ROMANIK 5 - BUKUIT NE TILIIL Sireet ne Dutero Kanon

Kiit ne pitunee kayaneet

¹ Ki tinyei kaalyeet ak Kamuktaindet eng' Kiptaiyandennyo Jeso Kristo amu ki kiityech imanda eng' kayaneet;

² ak ki kenyooru eng' ineendet agine kemong'ji eng' kayaneet myeinooto kitonone; ak ongeboiboitu eng' kamang'unetap toroornatetap Kamuktaindet.

³ Ak ma uu nooto kityo, ago ongeboiboitu eng' nyalilwogikyok: kingen keele ibu nyalilda muitaet;

⁴ ak ibu muitaet tyemisyet; ak ibu tyemisyet kamang'unet:

⁵ ma koonu kamang'unet kililan; amu kigerong'ji chamyetap Kamuktaindet mugulelwekyok eng' Kabuuset ne Tiliil ne kigegoonech.

⁶ Amu ye kita ko kinyalulyotin, kome Kristo agobo che yaacheen eng' peetuut ne kiga kelewen.

⁷ Amu pichiy kome chii agobo chii ne po imanda: ago abeere kanyei chiito age kome agobo chii ne myee.

⁸ Ago iboorwech acheek Kamuktaindet chamyennyi, amu ye kita ko ki kiptengeginik, kome Kristo agobo acheek.

⁹ Ak ne siirei miising' anyun, ko kagiityech imanda eng' korotiikyik, kesarwech eng' nereegegap Kamuktaindet eng' ineendet.

¹⁰ Amu ye kita ko ki puunik, ko ki kituiyech ak Kamuktaindet eng' meetap Weeriinnyi, ne siirei miising' anyun, koga kituiyech, kesarwech eng' saboondanyi.

¹¹ Ak ma uu nooto kityo, ago kiboiboi agacheek eng' Kamuktaindet eng' Kiptaiyandennyo Jeso Kristo, amu ki kenyooru eng' ineendet katuiyet.

Adam ak Kristo

¹² Nooto anyun, ko uu ye ki mong'ji ng'wony tengek eng' chiito agenge, ak meet amu tengek; koityi anyun meet piik tugul, amu ki yai tugul tengek

¹³ amu ki mi ng'wony tengek agoi koit Ng'atuutik, ago ma kiiti tengek ye ma mi ng'atuutik.

¹⁴ Ago kiboi meet kobooch Adam agoi Musa, agot eng' icheek che ki ma yai tengekto ne kergei ak pistoetap Adam, ne ki itoondap ineendet ne kitun konyo.

¹⁵ Ago ma uu pistoet, konunetap chamyet. Amu ngo ki pek che chaang' eng' pistoetap agenge, ko kitesak miising' kosiir eng' che chaang', myeeindap Kamuktaindet, ak konunet eng' myeeindap chiito agenge, Jeso Kristo.

¹⁶ Ak ma kergei kiit ne pitunee konunet ak kiit ne pitunee tengektap chiito agenge: amu ki nyo kirwooget eng' agenge agoi kagikyinet, ago ki nyo konunetap chamyet eng' pistautik che chaang' agoi kaiityinetap imanda.

¹⁷ Amu ngo kiboi meet eng' pistoetap agenge; ne siirei miising' anyun, kobou eng' saboondo icheek che taachei chaang'indap myeeindo ak konunet ne po imanda eng' agenge, nooto Jeso Kristo.

¹⁸ Nooto anyun, ko uu ye ki nyoonji piik tugul kirwooget agoi kagikyinet eng' pistoetap agenge; ko uu nooto ki nyoonji piik tugul konunet ne kigoitoi puch, agoi kaiityinetap imanda ne po saboondo eng' pistoet agenge ne po imanda.

¹⁹ Amu ko uu ye ki ek che chaang' kiptengeginik eng' pistoetap chiito agenge, ko uu nooto kiyaei che chaang' kobunji imanda eng' kasetap iit ne po agenge.

²⁰ Ak ki nyo Ng'atuutyet, si kobiit kotesak pistoet; ago ye kitesak tengekto, ko kitesak myeeindo miising' kosiir:

²¹ si, ko uu ye kiboi tengekto eng' meet, ko uu nooto pou myeeindo eng' imanda agoi saboondap koigeny eng' Jeso Kristo Kiptaiyandennyo.