ROMANIK 14 - BUKUIT NE TILIIL Sireet ne Dutero Kanon

Metilji kirwook chii age

¹ Ago otaach ineendet ne nyalulat eng' kayaneet, ago ma si orwookyi kabwaatutikyik.

² Tinyei chiito age kayaneet koam tuguuk tugul: ago ineendet ne nyalulat koamei ingweek.

³ Amat kosas ne amei ne ma amei; ak amat korwookyi ineendet ne ma amei, ineendet ne amei: amu kagotaach `Kamuktaindet ineendet.

⁴ Ii ng'oo inyee ne irwookyini otwogindetap chiito age? Tononi anan kobuti eng' kiptaiyandennyi. Ee, kinamei kotonon; amu imuuchi Kiptaiyat konam ineendet kotonon.

⁵ Iiti chiito age peetuut age kosiir peetuut age: iiti chiito age peetuut age tugul kogergeit. Ingonai komyee chii age tugul eng' ng'omnatennyi.

⁶ Ineendet ne riibei peetuut, koriipchin Kiptaiyat: ak ineendet ne amisyei, koamisyei eng' Kiptaiyat, amu mwachin Kamuktaindet kongoi; ak ineendet ne ma amisyei, koma amisyei eng' Kiptaiyat, ak mwachin Kamuktaindet kongoi.

⁷ Amu ma mi age eng' acheek ne sabei agobo kei, ama mi ne meei agobo kei.

⁸ Amu ngesaptosi, kesaptosi eng' Kiptaiyat, ak ngebegu, kebegu eng' Kiptaiyat: nooto anyun, ngesaptosi anan ngebegu, kebo Kiptaiyat.

⁹ Amu kime Kristo agobo niito, ak kisop, si koek Kiptaiyat ne po che ki kobek ak che saptos.

¹⁰ Ago inyee, ko amu nee si kirwookyi ne otupche? Anan kogeny, ko amu nee si iit ne otupche koek puch? Amu tuun kitonondosi acheek tugul eng' taitap ng'echereetap kirwooget ne po Kamuktaindet.

¹¹ Amu ki kisir keele, “Ko uu ye asabe, Mwaei Kiptaiyat, ko tuun kutung'jino kutundo age tugul, ak kolas ng'elyepta age tugul Kamuktaindet.”

¹² Nooto anyun, tuun tetyin chii age tugul Kamuktaindet atebeennyi.

Amat konach chii tupchennyi

¹³ Nooto anyun, amat kota kirwookyigei kogeny: ago kaigai orwooch ko uu ni keele amat konde chii kanagut ooreetap ne tupcho, anan kiy ne igoochin kobut.

¹⁴ Angen, ak koanai komyee eng' Kiptaiyat Jeso, ale ma miitei kiy ne ng'wanitu ineegei: kobatee eng' ineendet ne iiti kiy kole ng'waan, kong'wanitu eng' ineendet.

¹⁵ Amu ngo aragen ne otupche amu amitwogik, koma iwendoti eng' chamyet. Amebar ineendet eng' amitwogiguk ne ki mechi Kristo.

¹⁶ Amat kemwaitae myeeindong'wong' yaityo:

¹⁷ amu laitornatetap Kamuktaindet koma amisyet ak eeiset, ago imanda ak kaalyeet ak poiboiyet eng' Kabuuset ne Tiliil.

¹⁸ Amu ineendet ne otei Kristo eng' tuguuchuuto koboiboi Kamuktaindet, ak koyanjin piik.

¹⁹ Nooto anyun, ongisup tuguuk che yaei kaalyeet, ak tuguuk che kiteegegei acheegei eng' acheegei.

²⁰ Amowechawech poisyetap Kamuktaindet eng' amitwogik. Tiliileen tuguuk tugul iman; ago ya eng' chiichooto amei eng' kanagut.

²¹ Myee ngot koma ki am panyeek, anan kee maiyek, anan keyai kiy age tugul ne inachi ne otupche.

²² Kayaneet ne itinye, itepte inyegei eng' taitap Kamuktaindet. Paibai ineendet ne ma tinyei ne irwookyinegei eng' kioto kagoyanjigei ineegei.

²³ Ago ineendet ne tinyei saget, ki kikyin ngot koam, amu ma amei eng' kayaneet; ak kiit age tugul ne ma po kayaneet ko tengek.