ROMANIK 12 - BUKUIT NE TILIIL Sireet ne Dutero Kanon

Sabeet ne leel eng' Kristo

¹ Nooto anyun che kitupche, asoomok miising', eng' rireenosyegap Kamuktaindet ale, ogoite poorwekwok koek tiseiywot ne sabei, ne tiliil, ne taachaksei eng' Kamuktaindet, nooto ko poisyeng'wong' ne nyolu.

² Amoyaniegei ateptap peetuusyechu: ago ingewalak eng' kaleelitetap kabwaatutikwok, si kobiit onai komyee mageet ne myee ne po Kamuktaindet, ne tachaksei ak kogesunotkei.

³ Amu amwachini chii age tugul ne mi kwenung'wong', eng' myeeindo ne kigegoono, amat kobwaatkei chii kole toroor kosiir ne tee ne nyolu kobwaat; ago kobwaat ne yamei, ko uu ye ki igoochi Kamuktaindet chii age tugul karagutyetap kayaneet.

⁴ Amu agot ko uu ye ki tinyei kebeberwek che chaang' eng' poorto agenge, ama tinyei kebeberwek tugul poisyet agenge:

⁵ ko uu nooto eng' acheek che ki chaang', kiborto agenge eng' Kristo, ak ki kebeberta age tugul ne po age.

⁶ Ak ketinye konunoik che teerchiin ko uu myeeindo ne kigegoonech, ngo maonateet, ko ongeamde ko uu ole tee kayanennyo;

⁷ anan poisyet, ongigoochigei poisyennyo; anan ineendet ne ineetisyei, kochuljigei kaneetisyennyi;

⁸ anan ineendet ne iteitoi, kochuljige kateitaennyi: ineendet ne igoitoi, kogoito eng' aiyebindo; ineendet ne pou, koboi kochuljigei; ineendet ne rireegei, koriiregei eng' poiboiyet.

⁹ Ingoek chamyet ne ma tinyei ng'aalseet. Wech miising' nooto ya; onamge ak ne myee.

¹⁰ Ochamyee eng' chamyet ne uu ne po tupchosyek; ingoiit chiito age chiito age kosiir ineendet eng' teegisto;

¹¹ eng' kagiiletapkei amochoriren; ogiilgei miising' eng' mugulelwekwok, oote Kiptaiyat;

¹² oboiboitu eng' kamang'unet; omuitoi eng' nyalilda; ogiiljigei saaet kotugul;

¹³ otoret che tiliileen eng' tuguuk che pononi; oaiyebitu eng' toek.

¹⁴ Oberuur che usook; oberuur, amochup.

¹⁵ Oboiboitu kobooto che poiboi; oriirye kobooto che riirtos.

¹⁶ Oegu che tinyei kabwaatet agenge okweegei eng' okweegei. Among'asyige tuguuk che torooreen, ago onamge ak che iming'inegei. Moiityige ole oo ng'oomen eng' loseng'wong' pogei.

¹⁷ Amoyaakyi chii yaityo eng' yaityo. Ibwaat tuguuk che po teegisto eng' taitap piik tugul.

¹⁸ Ngo mugaksei eng' okweek, otebi ak piik tugul eng' kaalyeet.

¹⁹ Chamanichu, amoyaakte mugetuut, ago ogoochi poroindo nereegek: amu siraat kole, “Nenyu yaaktaetap mugetuut; ayaaktoi, mwaei Kiptaiyat.”

²⁰ “Ngo am rubeet punyondeng'ung', ibai; ngo am melel, inage koe; amu ye iyae ko uu nooto ko kerurukyi ng'etetyot metinnyi.”

²¹ Ameng' koterteerin yaityet, ago iterteer yaityet eng' ne myee.