POISYONIGAP CHE KIYOKTOI 3 - BUKUIT NE TILIIL Sireet ne Dutero Kanon

Kisoobi chiito ne nyalulat

¹ Ki togosta Petero ak Johana hekaluut eng' sait ne po saaet, sait sogol.

² Ak ki kiganabi chiito ne ki salamwo kobooch komi moetap kamet, ne ki cham kindoi peetuut age tugul kurgetap hekaluut ne ki kiguure Karaaran, si kosoomei tuguuk piik che ki pendi hekaluut oriit;

³ ko ye kingo keer `ineendet Petero ak Johana komachei koba hekaluut oriit, kosoom kole kogoochi kagoochinet.

⁴ Ak ki ichiilji kong' `Petero ineendet kobooto Johana, ak koleenji, “Keerech”.

⁵ Ak ki inyal `ineendet icheek, koleen nyoorune kiy.

⁶ Ago ki le Petero, “Ma tinye fedha ak thahabu; ago agoonin ne atinye. Ng'eet eng' kainetap Jeso Kristo ne po Nazareth, ak iwendote.”

⁷ Konam anyun ineendet eut ne po tai, ak kong'eet: ak ki nyoor kimnateet ngunooto keelyekyik ak kawegap ng'woniot.

⁸ Ki ng'eet kochokyi, ak kotonon, ak kotoi kowendot; ak ki pa hekaluut oriit kobooto icheeget kowendoti, kotorombenoti, ak kolosu Kamuktaindet.

⁹ Ak ki keer piik tugul ineendet kowendoti ak kolosu Kamuktaindet:

¹⁰ ak ki nai icheeget kole, ineendet ne ki cham kotebyei kosoomei konunoik eng' kurget ne kiguure Karaaran ne po hekaluut: ak ki kwong'yo miising' ak kotang'any agobo nooto kagoyaak eng' ineendet.

¹¹ Ak kingota konamoti chiichooto Petero ak Johana, korwai piik tugul ole mi icheek eng' keterut ne kiguure ne po Solomon, kokwong'dos miising'.

¹² Ak ye kingo keer Petero, kowolji piik koleenji, “Okweek piigap Israel, kalya si okwong'ye agobo ni? Anan kalya si ochiiljech kong' ko uu ne oleen acheek che kagigoochi ineendet kowendot eng' kamugennyo anan eng' imandanyo?

¹³ Kamuktaindet ne po Abraham, ak ne po Isak, ak ne po Jakobo, Kamuktaindet ne po kwanisyekyok, ko kagotoroor kiboitiondennyi Jeso, ne ki ogoite ak ki otiiye ineendet eng' taitap Pilato, ye kiga kobegechi kotyach ineendet.

¹⁴ Ago ki otiiye okweek Ineendet ne Tiliil ak ko po Imanda, ak osom ole kegonok rumiindet,

¹⁵ ak ki obar Ne Oo ne po saboondo; ne ki ing'eet Kamuktaindet eng' che ki pek; kibaorinigap nooto acheek.

¹⁶ Ak kagogoochi kainennyi chiichi kimnateet, amu kayanet eng' kainennyi, chiichi ogeere ak ongen okweek: ee, kayanet ne mi eng' Jeso ko kagogoochi chiichi sabeet ne igesunotkei eng' taing'wong' okweek tugul.

¹⁷ Ak nguno anyun, che kitupche, angen ale, ki oyai nooto amu kima ongen, ko uu ye ki yai pounikwok ak icheek.

¹⁸ Ago tuguuk che kiga koboor Kamuktaindet eng' tai eng' kutuswegap maotik tugul, kole tuun nyalili Kristo nenyi, ko kagoyai nooto kosulda.

¹⁹ Osigu anyun ak owalage, si kobiit kibukto tengekwogikwok, si kobwa anyun peetuusyek che po kamuung'et che punu taitap Kiptaiyat;

²⁰ si koyook Kristo ne ki kilewenwok, ineendet Jeso:

²¹ ne kanyool kotaach kipsengwet agoi peetuusyek che kiwale tuguuk tugul komiagitu, che king'alaalee Kamuktaindet eng' kutuswegap maotikyik che tiliileen che ki mi kobooch taunetap ng'wony.

²² Ki mwa Musa iman, kole, ‘Ing'eetwok Kiptaiyat Kamuktaindet maotyot ne punu che otupche, ne uu anee’; ogas iit ineendet eng' tuguuk tugul che te che mwaiwok.

²³ Ak tuun king'emei kiwong'u eng' kwenutap piik, chiito age tugul ne magase it maotiondonooto.

²⁴ Ee, ak maotik tugul kobooch Samuel, ak icheek che ki pwanei let eng' ineendet, tugul che te che ki ng'alaal, ko ki mwa ak icheek agobo peetuusyechu.

²⁵ O weeriigap maotik, ak che po kayomiset ne ki iyomiskei Kamuktaindet ak kwanisyekwok. Ki leenji Abraham, Kiberuuri pororyosyek tugul che po ng'wony eng' keswondeng'ung'.

²⁶ Ak ye kingo kagong'eet Kamuktaindet kiboityondennyi, koyokwok okweek korook si koberuurok, ak koistoe chii age tugul eng' okweek tengekwogikyik.”