ROMANIK 4 - BUKUIT NE TILIIL Sireet ne Dutero Kanon

Kaboorunetap Abraham

¹ Kimwae nee anyun agobo Abraham, kwandanyo, kinyoor nee eng' atebeetap poorto?

² Amu nda kiga kiityi Abraham imanda eng' poisyonik, kotinyei ineendet ne ilasunegei; ago ma eng' taitap Kamuktaindet.

³ Mwaei nee anyun siruutik? Ki iyan `Abraham Kamuktaindet, ak ki kiityi ineendet imanda.

⁴ Ago ineendet ne poisyei, koma kiityin melekto keele po myeeindo, ago po pesendo.

⁵ Ago eng' ineendet ne ma poisyei, ago iyani ineendet ne iityin imanda chii ne ya, kiiti kayanennyi keele po imanda.

⁶ Agot ko uu ye ki mwa Daudi agine agobo kaberuretap chiito ne iityin Kamuktaindet imanda ama eng' poisyonik,

⁷ kole, Poiboen icheek che kigenyochi kaat tengekwogikwak, Ak che kigetuch tengekwogikwak.

⁸ Paibai chiito ne ma tuun iityin kiptaiyat tengekto.

⁹ Tos kimwae kaberuroni agobo che ki kimuratan, anan che ma kimuratan ak icheek? Amu kimwae keele, Ki kiityi Abraham kayanennyi kobunji imanda.

¹⁰ Ki kiityindo ano anyun? Ye kiga kimuratan anan ye kitom kimuratan? Ma eng' kamuratanet, ago ye kitom kimuratan:

¹¹ kitaach kaboorunetap kamuratanet, ng'ookset ne po imandap kayaneet ne ki tinyei ye kitom kimuratan: si kobiit koek kwandap icheek tugul che kiyani, agot ye kitom kimuratan, si kobiit kiityi icheek imanda;

¹² ak koek kwandap che imuratanotiin eng' icheek che ma po kamuratanet kityo, ago che pendi ak icheek eng' tyegutigap kayanonooto po kwandanyo Abraham ne ki tinyei ye kitom kimuratan.

Kayomisetap Kamuktaindet kenyooru eng' kayaneet

¹³ Amu ki ma kigoochi Abraham ak kesweekyik arorutyet eng' ooreet ne po Ng'atuutyet keele kobunji ng'wony, ago eng' imanda ne po kayaneet.

¹⁴ Amu ngot koek che namei tuguuk, icheek che po Ng'atuutyet, ko kagoek puch kayaneet, ak kageyai arorutyet koek ne ma tilei kiy:

¹⁵ amu ibu Ng'atuutyet nereegek; ago ole ma mi ng'atuutyet, koma mi pistoet.

¹⁶ Punu kayaneet amu niito, si kobiit koek ne po myeeindo; si ma walak arorutyet eng' iyoteet tugul; ma chooto po Ng'atuutyet kityo, ago chooto ak icheek che po kayaneetap Abraham, ne kwandanyo acheek tugul

¹⁷ (ko uu ye siraat kole, “Kaayain iegu kwandap pororyosyek che chaang' ”) eng' taitap ne ki koyan ineendet, nooto ko Kamuktaindet, ne isoobi che ki kobek, ak koguurei tuguuk che ma mi, ko uu che mi.

¹⁸ Ki iyan eng' kamang'unet ye ki ma komi kiy ne kimang'u, si kobiit koek kwandap pororyosyek che chaang', kiga kemwa ko uu nooto keele, “Tenitu chooto iyoteng'ung'.”

¹⁹ Ak ki ma nyalul eng' kayaneet ye ki ibwaati poortanyi ne uu ne ki kome, (ye kiga kotar olo po kenyiisyek pogol) ak Sara ne kiga kosiirto peetuusyegap iyoteet:

²⁰ ee, ki ma sage kobistoe ye ki ibwaati arorutyetap Kamuktaindet, ago kitesak kogimit eng' kayaneet, kotoroori Kamuktaindet,

²¹ ak ki ingen komyee kole kiit ne kiga koaror ineendet, komuuchi koyai kosulda.

²² Eng' nooto anyun, ko ki kiityi ineendet imanda.

²³ Ago ki ma kisir agobo ineendet ineegei, keele ki kiityi ineendet;

²⁴ ago amu acheek agacheek, che tuun kiityin, che iyani ineendet ne ki ing'eet Jeso Kiptaiyandennyo komong' eng' che ki pek,

²⁵ ne ki kigoito amu pistautikyok, ak ki king'eet si kobiit kiityech imanda.