ROMANIK 13 - BUKUIT NE TILIIL Sireet ne Dutero Kanon

Konyitetap Kandoinatet

¹ Ingogas iit chii tugul pounatosyek che eecheen: amu ma mi pounooto, kobatee ne punu Kamuktaindet; ak ki indoi Kamuktaindet chooto miitei.

² Nooto anyun ineendet ne kirindoi pounateet, kobistoe ng'atuutyetap Kamuktaindet: ak icheek che pistoe kocheeng'jingei kirwooget.

³ Amu ma po pounik kamuiset eng' poisyonik che myach, ago eng' che yaach. Ak tos meiywei pounateet? Yai ne myee, si inyooru kalasunet eng' nooto;

⁴ amu ineendet ko kiboityotap Kamuktaindet eng' inyee, ne yaei ne myee. Ago ngiyai ne ya, iywei; amu ma ibooti rotwetap chok puch: amu ineendet ko kiboityotap Kamuktaindet, yaaktaindetap mugetuut agobo nereegek eng' ineendet ne yaei yaityo.

⁵ Nooto anyun kanyool ogas iit, ma amu nereegek kityo, ago amu kabwaatet agine.

⁶ Amu ng'olyoondoniito anyun ogoitoi aisuruut agine; amu icheeget ko kiboitinigap poisyetap Kamuktaindet, che igiiljingei kotugul kioto.

⁷ Ogoochi tugul tuguuk che nyoljin: kodi eng' ineendet ne nyoljin kodi; aisuruut eng' ineendet ne nyoljin aisuruut; kaiyweisyet eng' ineendet ne nyoljin kaiyweisyet; teegisto eng' ineendet ne nyoljin teegisto.

Chamyet

⁸ Amobesen chii kiy age tugul, ago ochamye: amu ineendet ne chamei chiitap kokwennyi ko kagoyai kosulda Ng'atuutyet.

⁹ Amu eng' mwaonooto kimwaei keele: Amoipkei; Amerumisye; Amechoorse; Amegase myat kiy ne po chii, ago ngo mi ng'atuutyet age, kiyumi tugul eng' ng'olyoondoni, keele, Cham chiitap kokweng'ung' ko uu ole ichamdoige.

¹⁰ Ma yachin chamyet kiy ne ya chiitap kokwennyi: nooto anyun chamyet ko kasuldaetap Ng'atuutyet.

¹¹ Ak anyun, ongen peetuusyek, ole kagoit sait ne kanyool ogosu eng' rwondo: amu kagorikyech nguno yetunet kosiir ye kingi yan eng' tai.

¹² Neegit kosiirto kemout, kariik peetuut; nooto anyun ongireegu poisyonigap mesundeito, ak ongilaach kariigap lapkeiyet.

¹³ Ongebendoti ko uu ye nyolu, ko uu peet; ma eng' waseetapkei anan pogitet, ma eng' sokseet anan mageet ne ya, ma eng' polateet ak ng'etkong'.

¹⁴ Ago olach Kiptaiyat Jeso Kristo, amochopchi poorto poroindo, si oyai maguutikyik.