POISYONIGAP CHE KIYOKTOI 4 - BUKUIT NE TILIIL Sireet ne Dutero Kanon

Petero ak Johana eng' kapkirwook

¹ Kingo ta kong'alaaljin `Petero ak Johana piik, kobwonji icheeget `tisiik ak kiptaiyatap Hekaluut ak Sadukaik,

² kotinyei nereegek amu ki ineet piik ak koamda eng' Jeso ng'eetyeetap che ki pek.

³ Ak ki nam icheeget ak kotoorchi korgoreet agoi mutai amu kiga koimen.

⁴ Ago ki iyan che chaang' eng' icheek che ki kas ng'olyoot; ak ki ek koitetap murenik olo po eliphuusyek muut.

⁵ Ak eng' peetuut ne ki isubi nooto koyumgei pounik ak poisyek ak siriik eng' Jerusalem;

⁶ ak Anas tisiindet ne oo, ak Caiaphas, ak Johana, ak Aleksanda, ak tugul che po ooreetap tisiindet ne oo.

⁷ Ak kingo kagonde icheek kwenunnywa, koteebe kole, “Nee kamuget ne koyae ni, anan eng' kainetap ng'oo?”

⁸ Kingo nyi anyun Petero Kabuuset ne Tiliil, koleenji icheek, “Okweek pounigap piik ak poisyek,

⁹ ngemachei keginenech rani agobo poisyet ne myee ne ko ki yachi chiito ne nyalulat, ole ko kisaapto chiichito;

¹⁰ ingonaak anyun eng' okweek tugul, ak eng' piik tugul che po Israel ole chiichi tononi eng' taing'wong', ko kagosap eng' kainetap Jeso Kristo ne po Nazareth, ne ki ogartaat okweek, ne ki ing'eet Kamuktaindet eng' che ki pek.

¹¹ Jeso niito ko ‘koita ne ki osas okweek teegik, ne kiga kiyai koek metitap luuita.’

¹² Ama mi yetunet eng' chiito age, amu ma mi kainet age eng' kurereetap kipsengwet, ne ki kigoochi piik, ne kanyool kesaruunenech.”

¹³ Kingo keer `icheek nyiganatetap Petero ak Johana, ak konai kole piich che ma ineetatin ama che taagunotiin, kokwong'yo ak konai kole ki cham komi kobooto Jeso.

¹⁴ Kingo keer chiito ne kogisoop kotononi kobooto icheek, ko mata komuuch komwa kiy agobo nooto.

¹⁵ Ago ye kingo kagong'at icheek komanda eng' kapkirwook, kong'alaal icheegei,

¹⁶ kole, “Ki itoi nee pichu? Amu naat eng' piik tugul che menyei Jerusalem keele koyaak iman eng' icheek kwang'utyet ne oo, ama kimuuchi ketiiye.

¹⁷ Ago si mata koiyestaat eng' kwenutap piik, konyolu keger kong' icheek, si mata kong'alaalji chii age tugul eng' kainaniito kogeny.”

¹⁸ Ara ki kuur icheek ak kong'at koleenji amatata kong'alaal anan koneetis agot kitigin eng' kainetap Jeso.

¹⁹ Ago ki wolji `Petero ak `Johana icheek koleenji, “Orwooch okweek ngot ngo myee eng' taitap Kamuktaindet kegasak iit kosiir Kamuktaindet.

²⁰ Amu ma kimuuchi kesisye kobatee kemwa tuguuk che ki kegeer ak che kigegas.”

²¹ Kingo kagoger kong' icheek kogeny, kounda icheek koba, ko mata konyoor ng'olyoot ne irwookyine, amu piik; amu kiitoroor piik tugul Kamuktaindet agobo nooto koyaak.

²² Amu kisiirei artam kenyiisyegap chiichooto kiyaak eng' ineendet kwang'utyoniito po kasaabet.

Saaetap kayanik

²³ Ak kingo kageunda, koba ole mi piikwak, ak komwaita tugul che kamwachi tisiik che eecheen ak poisyek.

²⁴ Kingo kas icheek komwachi Kamuktaindet eng' kutit ne oo eng' kabwaatet agenge, koleenji, “Ee Kiptaiyat, inyee ne ki iyai kipsengwet ak ng'wony ak araraita, ak tugul che mi olooto,

²⁵ ne ki imwa eng' Kabuuset ne Tiliil eng' kutitap kwandanyo Daudi kiboityondeng'ung', ile, ‘Kilya si kobolyo Pororyosyek, ak kobwaatoti piik tuguuk che ma namegei ak kiy?

²⁶ Kitetegei laitorinigap ng'wony, ak koyumgei pounik, agobo Kiptaiyat, ak Kristo nenyi.’

²⁷ Amu iman kituitos eng' nganasani Herod ak Pontio Pilato agine kobooto Pororyosyek ak piigap Israel, kole kogirinda Kiboityondeng'ung' ne Tiliil Jeso, ne ki iil,

²⁸ si koyai kiit age tugul ne kisip kong'at eung'ung' ak ng'omnateng'ung' kole kosulda.

²⁹ Ak nguno anyun, Kiptaiyat, keer kertaennywa po kong': ak igoochi otwogiguk komwa ng'olyoondeng'ung' eng' nyiganateet tugul,

³⁰ ye iitoi inyee eung'ung' isoobi piik; si koyaak kaboorunoik ak kwang'utik eng' kainetap Kiboityondeng'ung' ne Tiliil, nooto ko Jeso.”

³¹ Kingo kagosa, kotumdumgei ole kiga koyumjigei; ak ki nyi icheek tugul Kabuuset ne Tiliil, ak ki mwa ng'olyootap Kamuktaindet eng' nyiganateet.

Kotoretigei kayanik

³² Ak ki po muguleldo agenge ak saboondo agenge tuiyet ne kiga koyan. Ma mwa chii agot agenge kole nenyi kiy age tugul ne ki tinyei, ago ki yamdoi tuguukwak tugul.

³³ Ak kibaoryan che kiyooktoi eng' kimnateet ne oo agobo ng'eetyetap Kiptaiyat Jeso, ak ki tebee myeeindo ne oo icheek tugul.

³⁴ Amu ki ma komi agot agenge eng' kwenunnywa ne kibanani kiy, amu tugul che ki tinyei korotinwek anan kooriik, ko ki alda ak koip tuguuk che kiga aldae kobwa

³⁵ konde keelyegap che kiyooktoi; ak ki kipchechi chii age tugul ne ki nyalili.

³⁶ Ki mi Lawindet, chiito ne kisalu Cyprus, nooto Joseph, ne kitoochi che kiyooktoi kainet ne po aeng' koguure Barnaba (ne ye kiweech ko “Weeriitap kagaigaet”), ne ki alda mbareet ne ki tinyei,

³⁷ ak ki ip silingisyek konde keelyegap che kiyooktoi.