POISYONIGAP CHE KIYOKTOI 27 - BUKUIT NE TILIIL Sireet ne Dutero Kanon

Pandap Paulo agoi Rome

¹ Ak kingo kagetil ng'aleek keele kebun moinget keebe Italy, ki kigoochi Julio chemogetap kiplugotinik pogol, ne po lugeetap Augusto, Paulo ak kimonjororinik alak.

² Kelaany anyun meeliit ne po Adramutio, ne kimachei kwo komoswek alak che mi ngeguutap Asia, keebe ak Aristarko Makedonianindet ne po Thessalonike.

³ Ak eng' peetuut ne po aeng' keit Sidon: ak ki riiree `Julio Paulo, ak kochamji kwo ole mi choronokyik si konyoor toreteet.

⁴ Ak ki kibun moinget eng' olooto ak ki kiteektaegei Cyprus, amu ki kirindaech usoonet.

⁵ Ak ye kiga kebun moinget kelande eng' nyanjet ne po Cilicia ak Pamphylia, keit Myra, nganaseet ne po Lycia.

⁶ Ak ki nyoorchi olooto chemogetap kiplugotinik pogol meeliit ne po Alexandria, ne wendi Italy; kondeech meeliit anyun.

⁷ Ak ye kiga keebe mutyo eng' meeliit eng' peetuusyek che chaang', agoi keit Cnido eng' pichiindo, koraanyech usoonet, keebe keteektaegei Krete, ne itoorchingei Salmone.

⁸ Ki kibun ngeguut eng' pichiindo agoi keit komosta age ne kiguure Luukwek che Myach; ole neegitee nganaseetap Lasea.

⁹ Ak kingo kagosiirto peetuusyek che chaang', ak kobichiit pandap nyanjet, amu kiga kosiirto peetuusyegap Karugutetapkei, koteechi Paulo icheek,

¹⁰ koleenji, “Murenju, kaageer ale miitei ng'oiyondit ak luseet eng' paniito po nyanjet, ma ne po meeliit kityo ak tuguuk che mi oriit, ago ne po saboonwekyok ak icheek.”

¹¹ Ago ki kas chemogetap kiplugotinik pogol ng'aleegap pounindet ak chiitap ko po meeliit, kosiir ng'aleek che kamwaei Paulo.

¹² Ak amu ki ma ko luuita ne yamei ketebee eng' peetuusyegap kaitityet, komwa che chaang' kole, myee kota kinaakte eng' olito, tamangap keit Phoenisia, si ketebee olooto eng' peetuusyegap kaitityet; nooto ko ki luuitap Krete, ne kitokyingei murot kaataam kitigin ak murot tai kitigin.

Usoonet ne oo

¹³ Ak ye kingo us mutyo usoonet ne punu komostap tai, koleen icheek kagonyoor kiit ne kamachei, konem nanget ak kobun tabandap Krete, ye neegit ngeguut.

¹⁴ Ak ne matenit kous kipchurchuryet ne oo, ne kiguure Eurakulo:

¹⁵ ak ye ki ngenam meeliit, ak mata komuuch kootap usoonet, keistochigei, ak koonech.

¹⁶ Ak ki ngerwai keteektaategei emet ne ki ikween peek ne kiguure Kauda, kimuuch eng' pichiindo keganap moinget ne ming'in.

¹⁷ Kingo kagotogosune moingonooto, koboisyee tuguuk che kitorete, koratune moinget oriit; ak kingo iywei icheek kole si ma kiwiirchi Surti, kochoor angook, ak ki oon usoonet koba.

¹⁸ Ak ye kita keboisyei miising' eng' kagiiletapkei, ketabe usoonooto oo, ketau eng' peetuut ne po aeng' kewiirte tuguuk che mi meeliit,

¹⁹ ak eng' peetuutap somok kowiirta icheeget eng' eunekwak tuguuk che kiboisyee eng' meeliit.

²⁰ Ak ye ki mata koluuchech asiista anan kecheik eng' peetuusyek che chaang', ak kogiichech usoonet ne oo, kogeskei anyun kamang'unet ne ki kileen, tos kisarwech.

²¹ Ak ye kiga kotar peetuusyek che chaang' ama amis, kotonon Paulo eng' kwenunnywa, ak kole, “Murenju, kita myee nda ki kogasa, ak kita myee nda ki ma obwa eng' Krete, ak onyooru nyalili ak lusoni.

²² Amwaiwok nguno ale onyiganitu: amu ma mi chii ne meei eng' okweek, kobatee meeliit.

²³ Amu kotonon malaikaiyatap Kamuktaindet eng' ye neegiteena kemouni, ne aa nenyi, ak ne aoote,

²⁴ kole, ‘Ameiyweisye, Paulo; kanyool itonon eng' taitap Caesarea: ak keero, kagogoonin Kamuktaindet tugul che obendi tugul eng' moinget.’

²⁵ Ara anyun, murenju, onyiganitu, amu ayani Kamuktaindet, ale yaaksei ko uu ye kogomwaiwo.

²⁶ Ago kanyool kewiirchech emet ne ki ikween peek.”

²⁷ Ago ye kingo it kemoutap taman ak ang'wan, ye kita kowiirchinech usoonet komosi ak komosi eng' nyanjet ne kiguure Adria, ko ki ibwaati piigap moinget olo po kemoi kween koleen kagoriikta emet age.

²⁸ Ara ki irooch peek kiit ne kikwaise, ak konyoor kakwautik artam; ak kita koba kitigin korooch peek kogeny kioto, konyoor kakwautik sosom.

²⁹ Ak kingo iywei icheek kole abeere togot kewiirchech pitet ne mi rwandosyek, kounda nangaisyek ang'wan eng' moinget olo po let, kosoom kole nda kaech.

³⁰ Ak ye kimachei piigap moinget komwaei kobagaakta moinget, ko kagochoorta moinget kwo araraita, koleen si kobwaat piik kole wiirtoi icheek nangaisyek eng' olo po moinget tai,

³¹ koleenji Paulo chemogetap kiplugotinik pogol ak kiplugotinik, “Ngot koma tebi pichu eng' moinget, ko momuuchi osapche.”

³² Kotil anyun kiplugotinik rogoosyek che po moinget, ak kobagaakta kobut.

³³ Ak ye kimachei koeech, kogaigai Paulo icheek tugul koamis, koleenjin, Rani ko peetuutap taman ak ang'wan ogeni ak kota orugutige, ak tomo oam kiy.

³⁴ Nooto anyun asoomok ale oamisye: amu niito sabeeng'wong'; amu ma petei sumeiyot agot agenge eng' metitap chii age tugul eng' okweek.

³⁵ Ak ye kingo kagomwa ko uu nooto, ak konam magatyat, kogoochi Kamuktaindet kongoi eng' taitap tugul: ak kiton, ak kotoi koamis.

³⁶ Konyiganitu anyun icheek tugul, ak koamis.

³⁷ Ak acheek tugul ko ki piik pogol aeng' ak tamanwogik tisap ak lo eng' meeliit.

³⁸ Ak kingo kagobiyong'so, kowiirchi araraita nganuuk si kowisisiit meeliit.

Ng'emetap meeliit

³⁹ Ak kingo kagoeech, koma konai emonooto: ki keer luuita age ne tinyei ng'aniek, ne ki ibwaati kole, ngo mugak kokweri meeliit kwo olooto.

⁴⁰ Kotyach anyun nangaisyek, ak kobagaakta eng' araraita, ak kotyach rogoosyek che ki kirate pagoinik che kindochine moinget; ak ye kingo kagonamji parak angeet ne mi oliin po tai kotokyi usoonet, koba ngeguut.

⁴¹ Ago kingo it ye tuiyechin nyanjosyek aeng'u, kochunda icheek meeliit koryep ng'aniek; ak kinamak moinget ole po tai kot koma kotwau, ago ki toi moinget kong'asur eng' ole po let eng' kimnateetap mildaetapkei ne po peek.

⁴² Ak ng'olyoot ne ki tinyei kiplugotinik ko kobar kimonjororinik, kole si ma pir peek alage eng' icheek, kochililyo.

⁴³ Ago amu kimachei chemogetap kiplugotinik pogol kosar Paulo, koeete icheek si ma yai kiit ne kamachei; ak kong'at icheek che ki imuuchi kobirot peek kole, kowiirchigei nyanjet, si kosip koit ngeguut:

⁴⁴ ak ki pun alage pagoinik, kobun alage tuguuk alak che po meeliit. Kolong'ji anyun tugul emet kochamegei.