ROMANIK 16 - BUKUIT NE TILIIL Sireet ne Dutero Kanon

Kosamei `Paulo Poibe

¹ Kande eunekwok Poibe ne kitupche ne cheboityotap kaniset ne mi Kenkrea:

² ale otaach ineendet eng' Kiptaiyat, ko uu ye nyoljin che tiliileen, ak otoret ineendet eng' kiit age tugul ne magenok; amu ineendet agine ko kitoretindet ne po che chaang', ak kitoreta agane.

³ Ogat Priska ak Aquila che ki kiboitiinik tugul eng' Kristo Jeso,

⁴ che ki chobootiin kogoito saboonwekwak agobo saboondanyu; che ma mwachini kongoi aneege, ago kobooto kanisosyek tugul che po Pororyosyek ak icheek:

⁵ ak ogat kaniset ne mi koonnywa. Ogat Epeneto ne achame miising', ne tongoaniat ne po Kristo eng' emetap Asia.

⁶ Ogat Maria, ne kiboisyewok eng' poisyet ne oo.

⁷ Ogat Androniko ak Junia, che po ornyo, ak che kimonjororinik kobooto, che taagunotiin eng' che kiyooktoi, che ki mi eng' Kristo kotom ayan.

⁸ Ogat Ampliato ne achame miising' eng' Kiptaiyat.

⁹ Ogat Urbano kiboityondennyu ne kiboisyei tugul eng' Kristo, ak Stako ne achame.

¹⁰ Ogat Apele ne chamat eng' Kristo. Ogat icheek che po kootap Aristobulo.

¹¹ Ogat Herodion ne po ornyo. Ogat icheek che po kootap Narkiso, che mi eng' Kiptaiyat.

¹² Ogat Truphena ak Truphosa, che poisyei eng' Kiptaiyat. Ogat Persis chamaneet, ne kibois miising' eng' Kiptaiyat.

¹³ Ogat Rupo ne lewenot eng' Kiptaiyat, ak kamet ne kamennyu agane.

¹⁴ Ogat Asunkrito, ak Plegon, ak Herme ak Patroba, ak Herma, ak tupchosyek che mi kobooto icheek.

¹⁵ Ogat Pilologo ak Julia, ak Nereo ak chepkamet, ak Olumpa, ak che tiliileen tugul che mi kobooto icheek.

¹⁶ Ogatkei eng' ng'ututet ne tiliil. Igatok kanisosyek tugul che po Kristo.

Soomeetap Paulo

¹⁷ Kasoomok anyun che kitupche, ale ogeer icheek che ing'eeti kabesyosyek ak kanagutik, che ma namegei ak kaneetisyet ne ki oneetkei: ak koistoegei icheek.

¹⁸ Amu icheeget che uu chooto, ko maotei Kiptaiyandennyo Kristo, ago otei mootinwekwak; ak kong'alei mugulelwegap che libwoben eng' ng'aleekwak che tangusen ak che po chemwaigutnateet.

¹⁹ Amu ki kogasak eng' piik tugul kaseng'wong' po iit. Nooto anyun abaibai eng' okweek: ago amache oeguche utaatiin eng' nooto myee, ak oegu che perber eng' nooto po yaityet.

²⁰ Ak tuun tuei Kamuktaindet ne po kaalyeet Setani eng' keelyekwok ko neegit. Ingotep kobootok myeeindap Kiptaiyandennyo Jeso Kristo.

²¹ Igatok Timoteo ne kiboityot kobooto; ak Lukio ak Jason ak Sosipatros, che po ornyo.

²² Anee Tertio ne kasirei parwaani, agatok eng' Kiptaiyat.

²³ Igatok Gaio ne ami koonnyi, ak kaniset komugul. Igatook Erasto riibindetap tuguugap nganaseet, ak Kuarto ne tupcho.

²⁴ Ingotep kobootok tugul myeeindap Kiptaiyandennyo Jeso Kristo. Amen.

Ne igimiti piik

²⁵ Nguno eng' ineendet ne imuuchi kogimitok ko uu logoiywekyuk che myach ak amdaetap Jeso Kristo, ko uu ng'ang'utyet ne po ung'oot ne ki kagiuny kosiis kobooch peetuusyek che po koigeny,

²⁶ ago kagong'ang'ak nguno, ak eng' siruutik che po maotik, ko uu ng'atuutyetap Kamuktaindet ne po koigeny, ko kagiboorchi pororyosyek tugul agoi kasetap iit ne po kayaneet;

²⁷ po Kamuktaindet ne utaat ineegei toroornatet koigeny, eng' Jeso Kristo. Amen.