ROMANIK 15 - BUKUIT NE TILIIL Sireet ne Dutero Kanon

Ibaibai piik alak

¹ Nooto anyun kanyoljech acheek che ki kiimeen kegesen nyalulnatetap che ma kiimeen, ama kibaibaigei acheegei.

² Ingobaibai age tugul eng' acheek chiitap kokwennyi eng' nooto myee, si koteegak.

³ Amu ki ma ibaibaigei Kristo ineegei; ago ko uu ye ki kisir keele, kogoityo agane churisyetap icheeget che kichurin.

⁴ Amu tuguuk alak tugul che ki kisir keny ko ki kisir si kinetkei, si kenyooru kamang'unet eng' muitaet ak eng' kagaigaet ne po siruutik.

⁵ Ingogoonok anyun Kamuktaindet ne po muitaet ak kagaigaet oegu che otinye kabwaatet agenge okweegei eng' okweegei ko uu ye machei Kristo Jeso:

⁶ si kobiit otoroor Kamuktaindet ineendet Kwandap Kiptaiyandennyo Jeso Kristo eng' mageet agenge ak kutit agenge.

Logoiywek che myach eng' piik tugul

⁷ Nooto anyun otaachkei, ko uu ye ki taachok Kristo agine, eng' toroornatetap Kamuktaindet.

⁸ Amu amwae anyun ale ki keyai Kristo koek kiboityotap kamuratanet agobo imanitap Kamuktaindet, si kobiit kogimit arorutik che ki kigoochi kwanisyek,

⁹ ak si kotoroor Pororyosyek Kamuktaindet amu rireenennyi; ko uu ye ki kisir keele, Nooto anyun alasun eng' kwenutap Pororyosyek, Ak atyenji kaineng'ung'.

¹⁰ Ak ki mwa kogeny kole, Oboiboitu okweek Pororyosyek, kobooto piikyik.

¹¹ Ak kogeny, Olasu Kiptaiyat, okweek Pororyosyek tugul; Ak ingolas piik tugul ineendet.

¹² Ak kogeny mwaei Isaiah kole, Tuun piitu tigityotap Jesse, Ak ineendet ne tuun ng'eetei koboi Pororyosyek; Kotun imang'u ineendet Pororyosyek.

¹³ Nooto anyun, ingonyiitak Kamuktaindet ne po kamang'unet poiboiyet tugul ak kaalyeet eng' kayaneet, si kobiit otesage eng' kamang'unet, eng' kamuktaetap Kabuuset ne Tiliil.

Poisyetap Paulo

¹⁴ Ak kaanai aneendet agine agobo okweek, che kitupche, ale oo nyiitootiin eng' myeeindo, oo nyiitootiin eng' naet tugul, ak kogeny, omuuchi otigongei.

¹⁵ Ago, asirwok agobo ng'aleek alak eng' nyiganateet ne siirei, ko uu ye abwaatwok kogeny, amu myeeindo ne ki koono Kamuktaindet,

¹⁶ ale aek kiboityotap Kristo Jeso eng' Pororyosyek, aboisyei eng' logoiywek che myach che po Kamuktaindet, si kobiit koek kagoitoetap Pororyosyek ne taagaksei, ko kagitabaan eng' Kabuuset ne Tiliil.

¹⁷ Nooto anyun atinye kalasunennyu pogei eng' Kristo Jeso eng' tuguuk che tokyingei Kamuktaindet.

¹⁸ Amu ma kanye ang'alaal agobo tugun alak tugul kobatee chooto che ki koyai Kristo eng' anee, agobo kasetap iit ne po Pororyosyek, eng' ng'olyoot ak yaeet,

¹⁹ eng' kamuget ne po kaboorunoik ak kwang'utik, eng' kamuktaetap Kabuuset ne Tiliil; nooto anyun, kong'etee Jerusalem, ak komoswekyik agoi Iluriko, ko ki aamdaate komyee logoiywek che myach che po Kristo;

²⁰ ee, ayae nooto koek kiit ne atoorchinigei ale aamda logoiywek che myach, ma eng' ole kigemwae kainetap Kristo, si ma teech eng' lumeiywotap chiito age;

²¹ ago, ko uu ye ki kisir keele, Keerei icheek, che ki ma pwanji logoiywekyik, Ak tuun naei icheek che tomo kogas.

Mageetap kwo `Paulo Rome

²² Kigeraanya anyun konyil che chaang' si ma nyonjok:

²³ ago ko uu ye ma atinye oldo age eng' komoswechu, ak ko uu ye atinye eng' kenyisyechu chaang' emosto ale Anyoonjok,

²⁴ eng' ui tugul ye tuun awendi Spania (amu amang'u ageerok eng' pandanyu, si oyomisa eng' pandanyu, si ye tuun ngo kagoyama atebeet ne kagitebi tugul ak okweek) -

²⁵ ago nguno, awendi Jerusalem, awo aboisyechi piik che tiliileen.

²⁶ Amu ki cham miising' Makedonia ak Akaia kobasyi tugun piik che ponondos eng' kwenutap che tiliileen che mi Jerusalem.

²⁷ Ee, kigocham icheek miising' ng'olyoondoniito; ak icheek ko pesenikwak. Amu ngo ki keyai Pororyosyek koek yamdoik che po tuguuk che po saboon, ko kanyool ak icheek koyaakta eng' poisyet ne poisyechin eng' tuguuk che po poorto.

²⁸ Ye kaagesu anyun niito, ak ang'okyi icheek logoechu, anyo abun oldang'wong' awendi Spania.

²⁹ Ak angen ale, ye Anyoonjok, anyoone eng' nyiietap kaberuretap Kristo.

³⁰ Asoomok miising' anyun che kitupche, eng' Kiptaiyandennyo Jeso Kristo, ak eng' chamyetap Kabuuset ne Tiliil, ale ogiilgei kobooto eng' saautikwok che osaae Kamuktaindet agobo anee;

³¹ si kobiit kityaacha eng' icheek che ma kase iit eng' Judea, si koek poisyennyu ne atinye agobo Jerusalem ne taagaksei eng' che tiliileen;

³² si amuuch Anyoonjok eng' poiboiyet eng' mageetap Kamuktaindet, ak anyooru kamuung'et kobootok.

³³ Ingotep Kamuktaindet ne po kaalyeet kobootok okweek tugul. Amen.