POISYONIGAP CHE KIYOKTOI 28 - BUKUIT NE TILIIL Sireet ne Dutero Kanon

Komi Paulo Melita

¹ Ak ye kingo kagesapche, kenai anyun keele ki kiguure emonooto ki ikween peek Melita.

² Ak kiyaiywech ne myee miising' piigap emonooto: amu ki ilaal maat, ak kotaachech acheek tugul, amu ki mi ropta ak kaitityet.

³ Ago ye kingo kagoyum Paulo ratuutyet ne po kweenik, ak konde ma, komong' anyun ereneet amu maat, ak kotaachigei eunnyi.

⁴ Ak kingo keer piigap emonooto ereneet kosonginini eng' euut, koleenjigei, “Rumin chiichi iman, agot nga kagosargei eng' nyanjet, koma chamjin ineendet Imanda kosap.”

⁵ Ago kilelekta tyonyooto kwo ma, ama am kiy Paulo.

⁶ Ago kileen icheek abeere tos ibwo, anan kobut ak kome sainooto: ak ye kiga koogenis keny, ama kogeer kiy ne ya konyonji ineendet, kowal kabwaatutikwak ak komwa kole ineendet ko kamuktain.

⁷ Ki mi anyun eng' ole neegitee yooto, korotinwegap chiito ne oo ne po emonooto ki ikween peek, ne ki kiguure Publio; ne kitaachech eng' chamyet, ak koyaech keegu toekyik eng' peetuusyek somok.

⁸ Ak ki myani kwandap Publio koamei eseet ak myandap moet ne pendi korotiik: ak ki wo Paulo kootap chiichooto, ak kosa, ak kogonoor eunekyik ineendet ak kosoop.

⁹ Ak kingo kagoyaak niito kobwa ak icheek che ki myandos eng' kakwembeiyondonooto, ak ki kisoop:

¹⁰ ak kigonyitech eng' teegisto ne oo; ak ye ki ngebe eng' moinget, kondewech moinget tuguuk che tee che ki kimakyinige.

Koitei Paulo Rome

¹¹ Ak kingo pata arawek somogu ketau panda eng' meeliit ne po Alexandria, ne kiga tebee kakwembeiyondonooto eng' peetuusyegap kaitityet, ne kaboorunennyi ko ki Saramek che Muren.

¹² Ak ki ngeit Syriakus, ketebee yooto peetuusyek somok.

¹³ Ak keng'eetye eng' olooto keebe keyiemategei, kot keit Reghio: ak kingo pata peetuut agenge kous usoonetap murot tai, ak eng' peetuut ne po aeng' keit Puteoli:

¹⁴ ole ki kinyoorchi tupchosyek, ak ki igaigaech ketebi ak icheeget peetuusyek tisap: keit anyun Rome.

¹⁵ Ak kingo kas tupchosyek agobo acheek eng' olooto, kobwa kotorookwech kot koit Siireet ne po Apio ak Kooriik Somok che po Toek. Kingo keer Paulo icheek, komwachi Kamuktaindet kongoi ak konyiganit.

Komi Paulo Rome

¹⁶ Ak ki ngeit Rome, kechamji Paulo kotebi ineegei kobooto asigarindet ne kiriibei ineendet.

¹⁷ Ak kingo kagosiirto peetuusyek somogu koguur piik che eecheen che po Yahudik kotuiyo: ak kingo kagoyumgei, koleenji icheek, Che kitupche, agot ngo ma yai anee kiy ne ya eng' piik, anan eng' pitonwegap kwanisyekyok, ko ki kindea eunegap Romanik eng' Jerusalem, ko aa kimonjororyo:

¹⁸ ak kimachei kotyacha icheek, ko kagogin ng'aleekyuk, amu ki ma komi kiy eng' anee ne nyoljin meet.

¹⁹ Ago ye kingo kirinda Yahudik ng'olyoondonooto, ageer ale kanyool ariirchi Caesarea; ma keele ki atinye kiy ne ang'andoe pororyennyu.

²⁰ Amu niito anyun kasoomok obwa kegeerge ak keng'alaal tugul: amu aa rataat eng' sirimi agobo kamang'unetap Israel.

²¹ Ak ki leenji ineendet, Tomo kenyooru paronok che punu Judea agobo inyee, anan konyo oli age eng' tupchosyek ak koboorwech anan komwa kiy ne ya agobo inyee.

²² Ago kimache kegasenen kiy ne ibwaati: amu ki konaak eng' acheek keele kimwaoti ne ya agobo pitoniito eng' komosta age tugul.

²³ Ak ye kingo kagochop peetuut, kobwonji ineendet che chaang' eng' koot ne ki menyei; ak ki iborsechi komyee, kobaoryani agobo laitornatetap Kamuktaindet, ak kogiiljingei koneeti icheek agobo Jeso eng' ng'atuutyet ne po Musa ak eng' maotik, kobooch karon agoi koimen.

²⁴ Ak ki iyan alak tuguuk che ki kimwaei, koma iyan alak.

²⁵ Ak ye ki mata kogasyin icheegei, koba, ko kagomwa Paulo ng'olyoot agenge, kole, “Ki mwachi komyee Kabuuset ne Tiliil kwanisyekwok eng' maotyot Isaiah, kole,

²⁶ ‘Ui ye mi pichu ak imwa ile, Eng' kaseet ogase, ago moguitosi agot kitigin; ak eng' keeret ogeere, ago mobestosi agot kitigin.

²⁷ Amu kwolilenotin mugulelwegap pichu, ak ma kastoi komyee iitiikwak, ak kiger icheeget konyekwak; si ma keer eng' konyekwak, anan kogas eng' iitiikwak, anan koguiyo eng' mugulelwekwak, si koweek kogeny, ak asoop icheek.’

²⁸ Ingonaak anyun eng' okweek, ole, kiyookyin yetunoni po Kamuktaindet pororyosyek; kasei ak icheek.”

²⁹ Ak ye kingo kagomwa ng'aleechu, koba Yahudik, koteebategei icheegei miising'.

³⁰ Ak ki meny eng' kenyiisyek aeng' koonnyi ne ki alei meng'et, ak kitaach tugul che ki pwonjin ineendet,

³¹ koamdoi agobo laitornatetap Kamuktaindet, ak koneeti tuguuk agobo Kiptaiyat Jeso Kristo eng' nyiganateet tugul, ama etee chii.