RIREKAB JEREMIA 5 - BUKUIT NE TILIIL Sireet ne Dutero Kanon

Saaet agobo rireenet

¹ Ibwaat anyun, ee Kamuktaindet ne Toroor, kiit ne kagoityech; keero, keer chotisyennyo!

² Ki kigoochi porotennyo kiprutoin, ki kigoochi kooriikyok piich che po emotinwo alak.

³ Ko keegu piich che ma tinyei sigiik ak che ma tinyei kwan. Kogoigei kametisyekyok mosoogik.

⁴ Si ke ee peekyok, ko agoi keal eng' robiinik; si kenyooru keetiikyok, ko agoi keal.

⁵ Ichegeet che onatech, ko ang'juto neegit konamech kaat; kigeng'etye ama ki tinyei kamuung'et.

⁶ Ki kigonugei kegoochi toretetap euut Misiri ak Assyria, asi kenyooru amitwogik che yamech.

⁷ Ki yai tengek kwanisyekyok ak ma komi; ang'ni anyun kigegesen tengekwogikwak.

⁸ Poiywech otwogik; ma mi chii ne sarwech kemang'une eunekwak.

⁹ Kindoii saboonwekyok ng'oiyondit si kobiit kenyooru amitwogik, amu rotwetap chok eng' surkwen.

¹⁰ Laldos irireenikyok ko uu ole kilaali amu rubeet ne lalei ne po iljet.

¹¹ Ki inyaliil `murenik kwonyiik eng' Zion ak konyaliil pergeinik eng' nganasoogap Judah.

¹² Ki igartaat pounik eng' eunekwak; ama nyoor teegisto poisyek.

¹³ Kang'etyo neranik koganopi koitap pai, ak terteiyoti lagok kolaei keetiik.

¹⁴ Poisyek che cham komi ormariichet koma komi, ak neranik koma kotyendos.

¹⁵ Ma komi poiboiyet mugulelwekyok; ki kowalak ureryennyo koek riirek.

¹⁶ Ki kobut kuutweet eng' metowekyok; pwo eng' acheek amu ki keyai tengek.

¹⁷ Amu nooto ko kagonyalulso mugulelwekyok; amu tuguuchuuto ka kagogoryo konyekyok.

¹⁸ Amu tulweetap Zion, ne ki koek karaatya; ko pendate lelwek olooto.

¹⁹ Ago inyee, ee Kamuktaindet ne Toroor, ii laitorani koigeny; laitornateng'ung' kotononi ko po ibinda agoi ibinda age.

²⁰ Amu nee anyun si iutyenech agoi? Amu nee si imeteech ne tee noo?

²¹ Waleech kewekyiingei, ee Kamuktaindet ne Toroor, si keeweege; ileliit peetuusyekyok ko uu keny,

²² aiya ko ki ieesyech miising', ak iting'enech nereegek che ma iitoksei.