POISYONIGAP CHE KIYOKTOI 9 - BUKUIT NE TILIIL Sireet ne Dutero Kanon

Kowalaksei Saulo

¹ Ye kita konereechi Saulo koboisyee kamuiset ak parisyet agobo kasubigap Kiptaiyat. Ki wo kaptisiindet ne oo,

² ak kosoom ineendet paronok che ibei koba Damasko agobo sinagogisyek, kole ngo nyoor alak tugul che po Oranooto, ngo murenik anan kobogorisyek, komuuchi komut kobwa Jerusalem ko ratotiin.

³ Ye kita kowendi ak ko kariikta Damasko, kooluu sainooto lapkeiyet ne ki punu kipsengwet koluuchi ineendet komoswek tugul.

⁴ Ki ibutyi, ak kogas kutit koleenji ineendet, “Saulo, Saulo, amu nee si iusa?”

⁵ Ak ki le, “Ii ng'oo, Kiptaiyat?” Ak ki le, “Aa Jeso ne iuse.

⁶ Ago ng'eet, ui nganaseet, si kemwaun kiit ne kanyool iyai.”

⁷ Ak kitononso konam kuut piik che kibendi kobooto ineendet, kogasei tweguunet, ama keerei chii.

⁸ Ki ng'eet anyun Saulo, ak kingo kagoyatagis konyekyik, koma kogeerei kiy; komut anyun `icheek ineendet konamoti euut agoi Damasko.

⁹ Ki tar ineendet peetuusyek somok ama keerei kiy, ama amisyei anan koeeiso.

¹⁰ Ki mi kasubindet age Damasko ne ki kiguure Anania. Ki leenji `Kiptaiyat ineendet eng' ng'ang'utyet, “Anania.” Kowol Anania kole, “Ami yu, Kiptaiyat.”

¹¹ Koleenji Kiptaiyat, “Ng'eet, ui ooreet ne kiguure Ne Litit, ak iteep eng' kootap Judas chiito ne kiguure Saulo, chiitap Tarsis. Keero, saaei;

¹² ak kagogeer ineendet eng' ng'ang'utyet chiito ne kiguure Anania, konyonei agoi ko, ak kogonoor ineendet eunekyik si kogeerto.”

¹³ Ago ki wol Anania kole, “Kiptaiyat, ki agas eng' piik che chaang' agobo chiichito, ole tee yaityet ne ki koyachi piiguk che tiliileen eng' Jerusalem;

¹⁴ ak tinyei eng' yuto kimnateet ne punu tisiik che eecheen si korat tugul che kuurei kaineng'ung'.”

¹⁵ Ago ki leenji Kiptaiyat, “Ui inyee, amu kinnyu ineendet ne aboisyee ne ki alewen, si koip kainennyu taitap Pororyosyek ak laitorinik, ak piigap Israel:

¹⁶ amu aboorchini ineendet ole tee chaang'indap tuguuk che kanyool konyoorunee nyalilda agobo kainennyu.”

¹⁷ Ki wo anyun Anania, ak ki wo agoi ko, yeityo kogonoor eunekyik Saulo ak koleenji, “Tupchennyu Saulo, kagiyokwo Kiptaiyat, ineendet Jeso, ne kichunjin eng' ooreet ne ki ibunu, kole igeerte, ak kinyiitun Kabuuset ne Tiliil.”

¹⁸ Ak eng' sainooto kobutyo eng' konyekyik tuguuk che uu peerik, ak kigeerto. Ki ng'eet anyun ak ki kibatisan;

¹⁹ ak ki amis ak ki nyoor kimnateet. Ki tebi ineendet peetuusyo alak kobooto kasubik che ki mi Damasko.

Koamdoi Saulo eng' Damasko

²⁰ Ak ne matyanit koamda agobo Jeso eng' sinagogisyek kole, “Ineendet ko Weeriitap Kamuktaindet.”

²¹ Ki kwong'yo tugul che ki kas ineendet ak kole, “Tos ma chiichi ne kotar piik eng' Jerusalem, icheeget che cham koguurei kainani? Ak kogonyo oli agobo ng'olyoondoniito si kobiit komut icheek ko ratotiin koba taitap tisiik che eecheen.”

²² Ago kitesak Saulo kogimit, ak ki igoochi kokwong'yo Yahudik che ki menyei Damasko, koboorchin icheek komyee kole Jeso niito ko Kristo.

²³ Ak ye kingo keskei peetuusyek che chaang', kotuiyo Yahudik korwooch kole kobar ineendet,

²⁴ ago kinaak eng' Saulo chobennywa ne po ung'oot. Ki riip icheek ormariichok peet ak kemoi kole si kobar ineendet;

²⁵ ago ki imut `kasubikyik ineendet kemoi, ak kochoorta kosiir irimeet, komiitei mesendet oriit.

Saulo eng' Jerusalem

²⁶ Ye kingo nyo `Saulo Jerusalem kotyem kole koyomogei ak kasubik; ago ki iywei `icheek tugul ineendet, ama iyan kole kasubindet ineendet.

²⁷ Ago ki imut Barnaba ineendet kwo ole mi che kiyooktoi, ak kotetyi anyun ole kigeerto `ineendet Kiptaiyat eng' ooreet, ak kole kiga kong'alaalji ineendet, ak ko uu ye kigoamda eng' nyiganateet eng' Damasko eng' kainetap Jeso.

²⁸ Ara ki mi kobooto icheek ak komong'u eng' Jerusalem, komandoi eng' nyiganateet eng' Kainetap Kiptaiyat.

²⁹ Ki ng'alaali ak kobeligei kobooto Yahudik che ki kutinnywa ko Yunanik; ago ki cheeng'ei kotugul kole kobar ineendet.

³⁰ Ye kingo nai tupchosyek, komut ineendet kochoortagei kwo Caesarea ak koyookto kwo Tarsis.

³¹ Konyoor anyun kamuung'et kaniset eng' emet komugul ne po Judea, Galilaya ak Samaria ak koteegak. Ak ye kibendoti eng' kayweetap Kiptaiyat ak eng' kagaigaet ne po Kabuuset ne Tiliil, kotesak.

Kisoobi Ainea

³² Ye kiwendote Petero komoswek tugul, kochoortagei ole ki mi che tiliileen che ki menyei Lydda.

³³ Ak kinyoorchi olooto chiito age ne ki kiguure Ainea, ne kiga korue itogunnyi kenyiisyek sisiit, amu ki meat poorto.

³⁴ Koleenji anyun `Petero ineendet, “Ainea, isaabin Jeso Kristo; ng'eet ak iite itogung'ung'.” Kong'eet anyun sainooto.

³⁵ Ak kigeer ineendet tugul che ki menyei Lydda ak Sharon, ak koyan Kiptaiyat.

Kisoobi Dorkas

³⁶ Ki mi agenge eng' kasubik Joppa ne ki kiguure Tabita, ne ye kiweech eng' kutitap Yunanik ko Dorkas. Ki tinyei kobogoryondoni poisyonik che chaang' che myach ak kagoochinoik che ki igoitoi.

³⁷ Ak kimyan eng' peetuusyechooto, ak kime. Kingo kagoun, konde koot age ne mi parak.

³⁸ Ak amu kineegityin Lydda ak Joppa, ko ye kingo kas kasubik kole mi Petero olooto, koyookyi piik aeng' ineendet, kosoom kole, “Nyonjech, amegagei.”

³⁹ Kong'eet anyun Petero ak koba ak icheek. Ak kingo kagoit, komut ineendet kwo koot ne po parak. Ak kitonondos mosoogik tugul koriirtos eng' ye neegit ineendet ak koboorchi sumotik ak ngoroik che kinabei Dorkas ye kita komi kobooto icheek.

⁴⁰ Komaanda Petero tugul koba saang', yeityo kogutuny ak kosa. Ki weleljigei muusto ak koleenji, “Ng'eet, Tabita.” Ak ki yaat konyekyik, ak kingo keer `ineendet Petero, kong'eet kotep ng'wony.

⁴¹ Ki igoochi ineendet eunnyi ak konam kotoret ineendet kong'eet. Ye kingo kagoguur che tiliileen ak mosoogik, konde ineendet tainnywa ko kagosap.

⁴² Kinaak niito eng' Joppa komugul, ak ki iyan che chaang' Kiptaiyat.

⁴³ Ak ki tebi eng' Joppa peetuusyek che chaang' kobooto chiito age ne ki kiguure Simion ne teiteindetap muiywek.