ROMANIK 11 - BUKUIT NE TILIIL Sireet ne Dutero Kanon

Tos ki toorta `Kamuktaindet piikyik?

¹ Amwae anyun ale, Tos ki toorta `Kamuktaindet piikyik? Achicha, ma uu nooto. Amu aa Yahudyot agane, ne po kesweegap Abraham, ne po ooreetap Benjamin.

² Ki ma toorta `Kamuktaindet piikyik che kisip konai. Anan ma onai ne mwaei sireet agobo Elijah? Ko uu ye king'andoi `ineendet Yahudik eng' taitap Kamuktaindet kole,

³ “Kiptaiyat, ki kobar maotiguk, ak ki koluul ole ki tisiisye; ak kaang'etu aneege, ak cheeng'ei icheek saboondanyu.”

⁴ Ago leenjin nee waluunetap Kamuktaindet? Kaatukyigei murenik eliphuusyek tisap, che ma kutung'ji Baal.

⁵ Agot ko uu nooto anyun agine eng' peetuusyechu, miitei che ng'etunotiin ko uu lewenet ne po myeeindo.

⁶ Ago ngot ko po myeeindo, koma ko po poisyonik: ngo ma uu nooto, ko mata koek `myeeindo myeeindo.

⁷ Nee anyun? Ki ma nyoor Israel nooto ki cheeng'ei; ago kinyoor lewenik, ak ki kiuuiit chuun alak:

⁸ ko uu ye siraat kole, “Ki kogoochi `Kamuktaindet ne Toroor icheek rwondo ne nyigiis, ak koonyek che ma keerei kiy, ak iitiik che ma kasei kiy, agoi peetuuniito.”

⁹ Mwaei Daudi kole, Ingoek meesennywa meset ak rigeito, Ak kanagutyet, ak yaaktaet eng' icheek:

¹⁰ Ingoimenitu konyekwak, si ma keer kiy, Ak iyai patoikwak kogumbu kotugul.

¹¹ Amwae anyun ale, Tos, kiterteryot kot kobutyo? Achicha, ma uu nooto: ago ki nyoonji yetunet Pororyosy ek eng' kabutennywa, si kobiit kogoochi icheek ng'etkonda.

¹² Ngot koegu kabutennywa mogornatosyegap ng'wony, ak koek luseennywa mogornatosyegap Pororyosyek; kosiirei ne tya anyun nyiennywa?

Sarunetap pororyosyek

¹³ Ago ang'alaalwok okweek che oo po Pororyosyek. Ko uu ye aa kayooktoindet ne po Pororyosyek, atoroori poisyennyu:

¹⁴ si agoochi ng'etkonda eng' oor age tugul icheeget che kiborto agenge, ak asaru alak eng' icheek.

¹⁵ Amu ngo toortaennywa ko katuiyetap, ko tos nee anyun taagetap icheek, kobatee saboondo ne mang'une che ki pek?

¹⁶ Ak ngo tiliil tongoaniat, ko tiliil kiit komugul agine: ak ngo tiliil tigityot, ko tiliileen ak icheek mooriik.

¹⁷ Ago ngot ko ki kiiri mooriik alak, ak inyee ne ii mseitunitap timiin, ko ki kinamnyenen icheek eng' kwenunnywa, ak ki oyamde kobooto icheeget ne po tigityot ak akwaiyetap mseituni;

¹⁸ mechauge ile isiire mooriik: ago, ngot ichauge, koma inyee ne igeseni tigityot, ago tigityot ne kesenin.

¹⁹ Imwae anyun ile, Ki kiiri mooriik, si kinamnyena.

²⁰ Myee; ki kiiri icheek amu pistoennywa, ak itononi eng' kayaneng'ung'. Amelaske, ago iyweisye:

²¹ amu ngo ki ma riiree Kamuktaindet mooriik che ki po keetoto ye kinye, koma rireenen ak inyee.

²² Keer anyuno myeeindo ak koroomnatetap Kamuktaindet: eng' icheek che kibutyo, ko koroomnateet; ago eng' inyee, ko myeeindap Kamuktaindet, ngitebi eng' myeeindonyi: ngo ma uu nooto ketilin aginye.

²³ Ak ngo ma tebi icheek eng' pistoennywa, kinamdos: amu imuuchi Kamuktaindet konamnyo icheek kogeny.

²⁴ Amu ngo kigetilin eng' mseituni ne po timiin eng' piteennyi, ak ki kinamnyenen mseituni ne myee ne ki ma ko po timiin eng' piteennyi: ko siirei anyun ne tya kinamnye mooriik che ki po ye kinye emdinnywa!

Ki saru Israel komugul

²⁵ Amu ma mache oegu che mongen ung'ootyoni, che kitupche, si moiityige ole oo ng'oomen eng' loseng'wong' pogei, ale kanyonji Israel uuindo eng' kebeber, agoi konyo nyiyet ne po Pororyosyek;

²⁶ ak uu nooto tuun kisaru Israel tugul: ko uu ye siraat kole, Tuun mang'une Zion Katyagindet; Ak koistoe Jakobo pistoet:

²⁷ Ak ni arorutyennyu eng' icheek, Ye tuun aiste tengekwogikwak.

²⁸ Ago puunik icheek eng' okweek, amu logoiywek che myach: ago eng' ng'olyootap lewenet, ko chamanik icheek amu kwanisyek.

²⁹ Amu ma tinyei ndara konunoigap Kamuktaindet ak kuursennyi.

³⁰ Amu ko uu ye ki ongelelji Kamuktaindet eng' peetuusyek che ki kosiirto, ago nguno ko kaonyooru rireenetapkei eng' pistoennywa,

³¹ ko uu nooto ak icheek chu, ki kobistoe, si konyoor ak icheek rireenetapkei eng' rireenetapkei ne ki kiboorwok.

³² Amu ki koratyi Kamuktaindet tugul eng' pistoet, si kobiit koriiree tugul.

³³ Ee tyanitu anyun ooindo ne po mogornatosyegap utaatyet ak naetap Kamuktaindet! Ak kirwoogutikyik che ma isiagaksei, ak ortinwekyik che ma cheeng'oksei!

³⁴ “Amu ng'oo ne ki konai kabwaatutigap Kiptaiyat? Anan ng'oo ne ki koek kaneetindennyi?

³⁵ Anan ng'oo ne kisip kogoochi kiy, si kobiit koyaakyi ineendet kogeny?”

³⁶ Amu pou ineendet, ak kobunu ineendet ak koweekyingei ineendet, tuguuk tugul. Punjin ineendet toroornatet koigeny. Amen.