POISYONIGAP CHE KIYOKTOI 5 - BUKUIT NE TILIIL Sireet ne Dutero Kanon

Anania ak Sapira

¹ Ago ki mi chiito age ne ki kiguure Anania, ak osotyonnyi Sapira, ne ki alda korennyi,

² ak kiituuch kebebertap che ki kialdae, kongen agine osotyonnyi, ki ip kebeberta age yeityo konde keelyegap che kiyooktoi.

³ Ago ki le Petero, “Anania, kalya si konyi Setani muguleldang'ung' kot iberber Kabuuset ne Tiliil, ak ituuch kebebertap che ki kialdae kooret?

⁴ Kingo ta komi, ko ki ma ko neng'ung'? Ak kingo kagealda, ko ki ma ibou? Kalya si ichop kii eng' muguleldang'ung'? Ma iberber chii, ago Kamuktaindet.”

⁵ Kingo kas Anania ng'aleechu, kobut ak kome. Ak ki nyoonji kaiyweisyet ne oo tugul che ki kas.

⁶ Ak king'eetyo `murenik ak kotaae muusto angeet, ak kosut kwo saang' ak kotup.

⁷ Ye ki neegit kogeskei saisyek somogu, koit osotyonnyi agine, ak ki ma kongen kiit ne kagoyaak.

⁸ Koleenji `Petero ineendet, “Mwaiwo ngo ki oaldae kooret tuguuk che tee chooto.” Kole ineendet, “Ee, tee chooto.”

⁹ Ago ki leenji `Petero ineendet, “Katepto ano kot ochamyechi tuwai oyoom Kabuusetap Kiptaiyat? Keero, mi kurgat keelyegap icheeget che katubei manong'otyondeng'ung', ak sutin aginye imande.”

¹⁰ Ak ki ibutyi keelyekyik sainooto ak kome. Ye kingo pwa ko anyun murenik konyoor ko kagome, ak kisut kwo saang' ak kotupchi ye neegitee manong'otyondennyi.

¹¹ Konyonji anyun kaiyweisyet ne oo kaniset komugul kobooto tugul che ki kas tuguuchooto.

Koyaei kwang'utik che kiyooktoi

¹² Kiyaogis eng' eunegap che kiyooktoi kaboorunoik ak kwang'utik che chaang' eng' kwenutap piik. Ak ki mi tugul eng' kabwaatet agenge eng' keterut ne po Solomon.

¹³ Ago eng' piik alak ko ki mata kobiit chii ne kita kogany konamgei ak icheeget, ago kiitoroor piik icheek.

¹⁴ Ak kitesak kayanik eng' Kiptaiyat kosiir, kichang'a murenik kobooto kobogorisyek;

¹⁵ kot komut icheek che myandos kobwa ortinwek, ak komogonji itogusyek ak kiplusisyek, kole tamangap kokwer urwetap Petero alak eng' icheek, kosiirtoi.

¹⁶ Ki iyomogei tuiyet ne punu nganasook che neegitee Jerusalem, komutu che myandos kobooto che ki inyalili tamirmirik che murwonen, ak ki kisoop age tugul eng' icheek.

Kinyalili che kiyooktoi

¹⁷ Ago ki tonon tisiindet ne oo, inee ak tugul che ki mi kobooto ineendet (kasubiigap Sadukaichooto), ak ki nyiitaat icheek ng'et konda,

¹⁸ konam che kiyooktoi ak kotoorchi korgoreet ne po piik tugul.

¹⁹ Ago ki yaat malaikaiyatap Kiptaiyat kurgotigap korgoreet kemoi ak komut icheek komong' saang', ak koleenji,

²⁰ “Oba, ak otonon eng' Hekaluut ak omwachi piik ng'aleek tugul che po Sabooni.”

²¹ Kingo kas ko uu nooto, koba Hekaluut ko kaech ak koneetis. Ye kingo nyo tisiindet ne oo ak che ki mi kobooto ineendet, koguur kirwooget ak poisyek tugul che po piigap Israel, ak koyookto kimut icheek kobwa eng' ole ki kiratyi.

²² Ago kingo it kiplugotinik koma nyoor icheek; ak kiweektagei icheek ak komwaita,

²³ kole, “Kaginyooru ko kerat komyee korgoreet ak kotonondos riibiik eng' kurgotik, ago ye kangeyat, koma kenyoorchi chii oriit.”

²⁴ Ak kingo kas ng'aleechu kiptaiyatap Hekaluut ak tisiik che eecheen, koiimgei miising' agobo icheek kole egu nee anyun ng'aleechu.

²⁵ Ak ki nyo chii ak koleenji, “Ogeero, pichoo kogotoorchi korgoreet, kotonondos eng' Hekaluut ak koneeti piik!”

²⁶ Kwo anyun kiptaiyat kobooto kiplugotinik ak komut kobwa, ago ma eng' kimnateet, amu ki iywei kole imuuch kolach piik `icheek eng' koik.

²⁷ Kingo kagomut icheek kobwa, konde taitap kapkirwook. koteebee tisiindet ne oo icheek,

²⁸ kole, “Kigeetenak inne keele, amatata oneet piik eng' kainani, ak ogeero, ki onyiit Jerusalem kaneetisyeng'wong', ak omache oibwech korotiigap chiichito kobwanjech.”

²⁹ Ago ki wol Petero ak che kiyooktoi kole, “Kanyool kegas iit Kamuktaindet kosiir piik.

³⁰ Ki ing'eet `Kamuktaindet ne po kwanisyekyok Jeso, ineendet ne ki obar ogartaat eng' keetit.

³¹ Ineendet ne kiitoroor Kamuktaindet eng' eunnyi ne po tai koek Ne Oo ago Yetindet, si kogoochi Israel siguunet ak nyoetap kaat ne po tengekwogik.

³² Ak ki paorinik acheek che po tuguuchu, ak Kabuuset ne Tiliil agine ne Ki kogoochi Kamuktaindet icheek che kase iit ineendet.”

³³ Kingo kas icheek niito, kong'wanit miising' eng' mugulelwekwak, kot komach kobar icheek.

³⁴ Ago ki tonon Pharisain eng' kapkirwook ne ki kiguure Gamaliel, kaneetindetap Ng'atuutik, ne kigonyiti piik tugul, ak kong'at kole kimut pichooto koba saang' ne matya.

³⁵ Ak ki leenji icheek, “Okweek piigap Israel, oriipkei eng' pichu, eng' kiit ne omache oyai.

³⁶ Amu kingo tomo koit peetuusyechu, koit Theudas kochoigei kole aa chiito ne oo ak konamgei ineendet ak piik che itei olo po pogol ang'wan. Ago ki kibar ineendet ak kiyesta tugul che kigase iit ineendet ak kibetyo.

³⁷ Kingo pata chiichooto kong'eet Judas ne po Galilaya eng' peetuusyek che po sirisyetap kainaigap piik, ak kochuut piik alak koosup ineendet; kime agine, ak kiyesta tugul che kigase iit ineendet.

³⁸ Ara anyun, amwaiwok nguno ale, oistoegei pichu ak omete icheek; amu ngo po piik ng'aleechu anan poisyoni, kowong'ugei;

³⁹ ago ngot ko po Kamuktaindet, ko momuuchi owong'u; si ma kinyoorwok obortosi ak Kamuktaindet.” Kocham anyun ng'aleekyik,

⁴⁰ ak kingo kagoguur che kiyooktoi kobwa ole mi icheek, kobir ak kong'at koleenji amatata kong'alaal eng' kainetap Jeso, yeityo kounda icheek koba.

⁴¹ Koba anyun eng' taitap kapkirwook koboiboi amu kagiit keele nyoljin konyoor kateweerisyet agobo Kainanooto.

⁴² Ak ki ma siisyo eng' peetuut age tugul koneetis ak koamdoi eng' Hekaluut ak eng' kooriik, kole Jeso ko Kristo.