POISYONIGAP CHE KIYOKTOI 8 - BUKUIT NE TILIIL Sireet ne Dutero Kanon

¹ Ak ki iyan Saulo agine agobo pareetap Stepano. Ki ng'eet peetuunooto usiisyet ne oo agobo kaniset ne ki mi Jerusalem, ak kiyesta icheek tugul koyom emotinwegap Judea ak Samaria, kobatee che kiyooktoi.

Kotau usiisyet

² Kotup anyun Stepano `piik che ki konyiti Kamuktaindet, ak koteiyo miising' agobo ineendet.

³ Ago ki inyaliil miising' `Saulo kaniset, kowendi koot age tugul ak kochuutu murenik ak kobogorisyek ak kotoorchin korgoreet.

Philipu eng' Samaria

⁴ Ki pa anyun icheek che kiga koyesta, koamdaat ng'olyoot.

⁵ Ak kichoortagei Philipu nganaseet ne po Samaria, ak koamji icheek Kristo.

⁶ Ak ki epchi iit tuiyosyek eng' yamdaet agenge ng'aleek che kimwaei Philipu, ye kingo kas ak kogeer kaboorunoik che ki yai.

⁷ Amu kimanda tamirmirik che murwonen eng' che chaang' che ki tinyei, kowaaktos eng' kutit ne oo; ak ki kisoop che chaang' che meiyotiin poorwek, ak che ki ing'waldos.

⁸ Ara ki piit poiboiyet ne oo eng' nganasanooto.

⁹ Ki mi chiito age ne ki kiguure Simion, ne ki cham kong'orsei eng' peetuusyek alak eng' nganasanooto, ak ki igoochi pororyetap Samaria kokwong'yo, komwaei ineendet kole chiito ne oo.

¹⁰ Ki epchin iit `icheek tugul ineendet, kobooch ne ming'in agoi ne oo, koleen, “Kimnateetap Kamuktaindet chiichi ne kiguure Ne Oo.”

¹¹ Ak ki epchin iit ineendet, amu ki cham kogoochin kokwong'yo eng' peetuusyek che chaang' eng' ng'oorsosyekyik.

¹² Ago ye kingo yan ng'aleegap Philipu ye ki amdoi logoiywek che myach agobo laitornatetap Kamuktaindet ak kainetap Jeso Kristo, kibatisan anyun murenik kobooto kobogorisyek.

¹³ Ki iyan Simion agine ak kingo kagibatisan kotebi kobooto Philipu. Ak kingo keer koyaogis kaboorunoik ak poisyonigap kimnateet kokwong'.

¹⁴ Kingo kas anyun che kiyooktoi che ki mi Jerusalem kole kogotaach Samaria ng'olyootap Kamuktaindet, koyookyi Petero ak Johana.

¹⁵ Ye kingo kagochoorgei icheek, kosa agobo icheek kole si kotaach Kabuuset ne Tiliil;

¹⁶ amu kitom kochoorchigei agot agenge eng' pichooto. Kiga kibatisan icheek eng' kainetap Kiptaiyat Jeso kityo.

¹⁷ Yeityo kogonoor icheek eunekwak, ak kitaach Kabuuset ne Tiliil.

¹⁸ Ye kingo keer anyun Simion kole kaga kigoochin chii Kabuuset ne Tiliil ngo konoor `che kiyooktoi eunekwak, kogoochi `silingisyek che kiyooktoi

¹⁹ ak kole, “Ogoono agane kimnatoni si ngagonoor chii age tugul eunekyuk, kotaach Kabuuset ne Tiliil.”

²⁰ Ago ki leenji Petero ineendet, “Ingobetyo siling'isyeguk kobooten, amu keleen inyooru konunetap Kamuktaindet eng' silingisyek.

²¹ Metinye kebeberta anan motwet eng' ng'olyoondoni, amu ma myee muguleldang'ung' eng' taitap Kamuktaindet.

²² Sigu anyun eng' tengeging'ung'et ak isaa Kiptaiyat, tamangap kenyoun kaat amu kabwaatetap muguleldang'ung'.

²³ Amu ageere ale imi eng' ng'wanindo ak eng' ratuutyetap tengekto.”

²⁴ Ak ki wol Simion kole, “Osaiywa Kiptaiyat, si ma pwanjo agot agenge tuguuk che kaomwaiwo.”

²⁵ Ye kingo kagobaoryan anyun Petero ak Johana ak komwa ng'olyootap Kiptaiyat, koweektagei Jerusalem, ak koamji logoiywek che myach nganasook che chaang' che po Samarik.

Philipu ak chiitap Ethiopia

²⁶ Ki mwachi malaikaiyatap Kiptaiyat anyun Philipu koleenji, “Ng'eet ak iwe murot tai agoi ooreet ne choortogei kong'etee Jerusalem ne wendi agoi Gaza” (punei oranooto ole melewet).

²⁷ Ara king'eet anyun ineendet ak kwo. Ak keero ki mi chiitap Ethiopia ne ki kimooch, ne ki tinyei pounateet ne oo eng' eutap Kandake, laitoryat kwondo ne po Ethiopik, ne kiriibei tuguukyik tugul che po kamanuutyet ne oo. Kiga nyo Jerusalem kosa;

²⁸ ak ki weeksei kaa anyun, kotebee chepkichutinnyi, ak kosomani bukuitap maotyot Isaiah.

²⁹ Ak ki leenji `Kabuuset ne Tiliil Philipu anyun, “Ui riikte, onamgei ak chepkichutina.”

³⁰ Ak ki labat Philipu ak kogas ineendet kosomani bukuitap maotyot Isaiah, ak ki leenji, “Iguitosi kiit ne isomani?”

³¹ Ak ki le, “Amuktoi ano, ngo ma iboorwo chii?” Ak ki igaigai Philipu `ineendet kole kolaany chepkichutit ak kotebi tuwai.

³² Ak chu siruutik che kisomanoti, “Ki kimut ko uu keechiiryet ne ki kweryei kwo eng'seet; ak ko uu aarwetap keechiiryet ne siisei eng' taitap chiito ne tilei koroorikyik, uu nooto agine mang'aany kutinnyi.

³³ Ki kiisto kirwoogennyi eng' kaming'inennyi pogei. Ng'oo ne tuun mwaitoi ibindanyi? Amu kinemu saboondanyi eng' ng'wony.”

³⁴ ki teebee `chiichooto ki kimooch Philipu koleenji, “Asoomin ale, mwaei maotyot ng'olyoondoni agobo ng'oo? Agobo ineendet anan agobo chiito age?”

³⁵ Kong'aany anyun Philipu kutinnyi, ak kotoi eng' siruutyoni koamji ineendet agobo Jeso.

³⁶ Ye kingo ta kobendi eng' ooreet, koit ye mi peek, kole chiichooto, “Keer peek o; nee ne kera si ma kibatisana?”

³⁷ Ak ki le Philipu, “Ngiyan eng' muguleldang'ung' tugul, kimuuchi kibatisanin.” Ak ki wol kole, “Ayani ale Jeso Kristo ko Weeriitap Kamuktaindet.”

³⁸ Kong'at anyun kotonon chepkichutit, ak kichoortagei tuwai koba peek, Philipu ak chiichooto; ak ki ibatisan `Philipu ineendet.

³⁹ Ye kingo long' eng' peek, komut `Kabuusetap Kiptaiyat Philipu. Ak mata kogeer anyun kogeny `chiichooto ki kimooch Philipu, ago ki wo kotestai chiichooto eng' poiboiyet.

⁴⁰ Ak ki took Philipu eng' Azoto. Ye kisiirtoi kobune emonooto, ko ki amjinoti logoiywek che myach nganasook tugul agoi koit Caesarea.