RIREKAB JEREMIA 3 - BUKUIT NE TILIIL Sireet ne Dutero Kanon

Rireenetap Kamuktaindet

¹ Aa chiito ne ki ageer nyalilda eng' nereegek che po kirokto ne po Kamuktaindet.

² Ki kondoiywo ak kogeno awendotee mesundeito ama lapkeiyet.

³ Iman kiitocha eunnyi, konyil ak konyil, peetuut komugul.

⁴ Ki koyai poortanyu ak iriryondennyu koosegitu; kigoiri kawekyuk.

⁵ Kigong'ota kogirindaa ak koyiemena ng'wanindo ak nyalilda.

⁶ Kigogoono atebee mesundeito, ko uu che ki kobek keny.

⁷ Kigong'ota kot koma amuuchi achilil; kigoganapcha nyororosyek che nyigiisen.

⁸ Ee, nga ariire ak aguursei agobo toreteet, kogerchin saang' saaennyu.

⁹ Kigong'ote ortinwekyuk koik che ki kiwai, kigogunuur ortinwekyuk.

¹⁰ Uu ineendet magalaluut ne sapchino, uu ng'etundo eng' komoswek che ung'ootiin.

¹¹ Ki komaas ortinwekyuk ak kotonatona; ki koyaa aek chii ne mi ineegei.

¹² Ki koriich kwangennyi ak kondea aek kiit ne kimwogei.

¹³ Ki komwogo kochut suennyu kipchabonigap motyennyi.

¹⁴ Ki aegu ne rorechin piik tugul; ak aegu tyendanywa peet komugul.

¹⁵ Kigonyiita ng'wanindo, kigogoono abogit ng'wonet.

¹⁶ Ki koirie kelekyuk kibargoinik, ki kotugeno oreek.

¹⁷ Ki iste saboondanyu kolooit eng' kaalyeet; ki autye ale poiboiyo ko nee.

¹⁸ Ara ki amwa ale kagolus kimnateennyu, kobooto tugul che kiga amang'u eng' Kamuktaindet ne Toroor.

¹⁹ Kabwaatetap nyalildanyu ak ombenateet, ng'wonet ak kipsegetetyet.

²⁰ Ibwaati saboondanyu chooto kotugul, ak kong'uruuksei eng' oriitinnyu.

²¹ Ago abwaati niito, ak ko uu nooto atinye anyun kamang'unet ale:

²² Ki rireenosyegap Kamuktaindet ne Toroor kityo si ma kigeswech, amu mararu rireenosyekyik.

²³ Leelachen rireenosyekyik karonet age tugul; oo imandang'ung'.

²⁴ “Kamuktaindet ne Toroor ko kebebertanyu, amang'u ineendet anyun amu nooto.” Mwaei saboondanyu.

²⁵ Myee Kamuktaindet ne Toroor eng' icheeget che igeni ineendet, eng' saboondo ne cheeng'ei ineendet.

²⁶ Myee eng' chii komong' ak kogen eng' muitaet yetunetap Kamuktaindet ne Toroor.

²⁷ Myee eng' chii kogesen chogit eng' peetuusyegap ming'inatennyi.

²⁸ Ingotep ineegei ak kosiis, amu kigesenji `Kamuktaindet ne Toroor ineendet.

²⁹ Ingotoore kutinnyi temburyek; tamangap kobiit kamang'unet.

³⁰ Ingogoochi matandanyi ineendet ne irabaachi; ak inginyiit ineendet chotisyet.

³¹ Amu ma timdoi Kiptaiyat agoi.

³² Agot nga kon arageneet, kota koriiree ko uu chaang'indap rireenosyekyik.

³³ Amu ma kwetyin koibu nyalilda, anan kogoochi arageneet weeriigap piik.

³⁴ Ye kityechatyechi kimonjororinik tugul che po ng'wony;

³⁵ ye kimaase chii imaninnyi eng' taitap Ineendet Ne Toroor Miising',

³⁶ anan kibeet chii eng' imandanyi, tos ma keerei Kiptaiyat chooto?

³⁷ Ng'oo ineendet ne mwaei ak kosulda kioto, ng'oo ne ng'atei kioto ngo ma Kiptaiyat?

³⁸ Tos ma mang'une kutitap Ineendet Ne Toroor Miising' yaityet ak myeeindo?

³⁹ Amu nee anyun si kong'unyng'uny chiito, chiito ne kagibir agobo tengekwogikyik?

⁴⁰ Ongisyach ak ketyem ortinwekyok, si keeweekyigei kogeny Kamuktaindet ne Toroor.

⁴¹ Ongetokyi mugulelwekyok kobooto eunekyok Kamuktaindet ne mi kipsengwet.

⁴² Ki kibistoe ak ki kingelelse; ak tomo inyoiywech kaat.

⁴³ Ki itugegei nereegek ak ioonatech; ki ibarisye ama iriiree.

⁴⁴ Ki itugegei pooldet, si ma mang'une saautikyok kobwa ole imi.

⁴⁵ Ki iyaech keige tugun che kibuktoi kelaktoi ak pusagaryek tugun che ma kiy eng' pororyosyek.

⁴⁶ Ki koyatyech kutusweekwak puunikyok tugul.

⁴⁷ Kabwanjech kaiyweisyet ak pichiindo, ng'emet ak ng'emisyet.

⁴⁸ Rootei peekyuk po kong' ko uu ainoosyek, amu ng'emisyetap piikyuk.

⁴⁹ Isururtoe peek konyekyuk che ma siisei, ama tinyei kamuung'et,

⁵⁰ agoi kogeer Kamuktaindet ne Toroor, kogeer eng' kipsengwet.

⁵¹ Iimi `konyekyuk saboondanyu eng' tuguuk che kiityi tiibiik tugul che po nganasennyu.

⁵² Kigoona icheek ko uu toriit, chooto ko puunikyuk che ki oona puch.

⁵³ Ki koisto saboondanyu eng' keriinget, ak ki wiirena koik.

⁵⁴ Rootei peek kosiirei metinnyu; ki aleen, “Kagigeswa.”

⁵⁵ Ki aguur kaineng'ung', ee Kamuktaindet ne Toroor, ami keriinget ne loo miising'.

⁵⁶ Ki igas kutinnyu: “Ametiim itiiguk ye ariirchin agobo toreteet, ago koono kagaigaet!”

⁵⁷ Ki iriigu eng' peetuut ne ki aguurin: ki imwa ile, “Meiywei!”

⁵⁸ Ki itononji ng'aleegap muguleldanyu, ee Kiptaiyat; ki ityaach saboondanyu.

⁵⁹ Ki igeer kanyalilenyu ee Kamuktaindet ne Toroor, ibesyeiwo kirwoogennyu;

⁶⁰ Ki igeer yaaktaennywa tugul ne po mugetuut ak chobutikwak tugul che ki chop agobo anee.

⁶¹ Ki igas inyee chotisyennywa, ee Kamuktaindet ne Toroor, ak chobutikwak tugul che ki chop agobo anee;

⁶² Ki igas kutusweegap icheek che king'eetya ak kabwaatutikwak che ibwaati agobo anee peetuut komugul.

⁶³ Ye tebyei ng'wony icheek ak ko ng'eetos, aa tyendanywa.

⁶⁴ Iyaaktochini ng'wony icheek, ee Kamuktaindet ne Toroor, ko uu poisyonigap eunekwak.

⁶⁵ Igoochini mugulelwekwak kouegitu, igoochini icheek chubeng'ung'.

⁶⁶ Ioonati icheek eng' nereegek, ak ing'em icheek koistoegei kurereetap kipsengwet ne po Kamuktaindet ne Toroor.