RIREKAB JEREMIA 1 - BUKUIT NE TILIIL Sireet ne Dutero Kanon

Koegu Nganaseet karaatya,

¹ Kalya si koguber nganaseet ne ki nyiitaat piik! Amu nee si kotebi ko uu kwony ne ki kosiirtoe manong'otyot, nganaseet ne ki oo eng' pororyosyek! Ineendet ne ki cheptap laitoryat eng' emotinwek, ko kagoek anyun otwogindet.

² Riirei miising' kemoi, ak korang'ugei peegap kong' eng' matang'wekyik. Ma mi agot agenge ne igoigoi ineendet eng' chamanikyik tugul. Ki koberber choronokyik tugul ineendet, ki koek puunikyik.

³ Ki kiluul Judah kwo nyalil, ak otwoknateet ne oo. Menyei nguno kwenutap pororyosyek ak ma sichei kamung'et. Kagonam ineendet `usiikyik tugul eng' ole pichiy.

⁴ Iteitos ortinwegap Zion, amu ma mi chii ne nyoonjin tuiyet ne ki king'at. Ki koek karaatya ormariichokyik tugul, tigendos tisiikyik. Kinyaliili pergeinikyik, ak kotinyei ineendet ng'wanindo.

⁵ Ki koek `usiikyik kandoik, ak koboor puunikyik. Kogonyaliil `Kamuktaindet ne Toroor ineendet amu chaang'indap pistaosyekyik. Kogimut lagokyik keluul eng' taitap puunyoot.

⁶ Kogoistoegei cheptap Zion toroornatennyi tugul; kogoigei pounikyik cheptirgichik che ma tinyei ole agetee. Kogomweiso icheek ama tinyei kimnateet eng' taitap chiito ne oonei.

⁷ Ibwaati Jerusalem peetuusyegap nyalilda ak pichiinwekyik. Ibwaati tuguukyik tugul che ki iboiboi ineendet kobooch peetuusyek che po keny. Ibwaati ye ki ibutyin piikyik eutap puunyoot, ama toret chii ineendet, Ki chot katerterikyik ineendet agobo kabutennyi.

⁸ Ki koyai Jerusalem tengekto ne ya miising'; kogoek anyun kiit ne murwoon amu nooto. Sasei ineendet tugul che ki konyiti ineendet, amu ki kogeer aach ngorinnyi. Ee, tigeni, ak koweechigei let.

⁹ Ki mi simdanyi ngoroikyik; ma ibwaat kagesunennyi ne po let. Katururgei anyun eng' kwong'eet; ma tinyei kagaigaindet: Ee Kamuktaindet ne Toroor, keero nyalildanyu; amu kogotoroorgei puunyoot.

¹⁰ Kogoitoochi puunyoot eunnyi tuguukyik tugul che koboiboitune. Amu kagogeer kole kogochut pororyosyek oldanyi ne tiliil, che ki ing'at ile amat kochut icheek tuiyeng'ung'.

¹¹ Tigendos piikyik tugul ye cheeng'ei amitwogik; ki kogoito tuguukwak che korooron si konyoorunee amitwogik che isoobi saboondo: Keero, ee Kamuktaindet ne Toroor, ak ibwaat; amu kaaegu ne kisasei.

¹² Tos ma kiy eng' okweek, okweek tugul che osiirtoi? Ogeer ak obwaat ngo mi arageneet age tugul ne uu aragenennyu, ne ki kiyaiywo, ne ki inyalilena Kamuktaindet ne Toroor eng' peetuutap nereegekyik che ng'woneen.

¹³ Ki iyook ineendet maat eng' parak koyookyi kawekyuk, ak ki iterteer maata koweek. Ki riich mesteet konam keelyekyuk, ki koweekyo let; ki koyaa aek panan ak atanui peet komugul.

¹⁴ Ki rat eunnyi chogitap pistaosyekyuk; ki konamgei tugul, ki koit kaatinnyu; ki koges kimnateennyu. Ki kondea Kiptaiyat eunekwak, ne ma amuuchi atonon agirinda.

¹⁵ Ki koyai `Kiptaiyat piik tugul che nyigoonen koek puch eng' kwenunnyu; ki koguurcho tuiyet ne ki king'at kole kotuatui neranikyuk. Ki kotyechatyech `Kiptaiyat pergeiyatap Judah ko uu ye kityechei ole kitue sabibuk.

¹⁶ Ariire anyun agobo tuguuchuuto; saitoi peegap kong' eng' konyekyuk; amu loo eng' anee kagaigaindet ne kata isoobi saboondanyu. Ki koek lagokyuk kibananook, amu ki koterteeris puunyoot.

¹⁷ Iitoi Zion eunekyik; ago ma mi chii ne igoigoi ineendet. Ki kong'at Kamuktaindet ne Toroor agobo Jakobo, kole egu puunikyik piik che menyei komoswekyik. Mi Jerusalem kwenunnywa ko uu kiit ne murwoon.

¹⁸ Po imanda Kamuktaindet ne Toroor; amu ki angelelji ng'atuutyennyi. Asaok ale, ogas okweek pororyosyek tugul, ak ogeer aragenennyu. Kogimut pergeinikyuk ak neranikyuk koba koek luulenik.

¹⁹ Ki aguur chamanikyuk, ago ki iberbera. Ki pekyi nganaseet tisiikyuk ak poisyekyuk, Ye ki cheeng'jingei amitwogik kole kosoop saboonwekwak.

²⁰ Keero, ee Kamuktaindet ne Toroor, amu ami pichiindo, anyalili moennyu kawalak muguleldanyu; amu kaangelel miising'. Rebisyei rotwetap chok eng' ole po saang', eng' ko oriit komi ne uu meet.

²¹ Ki kogas icheek ole atigendoi; ma mi chii ne igoigoa. Ki kogas puunikyuk tugul agobo nyalildanyu; poiboi icheek amu ki iyai ko uu nooto. Tuun iibu peetuut ne ki imwaite, si kegergeitu ak icheek.

²² Ingobwa taing'ung' yaitwogikwak tugul; ak iyachi icheek, ko uu ye ki iyaiywo agobo pistaosyekyuk tugul. Amu chaang' tigenoikyuk, ak tanui muguleldanyu.