee, ogoono melektanyu; ak ngo ma uu nooto, ko matogoono. Kogerwo anyun fedhaisyek sosom koek melektanyu.

¹³ Ak ki leenjo Kamuktaindet ne Toroor, Wiirchi cheptereniot, nooto ko alyet ne myee ne kigamannywa. Ki aip anyun fedhaisyechooto sosom, ak awirchi cheptereniot eng' kootap Kamuktaindet ne Toroor.

¹⁴ Yeityo aep apcheune aeng' kiroktonyu age, nooto Ratuutik, si kobiit ang'etii tupchondit ne ting'egei Judah ak Israel.

¹⁵ Ak ki leenjo Kamuktaindet ne Toroor, Nam kogeny tuguugap mestowot ne perber.

¹⁶ Amu, keero, ang'eeti mestowot eng' emoni, ne marutochin che kigeon, ama cheeng'ei che kiyesta, anan konya ne kigoil; ama paei ne chamegei, ago amei panyeegap che neryootiin, ak kobetabet siyookwak.

¹⁷ Pwo! Mestowot ne ma tilei kiy ne pagaktoi akweet! Ingooep rotwetap chok eunnyi ak kobol kondanyi ne po tai, ingoyaamei eunnyi ak kogor kondanyi ne po tai.